2 SAMUEL 10 - BUKUIT NE TILIIL Sireet ne Dutero Kanon

Koterteeri `Daudi Amonik

¹ Kingo pata niito, kome laitoryatap lagogap Ammon, ak ki laitoran Hanun weeriinnyi kogeer ineendet.

² Ki le anyun `Daudi, “Ayachini ne myee Hanun weeriitap Nahas, ko uu ye ki yaiywo ne myee kwandanyi.” Ara anyun ki iyookto `Daudi piik koba kogaigai ineendet amu kwandanyi. Ago kingo it otwogigap Daudi emetap lagogap Ammon,

³ koleenji `pounigap Hanun kiptaiyannywa, “Ibwaati ile konyiti Daudi kwandang'ung', kot koyogun kagoigoik? Ma iyook Daudi otwogikyik kobwa oldang'ung' kosyach nganaseet, kosegei ak kobar?”

⁴ Ki nam anyun Hanun otwogigap Daudi, ak konem kebeber eng' tamnokwak, ak kotil ngoroikwak komut kwenut koboochit ngorook yeityo kounda icheek koba.

⁵ ki ngemwachi Daudi ng'olyoondonooto, koyookto piik kotorookta icheeget si komwachi koleenji, “Otebi eng' Jeriko ak ye tuun piityo tamnokwok, obwa,” amu ki ililandos pichooto miising'.

⁶ Kingo keer lagogap Ammon kole kagoyaagitu icheeget eng' Daudi, koyookto keguur piigap Syria che menyei Beth-rehob ak piigap Syria che menyei Soba, si konyoor melekto murenik eliphuusyek tiptemu che punei keelyek, kobooto Laitoryat Maaka ak murenik eliphuut ak murenik eliphuusyek taman ak aeng' che po Tob.

⁷ Kingo kas `Daudi, koyookto Joab ak lugeet tugul ne po murenik che kiimeen.

⁸ Ki pwa lagogap Ammon ak kotet lugeet eng' ye kibunei eng' ormariich. Ki mi icheegei piigap Syria che menyei Soba, ak che po Rehob ak murenigap Tob ak che po Maaka, eng' warenget.

⁹ Kingo keer Joab kole kagetet lugeet agobo ineendet eng' tai ak let, kokwei murenik che ki kilewen che po Israel ak kotet si kobargei ak piigap Syria.

¹⁰ Ki inde piik che kiga ng'et, eutap Abisai, ng'eetap kamet, ak kitet icheek si kobargei ak lagogap Ammon.

¹¹ Yeityo kole, “Ngot kogimegitu piigap Syria koterteera, itoreta, ago ngot kogimegitu lagogap Ammon koterteerin, anyoo atoretiin.

¹² Nyiganitu ak ingeegu murenik agobo piikyok ak nganasoogap Kamuktaindennyo, ak ingoyai Kamuktaindet ne Toroor ko uu ye keerei kole myee.”

¹³ Kingo riikta anyun Joab ak murenik che ki mi ak ineendet koba lugeet kobargei ak piigap Syria, komwee `icheek ineendet.

¹⁴ Kingo keer lagogap Ammon kole kagomwei piigap Syria, komwei ak icheek eng' taitap Abisai ak ki pa nganaseet. Ki week Joab anyun eng' ole kimi lagogap Ammon, kobwa Jerusalem.

¹⁵ Kingo keer piigap Syria kole kagiterter icheek eng' taitap Israel, koyumgei.

¹⁶ Ak ki iyookto Hadareser kimut piigap Syria che ki mi aineet pitoniin, ak ki pwa Helam kobooto Sobak kiptaiyatap lugeetap Hadareser kondoune.

¹⁷ Ki ngemwachi Daudi, koyum Israel tugul, yeityo kolandae Jordan ak koba Helam. Kitetkei piigap Syria kotokyigei Daudi ak kobargei ak ineendet.

¹⁸ Ki mwee `piigap Syria Israel kogeny, ak ki par `Daudi piigap Syria pogol tisap che po kariisyek ak murenik eliphuusyek artam che ki laanyei paraisisyek ak ki par Sobak kiptaiyatap lugeennywa komechi yooto.

¹⁹ Kingo keer laitorinik tugul che ki otwogigap Hadareser kole kagiterter icheek eng' taitap Israel, koyai kaalyeet ak Israel, ak koot icheek. Koiywei anyun piigap Syria kota kotoret lagogap Ammon kogeny.