2 LAITORINIK 5 - BUKUIT NE TILIIL Sireet ne Dutero Kanon

Kisoobi Naaman eng' myandap mogondos

¹ Naaman ko ki kiptaiyatap lugeet, ki chiito ne oo ak ko konyitot, eng' taitap kiptaiyandennyi, laitoryatap Syria. Kiga kogoochi Kamuktaindet ne Toroor Syria katerteeret eng' ineendet. Ki chiito ineendet kogeny ne kiim ak ko nyigan, ago ki tinyei mogondosaik.

² Ki pa piigap Syria koset emetap Israel kobee kweanaik ak kiluul chepto ne ming'in, ak kiboisyechin chebooto kwondap Naaman.

³ Ki leenji lakwanooto kwonyooto, “Nda mi kiptaiyandennyu ole mi maotyot ne mi Samaria, ta kagosoop ineendet eng' mogondosaikyik.”

⁴ Ki wo chiito age ko ak komwachi kiptaiyandennyi, koleenji, “Kamwa ni ak ni chepto ne punu emetap Israel.”

⁵ Ki le laitoryatap Syria, “Ara, ui olooto, si ayookyi parweet laitoryatap Israel.” Ki wo anyun ak koip talendaisyek taman che po fedha, ak thahabusyek eliphuusyek lo, ak ngoroik taman che kiwalawali.

⁶ Ki ipchi parweet laitoryatap Israel, koleenji, “Ye iit oldang'ung' parwaani, ko kaayogu Naaman otwogindennyu, si kobiit isoop ineendet eng' mogondosaikyik.”

⁷ Kingo kagosoman parwaanooto laitoryatap Israel, kogereer ngoroikyik ak kole, “Tos aa Kamuktaindet, ne abare ak asoobi, si koyookwo chiichi chiito konyo asoop eng' mogondosaikyik? Ago asoomin ale ibwaat ak igeer ole cheeng'doi suryet eng' anee!”

⁸ Kingo kas Elisha chiitap Kamuktaindet, kole kagereer laitoryatap Israel ngoroikyik, koyookto chiito kwo kaplaitoryat koleenji, “Amu nee si igereer ngoroiguk? Ingonyo oli ami si konai kole mi maotyot Israel.”

⁹ Konyo anyun Naaman ak paraisisyekyik ak kariisyekyik, inyoo kotonon eng' kurgeetap kootap Elisha.

¹⁰ Ki iyookto Elisha chiito kwo ole mi ineendet, kwo koleenji, “Ui iunge eng' Jordan konyil tisap, ak weekyiningei kogeny poortang'ung', ak itiliiliitu.”

¹¹ Ago kinereech Naaman, ak kwo ak kole, “Kaleen, mong'u saang' iman ole ami, ak kotonon ak koguur kainetap Kamuktaindet ne Toroor Kamuktaindennyi, ak kosapsabe eunnyi ole ama, ak kosoop mogondosaik.

¹² Tos ma koigoi Abana ak Parpar, ainoosyegap Damasko, kosiir peek tugul che po Israel? Tos koma ta amuuchi aunegei chooto ak atiliiliitu?” Koweek anyun, ak kwo konereechi miising'.

¹³ Ki pwa otwogikyik koriik ak kong'alaalji, koleenji, “Abba, nda kagaleenjin maotyot iyai kiit age ne oo, ta kama iyae? Ko kamyeeit ne tya ngo leenjin, Iunge si itiliiliitu!”

¹⁴ Kochoortagei anyun kwo kochut peek konyil tisap eng' Jordan, ko uu mwaetap chiitap Kamuktaindet. Ki week poortanyi kowalak koigei poortap lakweet ne ming'in, ak kitiliiliit.

¹⁵ Ki week kwo ole mi chiitap Kamuktaindet, ineendet ak piikyik tugul che ki mi ak ineendet, ak ki nyo ak kotonon eng' tainnyi: ak kole, “Kaanai anyun nguno, ale ma mi Kamuktaindet eng' ng'wony tugul, kobatee eng' Israel. Ara asaain nguno anyun ale, taach konunet eng' otwogindeng'ung'.”

¹⁶ Ago ki mwa kole, “Ko uu ye sabei Kamuktaindet ne Toroor, ne atonone tainnyi, ko mataache kiy.” Ak nganda kibirchi ineendet koip, ko ki eesyo.

¹⁷ Ki mwa Naaman kole, “Ngot ko mata icham, asaain ale ngigoochi otwogindeng'ung' ng'ung'unyek che yamei kola nyumbusyek aeng'u; amu kobooch nguno koma kogoochin otwogindeng'ung' kagoochinet ne kibeelei, anan ko tiseiywot, kanamonik, koek Kamuktaindet ne Toroor ineegei.

¹⁸ Ingonyochi kaat Kamuktaindet ne Toroor otwogindeng'ung' eng' kii: Ye wendi kiptaiyandennyu kootap Rimon kosaaei eng' yooto, kotiegei eunnyu, ak ang'uruuge eng' kootap Rimon, ye ang'uruuge eng' kootap Rimon, ko ingoyochi kaat Kamuktaindet ne Toroor otwogindeng'ung' eng' kiito.”

¹⁹ Ki leenji ineendet, “Ui eng' kaalyeet.” Kwo anyun eng' ye ki mi ineendet ne ma looit.

²⁰ Ago ki le Geasi otwogindetap Elisha chiitap Kamuktaindet, “Keero, kabagakyi kiptaiyandennyu Naaman Syrianindet, amataach eng' eunnyi tuguuk che kaibu. Ko uu ye sabei Kamuktaindet ne Toroor, alabati asubi ineendet ak aibe ineendet tuguuk alak.”

²¹ Kosup anyun Geasi Naaman. Kingo keer Naaman chiito kolabatu kosubu ineendet, kochoorgei eng' chepkichutit kotorookta ineendet ak koleenji, “Kaalyeet?”

²² Ak ki le, “Kaalyeet! Kaiyokwo kiptaiyandennyu, kole, Kagoit oldanyu murenik aeng'u che po weeriigap maotik, che punu emetap tuloonook ne po Ephraim. Asoomin ale, igoochi icheek keruutik sosom che po fedha ak ngoroik aeng' che kiwalawali.”

²³ Ki le Naaman, “Iyan iip keruutik tamanwogik lo ak sisiit che po fedha,” ak kibirchi ineendet ak koratyi chooto po fedha eng' ratuutik aeng', ak ngoroik aeng' che kiwalawali, ak kogoochi otwogikyik aeng' koipchi; ak ki ip kondoe ineendet.

²⁴ Kingo it tulweet, konam ineendet tuguuchooto eng' eunegap otwogichooto, ak kwo kogonor eng' ko. Ak ki mwachi pichooto koba yeityo koba icheek.

²⁵ Ago ki wo ineendet ko, ak kotonon eng' taitap kiptaiyandennyi. Ak ki leenji Elisha ineendet, “Ibunu ano, Geasi?” Ak ki le ineendet, “Kamawo ui otwogindeng'ung'.”

²⁶ Ago ki leenji `Elisha ineendet, “Kama obe ak muguleldanyu ye kaweeksei chiichigai eng' chepkichutinnyi kotorogun? Tos peetuusyechu ko che kitaage fedha, anan ketaage ngoroik, mbareenigap mseituni, mbareenigap sabibuk, keechiirek ak tuuga, anan otwogik che murenik ak che tiibiik?

²⁷ Namin anyun mogondosigap Naaman ak iyoteng'ung' koigeny.” Ki manda anyun eng' ye ki mi ineendet ko kagonam mogondosaik, koleelit ko uu teluji.