2 LAITORINIK 7 - BUKUIT NE TILIIL Sireet ne Dutero Kanon

¹ Ki mwa Elisha kole, “Ogas okweek ng'olyootap Kamuktaindet ne Toroor: kamwa Kamuktaindet ne Toroor ko uu ni, kole, Ki aldoe mutai saini keruutik muut che po peek che ng'ootiin che tambulul shekelit agenge, ak kealdoe keruutik taman che po baale shekelit agenge, eng' ormariichetap Samaria.”

² Kowolji anyun kiptaiyat ne kitiegei eunnyi laitoryat chiitap Kamuktaindet, koleenji, “Ogeero, ngot koyai Kamuktaindet ne Toroor tirisyok eng' kipsengwet, ko tos piit kioto?” Ak ki le Elisha, “Keero, igeere eng' konyeguk, ago meame tuguuchooto.”

Komweei piigap Syria

³ Ki mi piik ang'wanu che ki tinyei mogondosaik ole kibunei eng' ormariichet: ak ki leenjigei, “Amu nee si ketebee yu kot kebegu?

⁴ Ngot kemwa keele, ‘kibendi nganaseet,’ komi rubeet nganaseet ak kibegu eng' yooto. Ak ngot ketebi eng' yu kesisye, kebegu kora. Ara anyun obwa keebe ye mi lugeetap piigap Syria. Ngot kobagaaktech, kesaptosi; ak ngot kobarech, kebegu.”

⁵ Ki ng'eetyo karon kota ko mirmir ak koba nganaseetap piigap Syria. Kingo it tabandap nganaseetap piigap Syria, konyoor koma komi chii yooto.

⁶ Amu ki igoochi `Kamuktaindet ne Toroor piigap Syria kogas cheetap kariisyek ak cheetap paraisisyek ko uu cheetap lugeet ne oo: ki leenjigei anyun, “Ogeero, kagogoochi tuguuk laitoryatap Israel laitorinigap Hitik ak che po Misiriik, si kobwa kobarech!”

⁷ Komwei anyun kota komirmir ak kobagaakta emaisyekwak, paraisisyekwak ak sigirokwak. Ki pagaakta nganaseet ko uu kiit ne ki uu ak komwei kosar saboonwekwak.

⁸ Kingo it pichooto ki tinyei mogondosaik tabandap nganaseet kogiba emait age oriit. Ki amis ak koeeiso, ak koip fedha, thahabu ak ngoroik, ak koba kouny. Ki week icheek koba emait age ak koip tuguuk eng' yooto agine, ak koba kouny.

⁹ Yeityo komwachigei kole, “Ma myee ni kagiyai. Kagisisye ak ko peetuuni ko peetuutap logoiywek che myach. Ngot kegany kot koeech, konamech pireet. Ara anyun obwa keebe kemwachi piigap kaplaitoryat.”

¹⁰ Ki pa anyun ak koguur riibindetap nganaseet ak komwachi icheek koleenji, “Kagibe nganaseetap piigap Syria, ak kama komi chii yooto, anan ko tweguunetap chiito, ago ka ratotiin paraisisyek ak sigiroik, ak ko uu emaisyek kiit ne ko uu.”

¹¹ Ki kuur anyun riibiik alak, ak ki mwachi piigap kaplaitoryat eng' ko.

¹² Ki ng'eet laitoryat kemoi ak koleenji otwogikyik, “Aboorwok kiit ne kogoyaiywech piigap Syria. Ingen kole amech rubeet; koba anyun eng' nganaseet kounygei eng' timiin kole, ‘Si ye mong' eng' nganaseet, kenam, ak keebe nganaseet.’ ”

¹³ Ki wol age eng' otwogikyik kole, “Asoomin ale, ingoba piik alak ak paraisisyek muut che ta ko ng'etunotiin, che mi nganaseet, (ogeero, tee chaang'indo tugul ne po Israel che ng'etunotiin eng' nganaseet; ogeero, tee chaang'indo tugul ne po Israel che ki kogeskei). Ara ongiyookte piik kogeer si kobiit kenai.”

¹⁴ Konam anyun kariisyek aeng' ak paraisisyek. Ki iyookto `laitoryat piik koosup lugeetap piigap Syria koleenji, “Oba ogeerote.”

¹⁵ Ki isup agoi koit Jordan, ki nyiitaat ooreet ngoroik ak tereenik, che ki wiirtooti piigap Syria korwaei. Ak ki week pichooto kiga kiyookto komwachi laitoryat.

¹⁶ Ki manda piik koba konam tuguugap nganaseetap piigap Syria. Ki kialdae anyun keruutik muut che po peek che ng'ootiin che tambululeen shekelit agenge, ak ki kialdae keruutik taman che po baale shekelit agenge, ko uu ng'olyootap Kamuktaindet ne Toroor.

¹⁷ Ki ng'at anyun `laitoryat kiptaiyatap lugeet ne kitiegei ineendet eunnyi, koriip ormariichet. Kityech `piik ineendet eng' ormariichet ak kime ko uu ye ki kamwa chiitap Kamuktaindet, ne ki kamwa ye kiga nyo laitoryat ole mi ineendet.

¹⁸ Ye kingo kagong'alaalji chiitap Kamuktaindet laitoryat, koleenji, “Ki aldoe keruutik taman che po baale shekelit agenge, ak ki aldoe keruutik muut che po peek che ng'ootiin che tambululeen shekelit agenge mutai olo po saini eng' ormariichetap Samaria.”

¹⁹ Ki wolji kiptaiyandanooto chiitap Kamuktaindet koleenji, “Keero, agot ingoyat Kamuktaindet ne Toroor tirisyok eng' kipsengwet, ko tos piit kiy ne uu nooto?” Ak ki le, “Igeere eng' konyeguk, ago meame tuguuchooto.”

²⁰ Ki yaak ko uu nooto eng' ineendet; amu kityech `piik ineendet eng' ormariichet kome.