2 LAITORINIK 20 - BUKUIT NE TILIIL Sireet ne Dutero Kanon

Komyani ak kisoobi Hezekiah

¹ Kimyan Hezekiah eng' peetuusyechooto kot ko neegit kome. Ki nyoonji maotyot Isaiah weeriitap Amos, ak koleenji ineendet, “Kamwa Kamuktaindet ne Toroor kole: Rarchi keet piigap koong'ung'; amu imee, mesabe.”

² Kowelel anyun togeennyi kogeer inaat, ak kosa Kamuktaindet ne Toroor kole,

³ “Ee Kamuktaindet ne Toroor, asaain ale, ibwaat ole ki atepte eng' imanda eng' taing'ung', ak eng' muguleldo ne ititaat, ak ayai ne myee eng' taing'ung'.” Ak ki riir Hezekiah eng' ng'wanindo.

⁴ Ak ye ki tomo koit Isaiah kwenutap nganaseet, konyonji ineendet ng'olyootap Kamuktaindet ne Toroor, koleenji,

⁵ “Weege kogeny, ak ileenji Hezekiah pounindetap piikyuk, Kamwa Kamuktaindet ne Toroor, Kamuktaindetap kwandang'ung' Daudi, kole: Kaagas saaeng'ung', kaageer peeguk po kong'; ara asaabin anyun. Itogostoi kootap Kamuktaindet ne Toroor eng' peetuutap somok.

⁶ Atesyini peetuusyeguk kenyiisyek taman ak muut. Ak asaruun kobooto nganasani eng' eunegap laitoryatap Assyria. Ariibe nganasani agobo anee, ak agobo otwogindennyu Daudi.”

⁷ Ki le Isaiah, “Oibu magatyat ne po logoegap mogoonik.” Koip anyun ak konde ole ki mi myando ne uu ondiryet, ak kisop.

⁸ Ki leenji `Hezekiah Isaiah, “Nee kaboorunet ne ibooru kole isooba Kamuktaindet ne Toroor, si atogosta kootap Kamuktaindet ne Toroor eng' peetuutap somok?”

⁹ Ki mwa Isaiah kole, “Egu kii kaboorunet ne punu Kamuktaindet ne Toroor, ne iboorun kole yaei Kamuktaindet ne Toroor kiit ne kamwa: Wo urwet tai tilutik taman, anan wo let tilutik taman?”

¹⁰ Ki mwa Hezekiah kole, “Kiit ne nyumnyum eng' urwet kwo tai tilutik taman, achicha. Ingoweek urwet kwo let tilutik taman.”

¹¹ Ki riirchi maotyot `Isaiah Kamuktaindet ne Toroor: ak kiweech urwet kwo let tilutik taman, eng' che kiga korekto eng' kiit ne kirogendoe saisyek ne po Ahaz.

Piik che ki kiyok kobunu Babilon

¹² Ki iyookyi Berodak-baladan weeriitap Baladan, laitoryatap Babilon, paronok ak kagoochinet Hezekiah eng' peetuusyechooto, amu kiga kogas kole ki komyan Hezekiah.

¹³ Ki kas Hezekiah icheek, ak koboorchi icheek koot tugul ne po tuguukyik che po kamanuutyet ne oo, fedha, thahabu, nyamdutik, mwanik che po kamanuutyet ne oo, kootap kariikyik che po lugeet ak tuguuk tugul che ki mi ole mi konoraikyik. Ma ng'et kiy eng' koonnyi anan ko pounatennyi tugul ne ma iboorchi Hezekiah icheek.

¹⁴ Ki nyo anyun Isaiah maotyot ole mi Laitoryat Hezekiah ak koleenji, “Kale nee pichu? Ak kobwanei oldang'ung' kobunu ano?” Ak ki le Hezekiah, “Kabunu emet ne loo, kobunu Babilon.”

¹⁵ Ak ki le ineendet, “Kagogeer nee eng' koong'ung'?” Ak kowol Hezekiah kole, “Kagogeer tuguuk tugul che mi koonnyu, ma ng'et kiy eng' konoraikyuk ne ma aboorchi.”

¹⁶ Ki leenji Isaiah Hezekiah, “Kas anyun ng'olyootap Kamuktaindet ne Toroor:

¹⁷ Keero, pwoonei peetuusyek, che tuun ki ibei tuguuk tugul che mi koong'ung' koba Babilon, ak tuguuk tugul che ki konor kwanisyeguk agoi ra. Ma mi kiy ne ng'etu, mwaei Kamuktaindet ne Toroor.

¹⁸ Tuun kimuti alak eng' weeriiguk che mong'unenen, che isiche, ak koba koek icheek che ki kimooch eng' kootap laitoryatap Babilon.”

¹⁹ Koleenji anyun `Hezekiah Isaiah, “Myee ng'olyootap Kamuktaindet ne Toroor ne kemwa.” Komwa kogeny kole, “Tos ma myee kotep ko uu nooto, katai komi kaalyeet ak imanda eng' peetuusyekyuk?”

Kogesugei pounatetap Hezekiah

²⁰ Poisyonik che ng'etunotiin che po Hezekiah, kimnateennyi tugul, ole kiyaita tamboiyot ak kererchet ak koip peek koba nganaseet, ko tos ma siraatiin eng' kitabuutap ateptap peetuusyek ne po laitorinigap Judah?

²¹ Ki ru Hezekiah kobooto kwanisyekyik. Ak ki laitoran Manasseh weeriinnyi kogeer ineendet.