2 LAITORINIK 17 - BUKUIT NE TILIIL Sireet ne Dutero Kanon

Hoshea laitoryatap Israel

¹ Ki toi kolaitoran Hoshea weeriitap Elah eng' Samaria eng' Israel, eng' kenyiitap taman ak aeng' kobooch kolaitoran Ahaz eng' Judah, ak ki laitoran kenyiisyek sogool.

² Ki yai yaityet eng' taitap Kamuktaindet ne Toroor, ago ma ko uu laitorinigap Israel che ki indoune ineendet.

³ Ki togos Shalmaneser laitoryatap Assyria kobargei ak ineendet, ak ki ek Hoshea otwogindennyi ak ki ipchi ineendet kagoochinoik.

⁴ Ak ki nai laitoryatap Assyria kole chaamsei Hoshea, amu kiga koyookto piik koba kap So laitoryatap Misiri, ama igoochi kagoochinet laitoryatap Assyria, ko uu ye ki cham koyaei kenyiit age tugul. Eng' nooto anyun koger ineendet laitoryatap Assyria, ak korat eng' korgoreet.

Koluuli `piigap Assyria Samaria

⁵ Yeityo kotogos laitoryatap Assyria konyo kowendot eng' emet komugul ak kitogosta kwo Samaria, ak kiyiem olooto kenyiisyek somok.

⁶ Ki nam laitoryatap Assyria Samaria, eng' kenyiitap sogool ne po Hoshea ak komut Israel koba Assyria. Ki imut icheek kwo konde komeny Hala ak Habor, eng' aineetap Gosan ak nganasoogap Medes.

⁷ Ki yaak ko uu nooto, amu kiga yachi piigap Israel tengekto Kamuktaindet ne Toroor Kamuktaindennywa, ne ki imutu icheek komong' eng' emetap Misiri, komang'une eutap Pharaoh laitoryatap Misiri, Kiga koywei icheek kanamonik,

⁸ ak kobendatee ng'atuutigap pororyosyek, che kigaon Kamuktaindet ne Toroor koba eng' taitap piigap Israel, ak eng' taitap laitorinigap Israel che kiga yai icheek.

⁹ Ki yai piigap Israel eng' ung'oot tuguuk che ma lititen koyachi Kamuktaindet ne Toroor Kamuktaindennywa, ak kiteekyigei komoswek che torooreen eng' nganasookwak tugul, kobooch teekseet ne kooi ne po riibiik kot koit nganaseet ne ng'ootaat.

¹⁰ Ki lumda tolochik ak Aserik eng' tulweet age tugul ne kooi, ak eng' kelutap keetit age tugul ne tuon.

¹¹ Kibeelee yooto nyamdutik eng' komoswek tugul che torooreen, ko uu ye kiyaei pororyosyek che ki oon Kamuktaindet ne Toroor eng' tainnywa. Ki yai tuguuk che yaacheen kotach Kamuktaindet ne Toroor konereech.

¹² Ki oot kanamonik, che ki kamwachi Kamuktaindet ne Toroor, koleenji, “Amat oyai kiito.”

¹³ Ago kibaoryan Kamuktaindet ne Toroor kora agobo Israel, ak agobo Judah, eng' maotyot age tugul, ak keerindet age tugul koleenji, “Oweege eng' ortinwekwok che yaacheen, ak oriip ng'atuutikyuk ak kayomisutikyuk, ko uu Ng'atuutyet tugul ne ki ang'at kwanisyekwok, ak che ki ayookwok eng' eunegap otwogikyuk maotik.”

¹⁴ Ago ma cham kogas kora, ago ki iuit kaatiswekwak ko uu kwanisyekwak, che ki ma iyan Kamuktaindet ne Toroor Kamuktaindennywa.

¹⁵ Ki eesyo ng'atuutikyik ak kayomisennyi ne ki iyomiskei ak kwanisyekwak, ak paornatosyekyik che kibaoryan agobo icheek. Ki isup icheek tuguuk che po puch ak ki ek puch. Ki isup pororyosyek che kiga yiem icheek, che kiga ng'at `Kamuktaindet ne Toroor icheek agobo pichooto, koleenji, “Amat oyai ko uu ye yaei icheeget.”

¹⁶ Ki meto icheek ng'atuutik tugul che po Kamuktaindet ne Toroor Kamuktaindennywa, ak koyachigei moek aeng' che po kanamonik che ki kitany ak ki yai Asera. Kigutung'ji icheek tuguuk tugul che po kipsengwet, ak koot Baal.

¹⁷ Ki igoito weeriikwak ak tiibiikwak kobun maat. Kiboisyee ng'oorset ak ponisosyek ak koaldagei koyai yaityet eng' taitap Kamuktaindet ne Toroor, kotach ineendet konereech.

¹⁸ Ki nereekyi anyun Kamuktaindet ne Toroor Israel miising', ak kong'eeto icheek eng' tainnyi. Ma ng'et agot agenge kobatee ooreetap Judah ineegei.

