2 SAMUEL 11 - BUKUIT NE TILIIL Sireet ne Dutero Kanon

Daudi ak Bathsheba

¹ Kingo it kasartap kenyiit ne cham kobee laitorinik lugeet, koyookto `Daudi Joab kobooto otwogikyik ak Israel tugul kobar lagogap Ammon. Kiyiem lugeetap Israel Rabbah. Ago ki tebi Daudi eng' Jerusalem.

² Kingo it koskoleny eng' pesyet age, kong'eet `Daudi eng' itogunnyi ak kowendote kootap laitoryat parak. Ye kingo mi parak, kogeer kwony ne ki karaaran kot kounegei.

³ Ki iyookto `Daudi piik koteep agobo kwonyooto. Ak ki le age, “Niito ko Bathsheba cheptap Eliam, nooto ne osotyotap Uriah Hitindet”

⁴ Ki iyookto anyun `Daudi piik koba kimut, ak ki nyo ole mi ineendet ak kiruiyo ak ineendet; (amu kiga koanyinygei eng' murwoonindanyi.) Yeityo koweektagei kwo koonnyi.

⁵ Ki manach kwonyooto, ak ki iyookto kemwachi Daudi agobo nooto.

⁶ Ara anyun ki iyookto `Daudi chii kwo ole mi Joab, koleenji, “Iyookwo Uriah Hitindet.” Ak ki iyookto `Joab Uriah kwo ole mi Daudi.

⁷ Kingo it Uriah ole mi ineendet, koteebe `Daudi ineendet agobo Joab, ak ole chamdogei piik ak ole ki uu lugeet.

⁸ Yeityo koleenji `Daudi Uriah, “Chortegei, ui koong'ung' ak iun keelyeguk.” Ki wo Uriah eng' kootap laitoryat, ak ki kisube ineendet amitwogik che ki punu laitoryat.

⁹ Ago ki ru Uriah kurgeetap kootap laitoryat kobooto otwogik tugul che po kiptaiyandennyi, ma choortagei kwo koonnyi.

¹⁰ Ak kingo kagomwachi `icheek Daudi koleenji, “Ma choortagei Uriah kwo koonnyi,” koleenji `Daudi Uriah, “Kama ibunu panda? Amu nee anyun si mechoortegei iwe koong'ung'?”

¹¹ Kowolji `Uriah Daudi koleenji, “Tebee `keryosyek moinget ak Israel ak Judah, ak menyei keeweet kiptaiyandennyu Joab ak otwogigap kiptaiyandennyu. Tos awetitoi ano anyun anee koonnyu, aamisye ak aeeise ak keruiye ak osotyondennyu? Ko uu ye isabe ak ko uu ye sabei saboondang'ung', ma yae kioto.”

¹² Koleenji `Daudi Uriah, “Peni olito rani ak mutai achamun iwe.” Kibeni anyun Uriah Jerusalem peetuunooto, ak peetuut ne ki isubi nooto.

¹³ Ak kingo kuur `Daudi ineendet, koamis ak koeiso eng' tainnyi; ki igoochi koe kot kobogit. Ki wo komanda koskoleny kwo koru eng' itogunnyi kobooto otwogigap kiptaiyandennyi, ago ma choortagei kwo koonnyi.

¹⁴ Kingo kagoeech, kosirchi `Daudi parweet Joab, ak koyooktoe Uriah.

¹⁵ Ki sir eng' parwaanooto kole, “Onde Uriah tai eng' lugeet ne ng'waan miising', ak ochuchuigei obagaakte ineendet si kobiit kebar kome.”

¹⁶ Ak kingo ta koriibei Joab nganaseet, konde Uriah komosta ne ki mi murenik che nyigoonen.

¹⁷ Ak kimanda piigap nganaseet koba kobargei ak Joab. Ki pek piik alak eng' icheek, eng' otwogigap Daudi, ak kime Uriah Hitindet agine.

¹⁸ Ki iyookto anyun Joab kemwachi Daudi tuguuk tugul agobo lugeet.

¹⁹ Ki ng'at chiito ne kiga iyookto koleenji, “Ye kaimwachi laitoryat tuguuk tugul agobo lugeet kogeskei,

²⁰ ko ngot konereech laitoryat ak koleenjin, Amu nee si ooriikyi nganaseet obargei? Kama ongen ole imuuchi komwogok eng' irimeet?

²¹ Ng'oo ne ki par Abimelek weeriitap Jerubeset? Ki ma wiiree kwondo age ineendet isyet eng' irimeet, ak ki mechi Tebes? Amu nee anyun si ooriikyi irimeet? Ile, Ki kome otwogindeng'ung' Uriah Hitindet agine.”

²² Ki wo anyun ne ki kiyookto ak kiit ak koboorchi Daudi tuguuk tugul che kiga iyooktoe Joab ineendet.

²³ Ki leenji `chiichooto Daudi, “Ki iterteerech pichooto, ki imong'jech eng' keeweet ak ki kibarategei kot koit ye kibunei eng' ormariichet.

²⁴ Kimwok `mwoogik otwogiguk eng' irimeet; ak ki pek alak eng' otwogigap laitoryat, ak kime agine otwogindeng'ung' Uriah Hitindet.”

²⁵ Koleenji `Daudi chiichooto kagiyogu, “Imwachini Joab ko uu ni ileenjini, Ameng' koiimin ng'olyoondoni, amu parei rotwetap chok age ko uu ye parei age. Igimiit lugeeng'ung' kota kogimit, si kobargei ak nganaseet ak oterteer, ak icheer ineendet.”

²⁶ Kingo kas osotyotap Uriah kole kogome manong'otyondennyi, koote agobo ineendet.

²⁷ Ak kingo pata kateet, koyookto `Daudi kimut konyo koonnyi, ak ki ek osotyonnyi ak ki sikyi ng'etet. Ago ma cham Kamuktaindet ne Toroor kioto ki yai Daudi.