2 LAITORINIK 23 - BUKUIT NE TILIIL Sireet ne Dutero Kanon

Koibu waleet `Josiah eng' emet

¹ Ki iyookto laitoryat kiyumji ineendet poisyek tugul che po Judah ak che po Jerusalem.

² Ki togosta laitoryat kootap Kamuktaindet ne Toroor kobooto piik tugul che po Judah, piik tugul che ki menyei Jerusalem, tisiik, maotik, kobooto piik tugul, che mengech ak che eecheen. Kisoman ng'aleek tugul che po bukuitap arorutyet ne ki kinyooru eng' kootap Kamuktaindet ne Toroor.

³ Ki tonon laitoryat eng' ye po toloita ak koyai arorutyet eng' taitap Kamuktaindet ne Toroor, koosup Kamuktaindet ne Toroor ak koriip ng'atuutikyik, paornatosyekyik ak kayomisutikyik eng' muguleldanyi tugul ak saboondanyi tugul, kogimit ng'aleegap arorutyoni che ki kisirchi bukuini. Kitononso piik tugul koyan arorutyonooto.

⁴ Ki ng'at `laitoryat Hilkiah tisiindet ne oo, tisiik che rubei ne po tai ak riibiigap kurgeet, koip komong' eng' Hekaluutap Kamuktaindet ne Toroor tereenik tugul che ki kiyachin Baal, che po Asera ak che po tuguuk tugul che po kipsengwet. Ki peel eng' Jerusalem saang' eng' mbareetap Kidron ak koip oreek koba Bethel.

⁵ Ki isto tisiigap kanamonik, che kiga konde laitorinigap Judah, kobeelei nyamdutik eng' komoswek che torooreen eng' nganasoogap Judah ak eng' komoswek che kiyiem Jerusalem, kobooto icheek che kibeeljin Baal nyamdutik, asiista, arawet, kecheik che eecheen ak tuguuk tugul che po kipsengwet.

⁶ Ki ip Asera komong' eng' kootap Kamuktaindet ne Toroor, koip komanda eng' Jerusalem, agoi kererutap Kidron, ak kobeel, ak kotuatui komengegitu koek pusbusiik, ak koseer koba kereeriisyegap piik.

⁷ Kibut kooriigap sodomik, che ki mi kootap Kamuktaindet ne Toroor, ole kiyae kwonyiik ngoroik che songinindos che po Asera.

⁸ Ki imut Josiah tisiik tugul komong' eng' nganasoogap Judah ak kong'waniit komoswek che torooreen ole kibeelee tisiik nyamdutik, kobooch Geba agoi Beer-sheba. Kibut komoswek che torooreen che po ormariichok che ki mi ye kimandoe eng' ormariichetap Joshua pounindetap nganaseet, che ki mi komostap kaataam eng' ormariichetap nganaseet.

⁹ Ago ma togos tisiigap komoswek che torooreen kobwa ye miitei kaptisisyetap Kamuktaindet ne Toroor eng' Jerusalem, ago ki amei magatiinik che ma kinde mermereek eng' kwenutap tupchosyekwak.

¹⁰ Ki ing'wanit Topet, ne mi atebweetap lagogap Hinom, si ma igoito chii weeriinnyi anan ko cheptonyi kobun maat kogoochi Molek.

¹¹ Ki isto paraisisyek che kiga kogoochi laitorinigap Judah asiista. Ki mi ye kimandoe kebendi kootap Kamuktaindet ne Toroor, ye neegitee kootap Natan-melek riibindet, ne mi serem. Ki peel kariisyek che po asiista eng' maat.

¹² Kibut laitoryat kapkorosusyek che ki mi koot parak eng' koot ne tabanu parak ne po Ahaz, che kiga koyai laitorinigap Judah, ak kapkorosusyek che kiga koyai Manasseh eng' seremusyek tuwai che po kootap Kamuktaindet ne Toroor. Kiturur ak kotuatui yeityo koseer koba kererutap Kidron.

¹³ Ki ing'wanit laitoryat komoswek che torooreen che ki mi taitap Jerusalem, che ki mi eutap tai ne po tulweetap ng'emisyet, ne kiga teekyi Solomon laitoryatap Israel Astoret ne kiwechei ne po Sidonik, kobooto Kemos ne kiwechei ne po Moab, ak Milkom ne kiwechei ne po lagogap Ammon.

¹⁴ Kituatui anyun ineendet tolochik ak koep Aserik koluul, ak ki inyiit olooto kawegap piik.

¹⁵ Kibut kapkorosuut ne ki mi Bethel, komosta ne toroor ne kiga koyai Jeroboam weeriitap Nebat, ne ki igoochi Israel koyai tengekto; ki peel komosta ne toroor ak kotuatui koek pusbusiik, ak kobeel Asera.

¹⁶ Kingo welelgei Josiah, ko ki keer kereeriisyek che ki mi tulweet. Ki iyookto piik koba koip kawek eng' kereeriisyechooto ak kobeel eng' kapkorosunooto, ak kong'wanit ko uu ng'olyootap Kamuktaindet ne Toroor, ne kimwaita chiitap Kamuktaindet ne kimwaitoi tuguuchooto.

¹⁷ Kiteep ineendet kole, “Nee ki o po kabwaatet no ageere?” Ak ki mwachi piigap nganaseet ineendet koleenji, “Kereritap chiitap Kamuktaindet, ne ki punu Judah, ne ki nyo komwaita tuguuchuuto kaiyai iyachi kapkorosutap Bethel.”

