2 LAITORINIK 2 - BUKUIT NE TILIIL Sireet ne Dutero Kanon

Kimuti Elijah kotogosta kipsengwet

¹ Ye ki machei Kamuktaindet ne Toroor komut Elijah eng' kipchurchuryet kwo kipsengwet, ko ki pendi eng' ooreet komandoi eng' Gilgal Elijah ak Elisha.

² Ki leenji `Elijah Elisha, “Asoomin ale, tebi eng' yu; amu kagoyookta Kamuktaindet ne Toroor awo agoi Bethel.” Ago ki le Elisha, “Ko uu ye sabei Kamuktaindet ne Toroor ak ko uu ye sabei saboondang'ung', koma metoin.” Kochoortagei anyun Bethel.

³ Ki mong' weeriigap maotik che ki mi Bethel, kobwa ole mi Elisha, ak koleenji ineendet, “Ingen ile imuti ra Kamuktaindet ne Toroor kiptaiyandeng'ung' si ma ko kiptaiyandeng'ung'?” Ak ki le, “Ee, angen; osisye okweek.”

⁴ Ki leenji `Elijah Elisha, “Asoomin ale tebi eng' yu; amu kagoyookta Kamuktaindet ne Toroor awo Jeriko.” Ak ki le, “Ko uu ye sabei Kamuktaindet ne Toroor ak ko uu ye sabei saboondang'ung', koma metoin.” Ki it anyun tuwai Jeriko.

⁵ Ki pwa koriik ole mi Elisha, weeriigap maotik che ki mi Jeriko, ak koleenji ineendet, “Ingen ile imuti ra Kamuktaindet ne Toroor kiptaiyandeng'ung' si ma ko kiptaiyandeng'ung'?” Ak ki wol kole, “Ee, angen; osisye okweek.”

⁶ Ki leenji `Elijah ineendet, “Asoomin ale, tebi eng' yu; amu kagoyookta Kamuktaindet ne Toroor awo Jordan.” Ak ki le, “Ko uu ye sabei Kamuktaindet ne Toroor ak ko uu ye sabei saboondang'ung', koma metoin.” Ki pa anyun tuwai.

⁷ Ki isup murenik konomu che po weeriigap maotik, ak kotononso eng' ole loo kitigin; ak kitononso icheek aeng'u eng' ye neegitee Jordan.

⁸ Ki ireek Elijah ngoryennyi ak kotaa, ak kokwere peek, kipcheiyo peek koba komosi ak komosi, ak ki landa tuwai eng' ole yaamaat.

⁹ Kingo landa, koleenji `Elijah Elisha, “Soom kiit ne imache ayaun, kotomo kimuta eng' ole imi.” Ak ki le Elisha, “Asoomin ale, ingotebena kebebertap muguleldong'ung' konyil aeng'.”

¹⁰ Ak ki le, “Kesoom kiit ne uui, ago ngigeera ye kimuta awo eng' ole imi, kobiitu ko uu nooto eng' inyee; ago ngot koma uu nooto, koma piitu nooto.”

¹¹ Ye kita kobendi anyun, kong'alaaloti, ko ki piit chepkichutit ne po maat ak paraisisyek che po maat, che ki ibesyo icheek tuwai; ak ki wo Elijah kipsengwet eng' kipchurchuryet.

¹² Ki keer Elisha ak kowaach kole, “Abba! Abba! Karisyegap Israel ak piik che laanyei paraisisyechooto!” Ak ki mata kogeer ineendet kogeny. Ki nam ngoroikyik, ak kogereer kopcheune aeng'.

¹³ Ki nam kogeny ngoryeetap Elijah ne ki ibute ineendet ak koweektagei kwo kotonone ngeguutap Jordan.

¹⁴ Ki nam ngoryeetap Elijah ne ki ibute ineendet ak kokwere peek ak kole, “Mi ano Kamuktaindet ne Toroor, Kamuktaindetap Elijah?” Kingo kagokwer peek, kopcheiyo koba komosi ak komosi, ak ki landa Elisha.

¹⁵ Kingo keer weeriigap maotik che ki mi Jeriko ko katokyigei ineendet, kole, “Tebee `sabeetap Elijah Elisha.” Ak ki pa kotorookta ineendet ak kong'uruuk kot koit ng'wony eng' tainnyi.

¹⁶ Ak ki leenji icheek ineendet, “Keero, mi kobooto otwogiguk piik konomu che kiimeen; kisoomin keele, ingoba kocheeng' kiptaiyandeng'ung'. Tamangap ko kagomut ineendet Kabuusetap Kamuktaindet ne Toroor kotogosta, ak kowiirchi tuloonook parak, anan ko atebwosyek.” Ak ki le, “Amat oyookte.”

¹⁷ Ago kingo simji ineendet agoi kolilaan, komwa kole, “Oyookte.” Koyookta anyun murenik konom, ak ki cheeng'at eng' peetuusyek somok, ama nyoor ineendet.

¹⁸ Kingo week ole mi ineendet, ole ki tebee eng' Jeriko; koleenji ineendet icheek, “Ki ma mwaiwok aleenjok, Amat obe?”

Kwang'utik aeng' che ki yai Elisha

¹⁹ Ki leenji piigap nganaseet Elisha, “Keero, karaaran ole mi nganasani, ko uu ye keerei kiptaiyandennyu, ago yaacheen peek, ama rurtos tuguuk eng' emet.”

²⁰ Ak ki le, “Oibwa soteet ne leel, ak onde oriit muunyuk.” Ak ki ipchi ineendet.

²¹ Ki manda kwo kondametutap peek, ak kowiirchi oriit muunyuk, ak kole, “Kamwa Kamuktaindet ne Toroor kole: ‘Kaasoop peechu; ma kobiitu meet anan osunateet eng' olooto.’ ”

²² Ki kisoop anyun peechooto agoi ra, ko uu ng'olyootap Elisha ne ki mwa.

²³ Ki togosta eng' olooto kwo Bethel. Ye kita kotogostoi eng' ooreet, komong' weeriik che mengeechen eng' nganaseet ak kowit ineendet, koleenji, “Togoste inyee kipchurmet! Togoste, inyee kipchurmet!”

²⁴ Kiguskong' ak kogeer icheek, ak kochup icheek eng' kainetap Kamuktaindet ne Toroor. Ak ki mong' magalaluusyek aeng'u che kogonik ak koton artam ak aeng' eng' weerchooto.

²⁵ Ak ki wo eng' yooto agoi tulweetap Karmel, ak koweek eng' yooto kwo Samaria.