2 LAITORINIK 18 - BUKUIT NE TILIIL Sireet ne Dutero Kanon

Hezekiah, laitoryatap Judah

¹ Ki toi kolaitoran Hezekiah weeriitap Ahaz laitoryatap Judah eng' kenyiitap somok kobooch kolaitoran Hosea weeriitap Elah eng' Israel.

² Ki po kenyiisyek tiptem ak muut ye ki tau kolaitorani, ak ki laitoran kenyiisyek tiptem ak sogool eng' Jerusalem. Ki kiguure kamennyi Abi cheptap Zekariah.

³ Ki yai ne myee eng' taitap Kamuktaindet ne Toroor, ko uu tugul che kiga yai Daudi kwandanyi.

⁴ Ki isto komoswek che torooreen, kibut tolochik ak koluul tolochigap Asera. Kitui ereneetap sugunwet ne kiyaei Musa, ne kiguure Nehustan. Amu kibeeljin nyamdutik piigap Israel agoi peetuusyechooto.

⁵ Ki imong' Kamuktaindet ne Toroor, Kamuktaindetap Israel. Ki mata kobiit age kogeny eng' laitorinik tugul che po Judah ne kergei ak ineendet, anan ko eng' che ki po tai eng' ineendet.

⁶ Amu ki namgei ak Kamuktaindet ne Toroor, ma masta eng' kasubetap Kamuktaindet ne Toroor, ago ki riip ng'atuutikyik, che ki ng'at `Kamuktaindet ne Toroor Musa.

⁷ Ak ki mi Kamuktaindet ne Toroor kobooto ineendet; kibor eng' komosta age tugul ne ki wo. Ki ingelelji laitoryatap Assyria, ma oot ineendet.

⁸ Ki par Philistiik kot koit Gaza ak kiwotosyekyik, kobooch teekseet ne kooi ne po riibiik agoi nganaseet ne ng'ootaat.

⁹ Ak eng' kenyiit ne po ang'wan ne po Hezekiah, ne ki kenyiitap tisap ne po Hoshea weeriitap Elah, laitoryatap Israel, kotogos Shalmaneser laitoryatap Assyria, kobookyi Samaria, ak koyiem.

¹⁰ Ak kingo pata kenyiisyek somogu, konam nganasanooto. Ki kinam Samaria eng' kenyiitap lo ne po Hezekiah, ne ki kenyiitap sogool ne po Hoshea laitoryatap Israel.

¹¹ Ki imut `laitoryatap Assyria Israel koba Assyria, ak ki wo konde Hala ak Habor, aineetap Gosan ak nganasoogap Medes.

¹² Amu ki ma kas iit kutitap Kamuktaindet ne Toroor Kamuktaindennywa, ago ki pistoe kayomisennyi, chooto tugul kiga ng'at Musa otwogindetap Kamuktaindet ne Toroor, ma cham kogas anan koyai.

Kobookyin `Sennacherib ne po Syria, Judah

¹³ Ki togos Sennacherib laitoryatap Assyria eng' kenyiitap taman ak ang'wan ne po laitoryat Hezekiah, kobar nganasook tugul che ng'ootaatiin che po Judah ak konam.

¹⁴ Ki iyookto Hezekiah laitoryatap Judah chiito kwo kaplaitoryatap Assyria eng' Lakish, koleenji, “Ki alel. Ui weektegei eng' oldanyu. Kiit age tugul ne igesenwo, alae.” Ak king'atyi laitoryatap Assyria Hezekiah, laitoryatap Judah keruutik eliphuusyek taman ak agenge che po fedha ak keruutik eliphuut agenge che po thahabu.

¹⁵ Ki igoochi `Hezekiah ineendet fedhaisyek tugul che ki mi eng' kootap Kamuktaindet ne Toroor, ak eng' konoraigap kootap laitoryat.

¹⁶ Ki inem Hezekiah eng' peetuusyechooto thahabu eng' kereiywegap kurgotik ak eng' tolochik che kiga koliige Hezekiah kootap Kamuktaindet ne Toroor, ak kogoochi laitoryatap Assyria.

¹⁷ Ki iyookto laitoryatap Assyria Tartan ak Rab-saris ak Rabsake eng' Lakish kobooto lugeet ne oo, koba kaplaitoryat Hezekiah eng' Jerusalem. Ak kitogosta ak koit Jerusalem. Ak kingo it, koba kotononie kererchetap tamboiyot ne po meto, ne mi ooreet ne oo ne po kooretap mwetindet.

¹⁸ Kingo kuur laitoryat, komong' Eliakim weeriitap Hilkiah, konyo ole mi pichooto, ne ki pou koot, kobooto Sebna siriindet, ak Joah weeriitap Asaph siriindetap tuguuk che piitu.

