2 LAITORINIK 16 - BUKUIT NE TILIIL Sireet ne Dutero Kanon

Ahaz laitoryatap Judah

¹ Ki toi kolaitoran Ahaz weeriitap Jotham laitoryatap Judah eng' kenyiitap taman ak tisap kobooch kolaitoran Pekah weeriitap Remaliah.

² Ki po kenyiisyek tiptem Ahaz ye ki tau kolaitorani, ak ki laitoran kenyiisyek taman ak lo eng' Jerusalem. Ki ma yai ne myee eng' taitap Kamuktaindet ne Toroor Kamuktaindennyi, ko uu ye ki yai Daudi kwandanyi.

³ Ago ki wendotee ortinwegap laitorinigap Israel, ee, ak kogoito weeriinnyi kobun maat, ko uu tuguuk che kiwechei che po pororyosyek, che ki oon Kamuktaindet ne Toroor koba eng' taitap piigap Israel.

⁴ Ki enyei ineendet tiseiywek ak kobeelei nyamdutik eng' komoswek che torooreen, eng' tuloonook ak eng' kelutap keetit age tugul ne tuon.

⁵ Konyo anyun Jerusalem Rezin laitoryatap Syria kobooto Pekah weeriitap Remaliah kobookyi kobargei ak Jeusalem, kiyiem Ahaz, ago ki ma imuuch koterteer ineendet.

⁶ Eng' peetuusyechooto kogiweekyi Rezin laitoryatap Syria piigap Syria nganaseetap Elath, ak ki oon Yahudik eng' Elath. Ki pwa piigap Syria Elath ak komeny olooto agoi ra.

⁷ Ki iyookto anyun Ahaz piik koba kap Tiglat-peleser laitoryatap Assyria, koleenji, “Aa otwogindeng'ung' ak ko aa weeriing'ung'. Togosu, sarwo eng' eutap laitoryatap Syria ak eng' eutap laitoryatap Israel, che machei kobookyo.”

⁸ Ak ki nam Ahaz fedha ak thahabu che ki mi kootap Kamuktaindet ne Toroor, che ki mi konoraigap kootap laitoryat ak koyookyi laitoryatap Assyria koek kagoochinet.

⁹ Ki kasyi ineendet laitoryatap Assyria, ak kitogosta kobookyi Damasko. Ki nam ak koluul piigap yooto komut koba Kir ak kobar Rezin.

¹⁰ Ki wo Laitoryat Ahaz Damasko kotorookto Tiglat-peleser laitoryatap Assyria ak ki keer kaptisisyet ne ki mi Damasko. Ki iboorchi Laitoryat Ahaz Urija tisiindet kiit ne uu kaptisisyonooto, kergeindanyi ak ole uu musoknatennyi tugul.

¹¹ Ki teech Urija tisiindet kaptisisyet, ko uu tugul che kiga koboorchi Laitoryat Ahaz eng' Damasko, ak ki teech anyun kotar kotom koit Laitoryat Ahaz eng' Damasko.

¹² Kingo it laitoryat kobunu Damasko, kogeer kaptisisyet, koriikyi anyun laitoryat yooto, ak kogoitoe kagoochinoik.

¹³ Ki peel kagoochinennyi ne kibeelei ak kagoochinennyi ne po peek che ng'ootiin, ak koroong'ji kagoochinennyi ne kieei, ak koisee kaptisisyet korotiigap kagoochinoikyik che po kaalyeet.

¹⁴ Ki ip kaptisisyetap sugunwet ne ki mi taitap Kamuktaindet ne Toroor konyo eng' taitap koot, komong' eng' kwenutap kaptisisyennyi ak kootap Kamuktaindet ne Toroor, ak konde komostap murot kaataam ne po kaptisisyennyi.

¹⁵ Ki ng'at anyun Laitoryat Ahaz Urija tisiindet, koleenji, “Peel kagoochinet ne kibeelei ne po karon eng' kaptisisyet ne oo, ak kagoochinet ne po koskoleny ne po peek, ak kagoochinet ne kibeelei ne po laitoryat, ak kagoochinennyi ne po peek, kobooto kagoochinennywa ne kibeelei ne po piik tugul che po emet, ak kagoochinoikwak che po peek, ak kagoochinoikwak che kieei. Iise kaptisisyonooto korotiik tugul che po kagoochinennywa ne kibeelei, ak korotiik tugul che po tiseiywek. Ago kaptisisyetap sugunwet, kobunjino nooto si ateepse.”

¹⁶ Ki yai ko uu nooto Urija tisiindet, ko uu tugul che ki ng'at Laitoryat Ahaz.

¹⁷ Ki til Laitoryat Ahaz tabanwegap ng'echerok ak koisto taabeet ne oo eng' kwenutap tuguuchooto. Ki inem nyanjet ne ki mi paragutap eigap sugunonik, konyo ng'wony, ak konde paragutap koik che ki kitet.

¹⁸ Ki wal ooreet ne kerat ne po sabato ne kiga kiyai eng' ko, ak ole mandoe laitoryat eng' ole po saang', ki iweech kotokyi kootap Kamuktaindet ne Toroor amu laitoryatap Assyria.

¹⁹ Poisyonik che ng'etunotiin che ki yai Ahaz, tos ma siraatiin eng' kitabuutap ateptap peetuusyek ne po laitorinigap Judah?

²⁰ Ki ru Ahaz ak ki kitup kobooto kwanisyekyik eng' nganaseetap Daudi. Ki laitoran Hezekiah weeriinnyi kogeer ineendet.