2 LAITORINIK 8 - BUKUIT NE TILIIL Sireet ne Dutero Kanon

Elisha ak Chepsunamindet

¹ Kiga ng'alaalji Elisha kwonyi kiga ing'eetyi weeriinnyi, koleenji, “Ng'eet ak obe ak piigap koong'ung', omeny oldo tugul ole ochame, amu kagoguur Kamuktaindet ne Toroor rubeet. Nyoonei rubeet emet kenyiisyek tisap.”

² Ki ng'eet kwonyooto ak koyai ko uu ng'olyootap chiitap Kamuktaindet. Ki pa ak koonnyi ak komeny emetap Philistiik kenyiisyek tisap.

³ Kingo keskei kenyiisyek tisap, koweek kwonyooto eng' emetap Philistiik ak ki wo koriirchi laitoryat agobo koonnyi ak korennyi.

⁴ Ki ng'alaalji `laitoryat Geasi otwogindetap chiitap Kamuktaindet, koleenji, “Asoomin ale, mwaiwo tuguuk tugul che eecheen che ki koyai Elisha.”

⁵ Kingo ta komwachin ineendet laitoryat ole ki isaapto kogeny lakweet ne kiga kome, kochun anyun kwonyi ki king'eetyin weeriinnyi koriirchi laitoryat agobo koonnyi ak korennyi. Ak ki le Geasi, “Kiptaiyandennyu, ee laitoryat, kwonyooto ni, ak weeriinnyi ni ne ki ing'eeti Elisha.”

⁶ Ak kingo teebee laitoryat kwonyooto, komwachi ineendet. Kong'atyi anyun laitoryat ineendet kiptaiyat, koleenji, “Ui weekyi ineendet tuguuk tugul che ki chechiik, ak logoek tugul che po mbareet kobooch peetuut ne kiwendi eng' emoni, agoi ra.”

Koegu Hazael laitoryatap Syria

⁷ Ki nyo `Elisha Damasko, ak kimyani Ben-Hadad laitoryatap Syria. Ki kimwachi keleenji, “Konyo oli chiitap Kamuktaindet.”

⁸ Ki leenji laitoryat Hazael, “Ip kagoochinet ak iwe itorookte chiitap Kamuktaindet ne Toroor. Ak iteepse Kamuktaindet ne Toroor eng' ineendet, ileenji, ‘Asabe eng' myani?’ ”

⁹ Kwo anyun Hazael, kotorookta ineendet ak koip kagoochinet ne po kiit age tugul ne myee ne po Damasko, che yamei kola tambeesik artamu. Ki nyo kotonon eng' tainnyi, ak kole, “Kagoyokwo weeriing'ung' Ben-Hadad laitoryatap Syria, anyo oldang'ung', kole, ‘Tos asap eng' myani?’ ”

¹⁰ Ki leenji Elisha ineendet, “Ui ileenji ineendet, Isabe iman; nganda kagoboorwo Kamuktaindet ne Toroor kole meei ineendet iman.”

¹¹ Kitokyi ineendet togeennyi konjurur inne, kot kolilaan ineendet. Ki riir anyun chiitap Kamuktaindet.

¹² Ki le Hazael, “Amu nee si iriir, kiptaiyandennyu?” Ak ki wol kole, “Amu angen yaityet ne tuun iyachini piigap Israel. Tuun ibeele irimoikwak che kiimeen, ibare weeriikwak eng' rotoogap chok, ibirte manyurunikwak, kotonak, ak igereer kwonyiikwak che tamonosyek.”

¹³ Ki le Hazael, “Nee otwogindeng'ung', ne seset kityo, kot koyai kii oo?” Ak ki wol Elisha kole, “Kigoboorwo Kamuktaindet ne Toroor kole, iegu laitoryat eng' Syria.”

¹⁴ Kwo anyun eng' ole ki mi Elisha, ak koit ye mi kiptaiyandennyi. Ki teebe ineendet koleenji, “Kalenjin nee Elisha?” Ak ki mwachi koleenji, “Kaleenjo isabe iman.”

¹⁵ Ak ki eng' karon, konem angeet ne kiitoi eng' itoogut parak, korookto peek ak kotuge togeennyi agoi kome. Ki laitoran Hazael kogeer ineendet.

Jehoram Laitoryatap Judah

¹⁶ Ki toi kolaitoran Jehoram weeriitap Jehoshaphat laitoryatap Judah eng' kenyiitap muut ne po Joram weeriitap Ahab laitoryatap Israel, ye ki Laitoryat Jehoshaphat ne po Judah.

¹⁷ Ki po kenyiisyek sosom ak aeng' ineendet ye kingo tau kolaitorani ak ki laitoran kenyiisyek sisiit eng' Jerusalem.

¹⁸ Kiwendote ortinwegap laitorinigap Israel, koyai ko uu kootap Ahab: amu ki cheptap Ahab osotyonnyi. Ki yai yaityet eng' taitap Kamuktaindet ne Toroor.

¹⁹ Ago ma cham Kamuktaindet ne Toroor kobar Judah, amu otwogindennyi Daudi, ko uu ye ki iarorchi kogoochi ineendet tait ne po lagokyik peetuusyek tugul.

²⁰ Ki ingelelji Edom Judah eng' peetuusyekyik, ak ki lewenjigei Edom laitoryat ne pou icheek.

²¹ Ki landa anyun Joram kwo Sair, kobooto kariisyekyik tugul. Ki ng'eet kemoi ak kobar Edomik che ki kayiem ineendet, kobooto kiptainigap kariisyek, ak ki mweiso piik koba emaisyekwak.

²² Kongelelji anyun Edom Judah agoi ra. Ak kingelel agine Libna eng' peetuusyechooto.

²³ Poisyonik che ng'etunotiin che po Joram, ak tuguuk tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

²⁴ Ki ru Joram ak kwanisyekyik, ak ki kitup kobooto kwanisyekyik eng' nganaseetap Daudi. Ak ki laitoran Ahasia weeriinnyi kogeer ineendet.

Ahasiah Laitoryatap Juda

²⁵ Ki toi kolaitoran Ahasia weeriitap Jehoram laitoryatap Judah eng' kenyiitap taman ak aeng' ne po Joram weeriitap Ahab laitoryatap Israel.

²⁶ Ki po kenyiisyek tiptem ak aeng' Ahasia ye ki tau kolaitorani, ak ki laitoran kenyiit agenge eng' Jerusalem. Ak kainetap kamet ko ki Athaliah cheptap Omri laitoryatap Israel.

²⁷ Kiwendote ortinwegap kootap Ahab, ak koyai yaityet eng' taitap Kamuktaindet ne Toroor, ko uu ye kiga yai kootap Ahab, amu kisandetap kap Ahab.

²⁸ Ki pa ak Joram weeriitap Ahab kobargei ak Hazael laitoryatap Syria eng' Ramoth-gilead. Ki iguoten piigap Syria Joram.

²⁹ Ki week Laitoryat Joram konyo kinya eng' Jezreel eng' mook che kitoor piigap Syria ineendet eng' Ramah, ye ki paregei ak Hazael laitoryatap Syria. Ki choortagei Ahasia weeriitap Jehoram laitoryatap Judah kwo kogeer Joram weeriitap Ahab eng' Jezreel, amu kimyani.