2 LAITORINIK 3 - BUKUIT NE TILIIL Sireet ne Dutero Kanon

Lugeet eng' kwenutap Israel ak Moab

¹ Ki toi kolaitoran Jehoram weeriitap Ahab eng' Israel eng' Samaria eng' kenyiitap taman ak sisiit ne po Jehoshaphat laitoryatap Judah, ak ki laitoran kenyiisyek taman ak aeng'.

² Ki yai yaityet eng' taitap Kamuktaindet ne Toroor, ago ma yai ko uu kwandanyi anan ko uu kamennyi; amu ki isto toloitap Baal ne kiga yai kwandanyi.

³ Nganda uu nooto ko ki nam ineendet tengekwogigap Jeroboam weeriitap Nebat, che ki ibeete Israel si koyai tengekto; ma istoegei.

⁴ Ki tinyei Mesha laitoryatap Moab keechiirek, ak ki igoochi laitoryatap Israel koroorigap aaregap keechiir eliphuusyek pogol, kobooto che po mengichik eliphuusyek pogol.

⁵ Ago kingo me Ahab, kongelelji laitoryatap Moab laitoryatap Israel.

⁶ Ki manda anyun Laitoryat Jehoram eng' Samaria eng' peetuusyechooto, ak koyum Israel tugul.

⁷ Ki iyookto chiito kwo kap Jehoshapat laitoryatap Judah, koleenji, “Koingelelja laitoryatap Moab. Tos ichame keebe tuwai Moab keebe kebar?” Ak ki le, “Achame ketogoste! Auu kiit ne iuu, uu piikyuk piiguk, ak uu paraisisyekyuk paraisisyeguk.”

⁸ Ak ki le, “Ki togostoe ooreet ne punei ano?” Ak ki wol kole, “Ki togostoe ooreetap surkwen ne po Edom.”

⁹ Ki pa anyun laitoryatap Israel kobooto laitoryatap Judah ak ne po Edom. Ye kiyiem emet eng' pandap peetuusyek tisap ko ki it koror peek. Ki ma komi peek che eei lugeet anan ko tuuga che ki kweryei icheeget.

¹⁰ Ki le laitoryatap Israel, “Pwo eng' acheek! Amu kogoguur Kamuktaindet ne Toroor laitorinichu somok kibagenge konde eunegap Moab.”

¹¹ Ago ki le Jehoshaphat, “Ma mi yu maotyotap Kamuktaindet ne Toroor, keteepse eng' Kamuktaindet ne Toroor ineendet?” Ki wol chiito age eng' otwogigap laitoryatap Israel kole, “Mi yu Elisha weeriitap Sapat, ne kigerchin peek Elijah.”

¹² Ki le Jehoshaphat, “Mi ng'olyootap Kamuktaindet ne Toroor kobooto ineendet.” Kochoortagei anyun laitoryatap Israel ak Jehoshaphat kobooto laitoryatap Edom koba ole mi ineendet.

¹³ Ki leenji `Elisha laitoryatap Israel, “Kiting'egei nee ak inyee? Ui ole mi maotigap kwandang'ung' ak maotigap kamenng'ung'.” Ak ki leenji laitoryatap Israel ineendet, “Achicha! Amu kogoguur Kamuktaindet ne Toroor laitorinichu somok kibagenge, konde eunegap Moab.”

¹⁴ Ki le Elisha, “Ko uu ye sabei Kamuktaindet ne Toroor ne po lugoosyek, ne atonone tainnyi, ko nda kama agonyiti Jehoshaphat laitoryatap Judah amu mi yu, ko kama kota agusyinin kong' iman, anan ageerin.

¹⁵ Ago imutwaa nguno putindet.” Ak kingo put chiichooto kibugandet, konyonji ineendet eutap Kamuktaindet ne Toroor.

¹⁶ Ak ki le, “Kamwa Kamuktaindet ne Toroor kole: ‘Obal kererchosyek che chaang' eng' tembwoni.’

¹⁷ Amu kamwa Kamuktaindet ne Toroor kole: ‘Mogeere usoonet anan ogeer ropta, ago nyiei peek tembwonin, ak oee okweek, tuukwok ak tyong'ikwok.’

¹⁸ Ago ni ko ki it ne ming'in eng' taitap Kamuktaindet ne Toroor, amu indoi kogeny Moabik eunekwok.

¹⁹ Obare nganaseet age tugul ne ng'ootaat ak nganaseet age tugul ne karaaran. Oluul keetit age tugul ne myee, oger kondametusyek tugul che po peek ak ong'em eng' koik kooret age tugul ne myee.”

²⁰ Ak ki eng' karon eng' olo po sait ne kigoitoe kagoochinet, ko ki pwa peek che kibunei ooreetap Edom, ak ki nyi emet peek.

²¹ Kingo kas anyun Moabik tugul kole, kotogos laitorinik kobwa kobargei ak icheek, koyumgei tugul che ki imuuchi kolaach kariik, agoi che eecheen, ak koba kotononso eng' kiwoto.

²² Ki ng'eetyo karon inne ak kiga iluuchi asiista peek, ak ki keer Moabik peek, ko kabiriritu ko uu korotiik.

²³ Ki le icheek, “Korotik chuun! Kogebar laitorinik iman, ak kogobar chii tugul chorwennyi. Ara anyun, Moabichu, onam parunenik!”

²⁴ Ago kingo it nganaseetap Israel, kong'eetyo Israel kobar Moabik, kot komwei eng' tainnywa. Ki pa anyun kochut emet kobarat Moabik.

²⁵ Kibut nganasook, ak ki wiirchi chii age tugul koitanyi kooret age tugul ne myee, konyiit koik. Kiger kondametusyek tugul che po peek ak koluul keetiik tugul che myachen. Eng' let kotuuch Kir-hareset ineegei kobooto koik che po yooto, ago kiyiem nganasanooto piik che ki wiirtoi koik, ak kobookyi olooto kobar.

²⁶ Kingo keer laitoryatap Moab kole kagogoromji pooryeet ineendet, komut murenik pogol tisap che tinyei rotonik, kole kourur lugeet kwo ole mi laitoryatap Edom, ago ma imuuch.

²⁷ Ki nam anyun taaitanyi ne kita tuun namei laitornatennyi kogeeri ineendet ak kogoito koek kagoochinet ne kibeelei eng' inaatut parak. Ki piit nereegek che eecheen agobo Israel; ak ki pa eng' ole mi ineendet, koweektagei emennywa.