2 LAITORINIK 24 - BUKUIT NE TILIIL Sireet ne Dutero Kanon

¹ Ki togos Nebukadnezar laitoryatap Babilon eng' peetuusyekyik, ak ki ek Jehoiakim otwogindennyi kenyiisyek somok, ago kingo pata kongelelji ineendet.

² Ki iyookyi `Kamuktaindet ne Toroor ineendet lugosyegap Kaldeik, piigap Syria, Moabik, ak che po lagogap Ammon. Ki iyookto icheek koba kobar Judah, ko uu ng'olyootap Kamuktaindet ne Toroor ne ki mwa eng' otwogikyik maotik.

³ Ki ityi kii Judah iman ko uu ng'atuutyetap Kamuktaindet ne Toroor, si koisto icheek koba eng' tainnyi, amu ng'oogiswegap Manasseh, ko uu tugul che ki yai,

⁴ ak agobo korotiik che ma tinyei tengek che kitumda. Amu ki inyiit ineendet Jerusalem korotiik che ma tinyei tengek, ak ki eesyo Kamuktaindet ne Toroor konyochi kaat.

⁵ Poisyonik che ng'etunotiin che po Jehoiakim, ak tuguuk tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

⁶ Koru anyun Jehoiakim kobooto kwanisyekyik. Ak ki laitoran Jehoiakin weeriinnyi kogeer ineendet.

⁷ Ki mata konyo kogeny laitoryatap Misiri komong' eng' emennyi, amu kiga konam laitoryatap Babilon, chooto tugul che ki po laitoryatap Misiri, kong'etee aineetap Misiri agoi aineetap Yufrets.

Jehoiakin, laitoryatap Judah

⁸ Ki po kenyiisyek taman ak sisiit Jehoiakin ye ki tau kolaitorani, ak ki laitoran eng' Jerusalem arawek somok. Ki kiguure kamennyi Nehusta cheptap Elnatan ne po Jerusalem.

⁹ Ki yai yaityet eng' taitap Kamuktaindet ne Toroor ko uu tugul che kiga yai kwandanyi.

¹⁰ Ki togos eng' peetuusyechooto otwogigap Nebukadnezar laitoryatap Babilon kobwa Jerusalem, ak ki yiem nganaseet.

¹¹ Ak ki nyo nganaseet Nebukadnezar laitoryatap Babilon, kota koyiemei yooto otwogikyik.

¹² Ki manda Jehoiakin laitoryatap Judah, kwo ole mi laitoryatap Babilon, kobooto kamennyi, otwogikyik, pounikyik ak kiptainikyik. Ki imut ineendet laitoryatap Babilon eng' kenyiitap sisiit ne po laitornatennyi.

¹³ Ak ki ip eng' yooto konoraik tugul che ki mi kootap Kamuktaindet ne Toroor ak che ki mi kootap laitoryat. Kituatui tereenik tugul che po thahabu komengegitu che kiga yai Solomon laitoryatap Israel eng' Hekaluutap Kamuktaindet ne Toroor, ko uu ye ki kamwa Kamuktaindet ne Toroor.

¹⁴ Ki imut piik tugul che po Jerusalem: pounik tugul, ak piik tugul che kiimeen che nyigoonen, che ki luulenik eliphuusyek taman, kobooto musogik tugul ak kitang'ik. Ma mi ne ki ng'et kobatee piik che ki kibananook miising' che ki mi emet.

¹⁵ Ki imut `Nebukadnezar Jehoiakin kwo Babilon. Ki imut kora kobooto ineendet eng' Jerusalem koba Babilon, kametap laitoryat, osotigap laitoryat, kiptainikyik ak piik che eecheen che po emet.

¹⁶ Ki imut chooto laitoryatap Babilon koluul koba Babilon piik tugul che po lugeet eliphuusyek tisap, che ki kiimeen tugul ak ko pegechinotin eng' lugeet, musogik ak kitang'ik eliphuut agenge.

¹⁷ Ki yai `laitoryatap Babilon Mattaniah ng'eetap kametap kwandanyi, koek laitoryat kogeer ineendet ak kowal kainennyi koek Zedekiah.

Zedekiah, laitoryatap Judah

¹⁸ Ki po kenyiisyek tiptem ak agenge Zedekiah ye ki tau kolaitorani, ak ki laitoran kenyiisyek taman ak agenge eng' Jerusalem. Ki kiguure kamennyi Hamutal cheptap Jeremiah ne po Libna.

¹⁹ Ki yai yaityet eng' taitap Kamuktaindet ne Toroor, ko uu tugul che kiga yai Jehoiakim.

²⁰ Ki piit tuguuchooto amu nereegegap Kamuktaindet ne Toroor eng' Jerusalem ak Judah, kot kotimda icheek koba eng' tainnyi. Ki ingelelji Zedekiah laitoryatap Babilon.