¹⁹ Ki leenji `Rabsake icheek, “Oleenji Hezekiah, ‘Kamwa ko uu ni laitoryat ne oo, laitoryatap Assyria, kole: Nee kamang'unoni imang'u?’

²⁰ Ing'alaali ile, mi kirwooget ak kimnateetap lugeet, ago ng'aleegap puch. Ara ng'oo ne imang'u, si ingelelja?

²¹ Keero, imang'u kirokto ne po tegandani chisot, nooto ko Misiri: ne ngo tiegei chii, kotoorei eunnyi, kwo oriit! Uu nooto Pharaoh laitoryatap Misiri eng' icheek tugul che imang'u ineendet. ”

²² Ago ngot oleenjo: “Kimang'u Kamuktaindet ne Toroor, Kamuktaindennyo,” koma ineendet, ne ki isto Hezekiah komoswekyik che torooreen ak kapkorosusyekyik, ak koleenji Judah ak Jerusalem, “Osae eng' taitap kaptisisyoni eng' Jerusalem”?

²³ Ara asoomin anyun nguno ale, igoochi kiptaiyandennyu laitoryatap Assyria kiit ne ibooru kayasyoet, si agoonin paraisisyek eliphuusyek aeng', ngot imuuchi eng' komostang'ung' inde piik che laanyei paraisisyechooto.

²⁴ Imuktoi ano anyun iweech togeetap kiptaiyat agenge ne ming'in eng' otwogik tugul che po kiptaiyandennyu, ak imang'u Misiri amu kariisyek ak piik che ketei paraisisyek?

²⁵ Ara anyun, kanyo koma kimi ak Kamuktaindet ne Toroor anyo abar oli, ang'em? Koleenjo Kamuktaindet ne Toroor, “Togoste par emoni, ak ing'em.”

²⁶ Koleenji anyun Eliakim weeriitap Hilkiah, ak Sebna, ak Joah, Rabsake, “Asoomin ale, ng'alaalji otwogiguk eng' kutitap Syria; amu kigase. Mating'alaalwech eng' kutitap Yahudik, kogasei piik che mi irimeet parak.”

²⁷ Ago ki leenji `Rabsake icheek, “Kagoyokwo kiptaiyandennyu anyo ye mi kiptaiyandeng'ung', ak oldang'ung', si kobiit amwa ng'aleechu? Tos ma iyookwo anyo ye mi pichu iburi eng' irimeet parak, si koam ng'atateekwak ak koe peekwak kobootok?”

²⁸ Yeityo kotonon Rabsake ak komwa eng' kutit ne oo eng' kutitap Yahudik ak kong'alaal kole, “Ogas okweek ng'olyootap laitoryat ne oo, laitoryatap Assyria!

²⁹ Kamwa laitoryat kole, Among' koberberak Hezekiah, amu ma imuuchi kosarwok eng' eunnyi.

³⁰ Among' kogoonok Hezekiah omang'u Kamuktaindet ne Toroor kole, Sarwech Kamuktaindet ne Toroor iman, ak ma kigoochin nganasanio laitoryatap Assyria.

³¹ Amat ogas ng'aleegap Hezekiah. Kamwa ko uu ni laitoryatap Assyria, kole: Oyai kaalyeet kobooto ak omong'u obwa ole ami. Yeityo koam chii tugul che po sabibukyik ak che po mogoywennyi ak koe chii tugul che po peegap keriingennyi,

³² agoi anyo amutak obe emet ne kergei ak emeng'wong', emetap peek ak divaik, emetap amitwogik ak mbareenigap sabibuk, emetap mwanigap mseituni ak kumyat, si kobiit osapche, amobegu. Amogas Hezekiah, ye igoigook, kole, ‘Sarwech Kamuktaindet ne Toroor.’

³³ Tos ki kobiit eng' kamuktaigap pororyosyek ne ki sar emennyi eng' eutap laitoryatap Assyria?

³⁴ Mi ano kamuktaigap Hamath, ak che po Arpad? Mi ano kamuktaigap Separbaim, Hena ak Iba? Tos ki sar chooto Samarik eng' eunnyu?

³⁵ Ng'oo eng' kamuktaik tugul che po emotinwek, che ki kosar emennywa eng' eunnyu, kot kosar `Kamuktaindet ne Toroor Jerusalem eng' eunnyu?”

³⁶ Ago ki siisyo piik, ma wolji ineendet ng'olyoo, amu kiga ng'at laitoryat kole, “Amat owolji kiy.”

³⁷ Ki pa anyun Eliakim weeriitap Hilkiah ne ki pou koot, ak Sebna, siriindet, kobooto Joah weeriitap Asaph siriindetap tuguuk che piitu, ole mi Hezekiah ko kagogereer ngoroikwak, kobwa komwachi ineendet ng'aleegap Rabsake.