2 LAITORINIK 25 - BUKUIT NE TILIIL Sireet ne Dutero Kanon

Koyiemei `puunik Jerusalem

¹ Ak eng' kenyiitap sogool ne po laitornatennyi, eng' arawetap taman, eng' peetuutap taman, konyo Nebukadnezar laitoryatap Babilon kobooto lugeennyi tugul kobookyi Jerusalem. Ki teech `icheek irimoik koyiem nganaseet.

² Kiyiem anyun nganaseet agoi kenyiitap taman ak agenge ne po Laitoryat Zedekiah.

³ King'wanit rubeet eng' nganaseet eng' peetuutap sogool ne po arawetap ang'wan, ak ki ma komi amitwogik che amei piik eng' emet.

⁴ Kibut anyun piik irimeetap nganaseet ak komweiso murenik tugul che po lugeet kemoi kobun ooreetap ormariichet ne ki mi kwenutap inatusyek aeng' ole ki neegitee seremutap laitoryat. Nga kiga yiem Kaldeik nganaseet, ko ki pun icheek ooreetap Arabah.

⁵ Ago ki oon lugeetap Kaldeik laitoryat, ak ki nam ineendet eng' warengosyegap Jeriko. Ki iyeesta lugeennyi tugul kometo ineendet.

⁶ Ki imut anyun laitoryat kwo ole mi laitoryatap Babilon eng' Ribla, ak ki irwookyi ineendet.

⁷ Ki par weeriigap Zedekiah kogeerei ineendet. Kibol konyegap Zedekiah ak korat ineendet eng' nyororosyek, ak komut kwo Babilon.

Kolaalei hekaluut

⁸ Ak ki nyo Jerusalem `Nebusaradan kiptaiyatap riibiik, otwogindetap laitoryatap Babilon, eng' arawetap muut, peetuutap tisap, ne ki kenyiitap taman ak sogool ne po Laitoryat Nebukadnezar, laitoryatap Babilon.

⁹ Ki peel kootap Kamuktaindet ne Toroor, kootap laitoryat ak kooriik tugul che po Jerusalem, koot age tugul ne oo.

¹⁰ Kibut lugeet tugul ne po Kaldeik ne ki mi ak kiptaiyatap riibiik, irimosyegap Jerusalem komoswek tugul.

¹¹ Ki imut koluul `Nebusaradan kiptaiyatap riibiik piik che kiga ng'et eng' nganaseet, che kiga chililso, che ki igoochigei laitoryatap Babilon ak piigap tuiyet che kiga ng'et.

¹² Ago ki pagaakta kiptaiyatap riibiik, piik che kibananook miising' eng' emet, koek riibiigap sabibuk ak koek semberik.

¹³ Kitui Kaldeik tolochigap sugunonik che ki mi kootap Kamuktaindet ne Toroor, ng'echerok che ki tebee ak nyanjet ne po sugunwet che ki mi kootap Kamuktaindet ne Toroor, ak koip sugunonigap tuguuchooto koba Babilon.

¹⁴ Ki ip tereenik, kechigosyek che eecheen, magasisyek che kitile ole lalei eng' taisyek, kechigosyek ak tereenik tugul che po sugunonik che kiboisyee.

¹⁵ Ki ip kiptaiyatap riibiik tuguuk che ki ibe maat ak taabook, tuguuk che ki kiyae thahabu ak che ki kiyae fedha.

¹⁶ Tolochichooto aeng', kobooto nyanjanooto agenge, ak ng'echerok che ki tebee, che kiga yachi Solomon kootap Kamuktaindet ne Toroor; ma kimuuch kenai nyigiisindap sugononigap tuguuchuuto tugul.

¹⁷ Koindap tononetap toloita agenge ko ki mitainik sisiit, ak kimi metitap sugunwet paragunnyi; ak kooindap tononetap metoto kogimitait agenge ak robo; kobooto kariik che regerotiin ak logoek che ki mi metoto komoswek tugul, che ki po tugul sugunonik. Ki tinyei toloita ne po aeng' tuguuk che uu chooto, kobooto kariik che regerotiin.

Kimuti piigap Judah koba Babilon

¹⁸ Ki imut `kiptaiyatap riibiik Seraiah tisiindet ne oo ak Zephaniah tisiindet ne po aeng' ak riibiik somok che ki riibei kurgeet.

¹⁹ Ki imut eng' nganaseet kiptaiyat ne ki pou murenigap lugeet ak piik muut eng' icheek che kigeerei togeetap laitoryat che ki mi nganaseet. Ki imut kora siriindet, kiptaiyatap lugeet, ne ki iyumi piigap emet ak piik tamanwogik lo che po emet, che ki kinyoorchi nganaseet.

²⁰ Ki imut `Nebusaradan kiptaiyatap riibiik pichooto, komutyi laitoryatap Babilon eng' Ribla.

²¹ Ki par laitoryatap Babilon pichooto eng' Ribla eng' emetap Hamath. Ki kimut anyun Judah keluul komanda eng' emennyi.

Kitoroori Gedalia koboi piik che ki ng'et eng' Judah

²² Ki yai Nebukadnezar Gedalia weeriitap Aikam weeriitap Sapan koek pounindetap piik che kiga ng'et eng' emetap Judah, che kilakta Nebukadnezar laitoryatap Babilon.

²³ Kingo kas kiptainik tugul che po lugoosyek, icheeget ak piikwak, kole kogoyai laitoryatap Babilon Gedalia koek pounindet, kobwa ole mi Gedalia eng' Mispa, chooto ko ki Ishmael weeriitap Netania, Johanan weeriitap Karea, Seraiah weeriitap Tanumet Netopatindet, ak Jaasania weeriitap Maakatindet, kobooto piikwak.

²⁴ Ki iyasyechi icheek Gedalia ak piikwak, koleenji, “Amoiywei amu otwogigap Kaldeik: omeny emet ak oot laitoryatap Babilon, si komyeeit eng' okweek.”

²⁵ Ago ki nyo eng' arawetap tisap Ishmael weeriitap Netania, weeriitap Elisama, ne po kesweegap kaplaitoryat, ak ki pwa ak piik taman, ak kobar Gedalia kome kobooto Yahudik ak Kaldeik che ki mi kobooto ineendet eng' Mispa.

²⁶ Ki ng'eetyo komwei piik tugul che mengech ak che eecheen, ak kiptainigap lugeet, ak ki pa Misiri, amu ki iywei Kaldeik.

Kityaachi Laitoryat Jehoiakin

²⁷ Eng' kenyiitap sosom ak tisap ne po luuleetap Jehoiakin laitoryatap Judah, ye ki tau kolaitorane Ebil-merodak laitoryatap Babilon, ko ki ityaach ineendet Jehoiakin laitoryatap Judah komong' eng' korgoreet eng' arawetap taman ak aeng', eng' peetuutap tiptem ak tisap.

²⁸ Ki ng'alaalji ineendet eng' rireenetapkei ak kieet ineendet kotororit kosiir laitorinik che ki mi kobooto ineendet eng' Babilon.

²⁹ Ki wal ineendet ngoroikyik che po korgoreet ak ki amis eng' tainnyi kotugul eng' peetuusyek tugul che po sabeennyi.

³⁰ Ki igoochi laitoryat ineendet kotugul kebebertanyi ne po amitwogik, che yamei peetuut age tugul, eng' peetuusyek tugul che po sabeennyi.