2 LAITORINIK 21 - BUKUIT NE TILIIL Sireet ne Dutero Kanon

Manasseh, laitoryatap Judah

¹ Ki po kenyiisyek taman ak aeng' Manasseh ye ki tau kolaitorani, ak ki laitoran kenyiisyek konom ak muut eng' Jerusalem. Ki kiguure kamennyi Hepsi-ba.

² Ki yai yaityet eng' taitap Kamuktaindet ne Toroor, koosup tuguuk che kiwechei che po pororyosyek, che ki oon Kamuktaindet ne Toroor eng' taitap piigap Israel.

³ Amu ki teech kogeny komoswek che torooreen che kiga kobut Hezekiah kwandanyi; kiteekyi Baal kapkorosusyek ak koyai Asera ko uu ye kiga yai Ahab laitoryatap Israel. Kigutung'ji ineendet tuguuk tugul che po kipsengwet ak koot.

⁴ Ki teech kapkorosusyek eng' kootap Kamuktaindet ne Toroor ne ki mwa Kamuktaindet ne Toroor agobo koyooto kole, “Andoi kainennyu Jerusalem.”

⁵ Kiteekyi kapkorosusyek tuguuk tugul che po kipsengwet eng' seremusyek tuwai che po kootap Kamuktaindet ne Toroor.

⁶ Ki igoito weeriinnyi kobun maat, king'orso ak koboisyee ponisyet, ak kobois kobooto piik che poisyee oik ak pooniik. Ki yai yaityet eng' taitap Kamuktaindet ne Toroor, kotach ineendet konereech.

⁷ Ki inde kanamwet ne ki kiwai ne po Asera koot ne ki kamwachi Kamuktaindet ne Toroor Daudi ak weeriinnyi Solomon, koleenji, “Andoi kainennyu koigeny koi ak Jerusalem, ne ki alewen eng' ortinwek tugul che po Israel.

⁸ Ama agoochini keelyegap Israel koombenot kogeny koba eng' emet ne ki agoochi kwanisyekwak; ngot koriip koyai ko uu tugul che ki ang'at icheek, ko uu ng'atuutyet tugul ne ki ng'at otwogindennyu Musa icheek.”

⁹ Ago ma kas icheek. Ki ichuut Manasseh icheek koyai yaityet kosiir ne ki yai pororyosyek, che ki par Kamuktaindet ne Toroor eng' taitap piigap Israel.

¹⁰ Ki ng'alaal Kamuktaindet ne Toroor eng' otwogikyik maotik kole,

¹¹ “Amu kogoyai Manasseh laitoryatap Judah tuguuchu kiwechei, koyai yaityet kosiir tugul che ki yai Amorik, che ki mi eng' tai, ko tomo kobiit ineendet ak kogoochi Judah agine koyai tengekto eng' kanamonikyik;

¹² ko kamwa anyun Kamuktaindet ne Toroor, Kamuktaindetap Israel kole: Aipchini yaityet Jerusalem ak Judah kot kotildilyo itiik eng' chii age tugul ne kagas.

¹³ Aiitoi anweetap Samaria kobun Jerusalem, kobooto kiit ne kikwaise ne po kootap Ahab. Abuchi Jerusalem ko uu ye ibuchi chiito sanit, ye ibuchi ak kogabui.

¹⁴ Atoortai che kang'et che po porotennyu, ak ande icheek eunegap puunikwak. Egu icheek luulenik che luulei puunikwak tugul,

¹⁵ amu ki koyai yaityet eng' tainnyu ak ki kotacha anereech, kobooch peetuut ne ki mong'u kwanisyekwak eng' Misiri, agoi rani.”

¹⁶ Kitumda kogeny Manasseh korotiik che chaang' kot, che ma tinyei tengek, kot konyiit Jerusalem kong'etee komosta age agoi komosta age; kobooto tengektanyi ne ki ibeete Judah si koyai tengekto, eng' yaityet ne ki yai eng' taitap Kamuktaindet ne Toroor.

¹⁷ Poisyonik che ng'etunotiin che po Manasseh, tuguuk tugul che ki yai, kobooto tengektanyi ne ki yai, ko tos ma siraatiin eng' kitabuutap ateptap peetuusyek ne po laitorinigap Judah?

¹⁸ Ki ru Manasseh kobooto kwanisyekyik ak ki kitupchi mbareetap koonnyi, eng' mbareetap Uzzah. Ak ki laitoran Ammon weeriinnyi kogeer ineendet.

Ammon, laitoryatap Judah

¹⁹ Ki po kenyiisyek tiptem ak aeng' Ammon ye ki tau kolaitorani, ak ki laitoran kenyiisyek aeng' eng' Jerusalem. Kainetap kamennyi ko ki Mesulemet cheptap Harus ne po Jotba.

²⁰ Ki yai yaityet eng' taitap Kamuktaindet ne Toroor, ko uu ye kiga yai Manasseh kwandanyi.

²¹ Kiwendote ortinwek tugul che kiwendote kwandanyi, ak koot kanamonik che kiotei kwandanyi, ak kogutung'ji.

²² Ki meto Kamuktaindet ne Toroor, Kamuktaindetap kwanisyekyik, ama isup ortinwegap Kamuktaindet ne Toroor.

²³ Kichaam otwogikyik Ammon, ak kobar otwogichooto laitoryat eng' koonnyi.

²⁴ Ago ki par piigap emet icheek tugul che kichaamei Laitoryat Ammon, ak ki yai icheek Josiah weeriinnyi koek laitoryat.

²⁵ Poisyonik che ng'etunotiin che po Ammon che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

²⁶ Ki kitupchi kererinnyi eng' mbareetap Uzzah. Ak ki laitoran Josiah weeriinnyi kogeer ineendet.