2 LAITORINIK 9 - BUKUIT NE TILIIL Sireet ne Dutero Kanon

Koegu Jehu laitoryatap Israel

¹ Ki kuur maotyot Elisha age eng' weeriigap maotik, ak koleenji ineendet, “Kermenge, ak iip lalani po mwaita, ak iwe Ramoth-gilead.

² Ak ye iit yooto, icheeng' Jehu weeriitap Jehoshaphat weeriitap Nimshi. Ye iwe ko, ileenji kong'eet eng' kwenutap tupchosyekyik, ak imut ineendet kwo koot ne po oriit.

³ Yeityo inemu laletap mwaita, ak iroong'ji mwaita metinnyi, ak ileenji, ‘Kamwa Kamuktaindet ne Toroor kole: Kaaiilin iegu laitoryat eng' Israel,’ yeityo iyat kurgeet, ak imwei, amat igagei.”

⁴ Kwo anyun Ramoth-gilead murenonooto, ne ki maotyot.

⁵ Kingo it olooto konyoorta kiptainigap lugeet kotebyei; ak ki le, “Atinye ng'olyoot ne kagiyogunena, ee kiptaiyat.” Ak ki le Jehu, “Kagiyookyi ng'oo eng' acheek tugul?” Ak ki le, “Kagiyogun, ee kiptaiyat.”

⁶ Ki ng'eet anyun kwo ko, ak kiroong'ji mwaita metinnyi, ak koleenji ineendet, “Kamwa ko uu ni Kamuktaindet ne Toroor, Kamuktaindetap Israel, kole: ‘Kaaiilin iegu laitoryat eng' piigap Kamuktaindet ne Toroor, chooto ko Israel.

⁷ Ibare kootap Ahab kiptaiyandeng'ung', si kobiit ayaakta mugetuut eng' korotiigap otwogikyuk maotik, ak eng' korotiigap otwogigap Kamuktaindet ne Toroor tugul, eng' eutap Jesebel.

⁸ Amu igeesugei koot komugul ne po Ahab. Abare weeriit age tugul ne po Ahab, kobooto ineendet ne kerat ak ineendet ne ityagat eng' Israel.

⁹ Ayae kootap Ahab koigei kootap Jeroboam weeriitap Nebat, ak ne po Baasha weeriitap Ahija.

¹⁰ Ak amei sesenik Jesebel eng' kooretap Jezreel, ak ma piitu chii ne tubei ineendet.’ ” Ak ki yaat kurgeet, ak komwei.

¹¹ Ki nyo anyun Jehu ole ki mi otwogigap kiptaiyandennyi. ki teebee age ineendet koleenji, “Kaalyeet? Kanyonjin kibiywoni amu nee?” Ak ki leenji icheek, “Ongen chiichooto, ak kiit ne uu ng'alaalennyi.”

¹² Ki le icheek, “Lembech! Mwaiwech anyun nguno!” Ak ki le Jehu, “Kang'alaalwo ko uu ni ak ko uu ni. Kole ineendet, ‘Kamwa Kamuktaindet ne Toroor kole: Kaaiilin iegu laitoryat eng' Israel.’ ”

¹³ Ki chirchirenso konam chii tugul ngoryennyi ak koito kotobon ng'wony eng' ineendet eng' ole po paragutap lang'eiywot ne po koot. Ki kuut iryageet ak kole, “Laitoryat Jehu!”

¹⁴ Kochaam anyun Jehu weeriitap Jehoshaphat weeriitap Nimshi, Joram. (Kiriibei Joram ineendet ak Israel tugul Ramoth-gilead, amu Hazael laitoryatap Syria:

¹⁵ ago kiga week Laitoryat Joram kwo kinya eng' Jezreel eng' mook che kiga toor ineendet piigap Syria, ye ki paregei ak Hazael laitoryatap Syria.) Ki mwa Jehu kole, “Ngot kogiit ne obwaati ni, ko mat ogany kwo chii kochilil eng' nganaseet, kwo komwaita eng' Jezreel.”

¹⁶ Kolaany anyun Jehu chepkichutit, kwo Jezreel, amu kiruei Joram eng' olooto. Kiga choorgei Ahasia agine laitoryatap Judah kogeer Joram.

¹⁷ Ye kitonone riibindet eng' teekseet ne kooi ne po Jezreel, ko kitoben Jehu ak kweanennyi kobwanei, ak ki le, “Ageere kobwanei piik.” Ak ki le Joram, “Nam chiito ne laanyei paraisiit ak iyookte kotorookta, ak ingowo koleenji, ‘Obwane eng' kaalyeet?’ ”

¹⁸ Kwo anyun chiito kobun paraisiit, kotorookta icheek, ak koleenji, “Kamwa laitoryat ko uu ni, kole: ‘Obwane eng' kaalyeet?’ ” Ki le Jehu, “Image nee kaalyeet? Nyoo ui let.” Kimwaita riibindonooto kole, “Kait chiito ne kagagiyookto ole mi icheek, ago ma week.”