¹⁹ Ma riip agine Judah ng'atuutigap Kamuktaindet ne Toroor Kamuktaindennywa, ago kibendatee kaneetisyosyegap Israel che ki yai.

²⁰ Ki eesyo Kamuktaindet ne Toroor kesweek tugul che po Israel; ki inyaliil icheek ak konde eunegap piik che kiluul icheek, agoi kong'eeto icheek koba eng' tainnyi.

²¹ Ye kibut Israel eng' kootap Daudi, ko ki yai Jeroboam weeriitap Nebat koek laitoryat. Ki imaas Jeroboam Israel si ma isup Kamuktaindet ne Toroor, ak kogoochi icheek koyai tengekto ne oo.

²² Kibendate piigap Israel tengekwogik tugul che po Jeroboam che ki yai; ma istoegei,

²³ agoi kong'eeto Kamuktaindet ne Toroor Israel eng' tainnyi, ko uu ye ki mwa eng' otwogikyik tugul, maotik. Ki kiluul anyun Israel kimut eng' emennywa koba emetap Assyria agoi ra.

Komenyei `piigap Assyria Samaria

²⁴ Ki imut `laitoryatap Assyria piik eng' Babilon, Kuta, Aba, Hamath ak Separbaim ak konde icheek nganasoogap Samaria kogeer piigap Israel. Ki punji icheek Samaria ak komeny nganasookyik.

²⁵ Ye ki toi komeny olooto, ko ki ma koywei Kamuktaindet ne Toroor, ak ki iyookyi anyun `Kamuktaindet ne Toroor icheek ng'etuunyik, che kibar alak eng' icheek.

²⁶ Komwachi anyun laitoryatap Assyria, koleenji, “Ma ingen pororyosyechu koimutu inyoo inde nganasoogap Samaria kiit ne uu kamuktaindetap emonooto. Eng' nooto anyun, ko kogoyokyi icheek ng'etuunyik, ak parei icheek, amu ma ingen kiit ne uu kamuktaindetap emonooto.”

²⁷ Kong'at anyun laitoryatap Assyria kole, “Omut age eng' tisiik che ki omutu eng' olooto kwo komeny olooto ak koneet icheek agobo kiit ne uu Kiptaiyat Kamuktaindetap emonooto.”

²⁸ Ki nyo anyun age eng' tisiik che kiga kimut koba eng' Samaria, ak konyo komeny Bethel, ak koneet icheek ole kanyool kogonyitito Kamuktaindet ne Toroor.

²⁹ Ago kiga yai pororyet age tugul kanamonikwak, ak konde kooriigap komoswek che torooreen che kiga teech Samarik, pororyet age tugul eng' nganasookwak che ki menyei.

³⁰ Ki yai piigap Babilon Sukot-benot, koyai piigap Kut Nergal, koyai Hamath Asima,

³¹ ki yai Abik Nibas ak Tartak, ak ki peel Separbaik lagokwak kobeelji Adramelek ak Anamelek kanamonigap Separbaim.

³² Koiywei icheek anyun Kamuktaindet ne Toroor, ak kolewenjigei eng' pichooto tisiik che po komoswek che torooreen, che kieng'jin tiseiywek eng' kooriigap komoswek che torooreen.

³³ Ki iywei Kamuktaindet ne Toroor ago kiote kora kanamonikwak, ko uu ye ki iyweitoi pororyosyek eng' ole ki kiuune icheek kobwa.

³⁴ Yaei kora ko uu atebosyek che ki po tai agoi ra. Ma iywei `icheek Kamuktaindet ne Toroor, amaisubi kaneetisyosyekwak, anan ko katigonutikwak, anan ng'atuutyet, anan kayomiset, che ki ng'at `Kamuktaindet ne Toroor lagogap Jakobo, ne kiguure ineendet Israel.

³⁵ Ki yai Kamuktaindet ne Toroor koyomiset ak icheeget, ki ng'at icheek koleenji, “Amoiywei kanamonik, anan ong'uruukyi, anan oot, anan oeng'ji tiseiywot.

³⁶ Ago oiywei Kamuktaindet ne Toroor ne ki imutwak otogosu eng' emetap Misiri eng' kimnateet ne oo, eng' euut ne chuulaat, ong'uruukyi ineendet ak oeng'ji tiseiywot.

³⁷ Oriip oyai eng' peetuusyek tugul agoi, kaneetisyosyek ak katigonutik, ng'atuutyet ak kayomiset, che kisirwak. Amat oiywei kanamonik.

³⁸ Amat outye kayomiset ne ki kiyomiske kobootok, anan oiywei kanamonik.

³⁹ Ago oiywei Kamuktaindet ne Toroor Kamuktaindeng'wong'; ineendet ne sarwok eng' eunegap puunikwok tugul.”

⁴⁰ Ago ma kas, ki yai ko uu atebosyekwak che ki po tai.

⁴¹ Ki iywei anyun pororyosyechuuto Kamuktaindet ne Toroor, ak kootei kanamonikwak che ki kiwai. Ki yai ko uu nooto lagokwak, ak lagogap lagokwak, ki yai ko uu kwanisyekwak, agoi ra.