¹⁸ Ak ki le, “Omete, amat koisto chii kawekyik.” Kobagaakta anyun kawekyik, kobooto kawegap maotyot ne ki punu Samaria.

¹⁹ Ki isto Josiah kooriik tugul che po komoswek che torooreen che ki mi nganasoogap Samaria, che kiga koteech laitorinigap Israel kotage Kamuktaindet ne Toroor konereech, ki yachi chooto tugul ko uu ye kiga koyachi che ki mi Bethel.

²⁰ Ki par tisiik tugul che po komoswek che torooreen che ki mi yooto, eng' kapkorosusyek, ak kobeel kawegap piik eng' paragunnywa. Yeityo koweek kwo Jerusalem.

Paska

²¹ Ki ng'at `laitoryat piik tugul koleenji, “Oriipchi Kamuktaindet ne Toroor Kamuktaindeng'wong' paska, ko uu ye ki kisir eng' bukuini po arorutyet.”

²² Ki mata keyai paska ne uu nooto kobooch peetuusyegap kirwoogik che ki irwookyin Israel, anan eng' peetuusyek tugul che po laitorinigap Israel, anan che po laitorinigap Judah.

²³ Ago ki kiyai paska niito eng' kenyiitap taman ak sisiit ne po Laitoryat Josiah, keyachi Kamuktaindet ne Toroor eng' Jerusalem.

Tuguuk alak che ki wal Josiah

²⁴ Ki isto `Josiah icheek che kiboisyee oik, pooniik, terapik, kanamonik ak tuguuk tugul che kiwechei che ki kigeerei eng' emetap Judah ak eng' Jerusalem. Ki yai niito si kobiit kogimit ng'aleegap Ng'atuutik che kiga kisir eng' bukuit ne kinyoor Hilkiah tisiindet eng' kootap Kamuktaindet ne Toroor.

²⁵ Ki ma piit eng' tai anan eng' let laitoryat ne kergei ak ineendet, ne ki isup Kamuktaindet ne Toroor eng' muguleldanyi tugul, eng' saboondanyi tugul ak eng' kamugennyi tugul, ko uu Ng'atuutik tugul che po Musa.

²⁶ Agot nganda uu nooto koma meto Kamuktaindet ne Toroor koroomnatetap nereegekyik che eecheen, che kiga nereekyine Judah, amu tagisyet tugul ne kitach Manasseh ineendet.

²⁷ Ki le Kamuktaindet ne Toroor, “Aistoi Judah agine eng' tainnyu, ko uu ye ki aiste Israel, ak amete nganasani ki alewen, Jerusalem, kobooto koot ne ki ale, ‘Tebee kainennyu yooto.’ ”

Meetap Josiah eng' Megiddo

²⁸ Poisyonik che ng'etunotiin che po Josiah, ak tuguuk tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

²⁹ Ki togosta Pharaoh-neko laitoryatap Misiri eng' peetuusyegap Josiah kobookyi laitoryatap Assyria, eng' aineetap Yufrets. Ki wo Laitoryat Josiah kwo kobargei ak ineendet; ak ki par laitoryandanooto Josiah eng' Megiddo, ye kingo keer ineendet.

³⁰ Kila ineendet otwogikyik eng' chepkichutit eng' Megiddo ko kagome ak kola agoi Jerusalem ak kotupchi ineendet kererinnyi. Ak ki imut `piigap emet Jehoahas weeriitap Josiah, koiil ak koyai ineendet koek laitoryat, kogeer kwandanyi.

Jehoahas, laitoryatap Judah

³¹ Ki po kenyiisyek tiptem ak somok Jehoahas ye ki tau kolaitorani, ak ki laitoran arawek somok eng' Jerusalem. Ki kiguure kamennyi Hamutal cheptap Jeremiah ne po Libna.

³² Ki yai yaityet eng' taitap Kamuktaindet ne Toroor ko uu tugul che kiga yai kwanisyekyik.

³³ Ki rat `Pharaoh-neko ineendet eng' Ribla eng' emetap Hamath, si ma laitoran eng' Jerusalem, ki ng'at emet kogoon aisuruut, keruutik eliphuusyek somok ak pogol ang'wan che po fedha, ak kiloisyeksosom ak ang'wan che po thahabu.

³⁴ Ki yai `Pharaoh-neko Eliakim weeriitap Josiah koek laitoryat kogeer Josiah kwandanyi, ak ki wal kainennyi koek Jehoiakim. Ago ki imut Jehoahas koisto ak ki nyo Misiri, ak ki nyo kome eng' olooto.

Jehoiakim, laitoryatap Judah

³⁵ Ki igoochi Jehoiakim fedha ak thahabu Pharaoh, ago ki ng'at emet kogoon fedhaisyek ko uu ng'atuutyetap Pharaoh. Kimage fedha ak thahabu piik che po emet, chii age tugul ko uu ye ki king'at, si kogoochi Pharaoh-neko.

³⁶ Ki po kenyiisyek tiptem ak muut Jehoiakim ye ki tau kolaitorani, ak ki laitoran kenyiisyek taman ak agenge eng' Jerusalem. Ki kiguure kamennyi Sebida cheptap Pedaiah ne po Ruma.

³⁷ Ak ki yai yaityet eng' taitap Kamuktaindet ne Toroor, ko uu tugul che kiga yai kwanisyekyik.