¹⁹ Ki iyookto chiitap aeng' kobun paraisiit. Kingo it ye ki mi icheek komwachi koleenji, “Kamwa laitoryat kole: ‘Tos kaalyeet?’ ” Ki wol Jehu kole, “Image nee kaalyeet? Nyoo ui let.”

²⁰ Ak ki mwaita riibindet kogeny kole, “Kait ole mi icheek, ago ma week. Kergei kweryennyi ak kweryetap Jehu weeriitap Nimshi; amu kweryei eng' koroomnateet.”

²¹ Ki le Joram, “Ochoboge.” Kochop anyun chepkichutinnyi. Ak kingo manda Joram laitoryatap Israel ak Ahasia laitoryatap Judah, komi chii tugul chepkichutinnyi, kogiba kotorookta Jehu, ak ki nyoorchi ineendet kooretap Nabot Jesreelindet.

²² Kingo keer Joram Jehu, komwa kole, “Kaalyeet oo Jehu?” Ak ki wol kole, “Kaalyeet ne po nee, kota ko oo ibeetapkei ne po komet Jesebel ak ponisyosyekyik?”

²³ Kiweech Joram eunekyik ak komwei, koleenji Ahasia, “Pwo! Mi ng'wektaet, wee Ahasia!”

²⁴ King'i Jehu kwangennyi eng' kimnateennyi tugul ak komwok Joram kokwer kwenutap tigigoikyik. Ki isore kipchabet muguleldanyi ak ki ibutyi chepkichutinnyi.

²⁵ Koleenji anyun Jehu Bidka kiptaiyatap lugeennyi, “Sut ak iwiirchi kooretap Nabot Jesreelindet. Ibwaat ile, ye ki kibendi tuwai kisubi Ahab kwandanyi, ko ki inde Kamuktaindet ne Toroor milani ineendet;

²⁶ kole, Koageer iman amut korotiigap Nabot ak korotiigap weeriikyik, mwaei Kamuktaindet ne Toroor; ak ayaagun eng' mbarani, mwaei Kamuktaindet ne Toroor. Ara anyun wiirchi ineendet mbaranooto; ko uu ng'olyootap Kamuktaindet ne Toroor.”

Kebarei Ahasia Laitoryatap Judah

²⁷ Kingo keer Ahasia laitoryatap Judah kioto, komwei kobun ooreet ne wendi koot ne mi mbar (Beth-hagan). Ki oon Jehu ineendet ak kole, “Obar ineendet agine eng' chepkichutit!” Ki kibar ineendet eng' ole kitogostoe eng' Gur ye neegitee Ibleam. Kimwechi Megiddo ak komechi yooto.

²⁸ Kisut ineendet otwogikyik eng' chepkichutit kwo Jerusalem, ak kotup ineendet eng' kererinnyi kobooto kwanisyekyik eng' nganaseetap Daudi.

²⁹ Ki toi kolaitoran Ahasia eng' Judah eng' kenyiitap taman ak agenge ne po Joram weeriitap Ahab.

Meetap Jesebel

³⁰ Ki it anyun Jehu Jezreel. Kingo kas Jesebel, kosal konyekyik ak kolelesonji metinnyi yeityo koitito eng' tirisyet.

³¹ Ak ye kinyonei Jehu eng' ormariich, kole, “Tos kenyon eng' kaalyeet, inyee Shimri, rumindetap kiptaiyandeng'ung'?”

³² Ki inyal Jehu tirisyet ak kole, “Ng'oo ne mi komostanyu? Ng'oo?” Kigeerei ineendet `piik aeng'u anan somok che ki kiptainik.

³³ Ak ki le Jehu, “Owiiru!” Kowiir anyun ineendet konyo ng'wony ak ki iseegei korotiikyik inaatut ak paraisisyek; ak kityechatyech Jehu ineendet.

³⁴ Ye kingo nyo ko, koamis ak koeeiso. Yeityo kole, “Oriip kwonyito chuboot, si otup ineendet, amu ineendet ko cheptap laitoryat.”

³⁵ Ki pa koleen kotup ineendet, ago ki ma nyoor ineendet kobatee terta, keelyekyik ak rubeiywegap eunekyik.

³⁶ Kobwa ko anyun kogeny ak komwachi ineendet. Ak ki le, “Ng'olyootap Kamuktaindet ne Toroor nooto, ne ki mwa eng' otwogindennyi Elijah Tisbindet, kole, Amei sesenik poortap Jesebel eng' kooretap Jezreel.

³⁷ Kergeitu ak ng'atateek muustap Jesebel eng' mbareet eng' kooretap Jezreel; kot koma komwaei piik kole, ‘Jesebel ni.’ ”