2 LAITORINIK 15 - BUKUIT NE TILIIL Sireet ne Dutero Kanon

Azariah laitoryatap Judah

¹ Ki toi kolaitoran Azariah weeriitap Amasia laitoryatap Judah eng' kenyiitap tiptem ak tisap kobooch kolaitoran Jeroboam eng' Israel.

² Ki po kenyiisyek taman ak lo ye ki tau kolaitorani, ak ki laitoran kenyiisyek konom ak aeng' eng' Jerusalem. Ki kiguure kamet Jekolia ne po Jerusalem.

³ Ki yai ne myee eng' taitap Kamuktaindet ne Toroor, ko uu tugul che ki yai kwandanyi Amasia.

⁴ Ago ki ma kiisto komoswek che torooreen; kita koenyei piik tiseiywek ak kobeelei nyamdutik eng' komoswechooto.

⁵ Ki pir Kamuktaindet ne Toroor laitoryat, ak ki nam mogondosaik agoi peetuutap meennyi, ak ki meny koot ne itabaanat. Ki pou koot Jotham weeriitap laitoryat, korwookyin piik eng' emet.

⁶ Poisyonik che ng'etunotiin che po Azariah, ak tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

⁷ Ki ru Azariah kobooto kwanisyekyik ak ki kitup kobooto kwanisyekyik eng' nganaseetap Daudi. Ak ki laitoran Jotham weeriinnyi kogeer ineendet.

Zekariah laitoryatap Israel

⁸ Ki laitoran Zekariah weeriitap Jeroboam eng' Israel eng' Samaria arawek lo eng' kenyiitap sosom ak sisiit kobooch kolaitoran Azariah eng' Judah.

⁹ Ki yai yaityet eng' taitap Kamuktaindet ne Toroor, ko uu ye ki yai kwanisyekyik. Ma istoegei tengekwogigap Jeroboam weeriitap Nebat, che ki ibeete Israel si koyai tengekto.

¹⁰ Kichaam ineendet Shallum weeriitap Jabes, ak kikwer kobar ineendet eng' taitap piik, ak kolaitoran kogeer ineendet.

¹¹ Poisyonik che ng'etunotiin che po Zekariah, ko ki kisir eng' kitabuutap ateptap peetuusyek ne po laitorinigap Israel.

¹² Niito ko ng'olyoot ne ki mwachi Kamuktaindet ne Toroor Jehu, koleenji, “Tebee weeriiguk ng'echereetap laitornatet ne po Israel agoi ibinda ne po ang'wan.” Ak kiyaak ko uu nooto.

Shallum laitoryatap Israel

¹³ Ki toi kolaitoran Shallum weeriitap Jabes eng' kenyiitap sosom ak sogool kobooch kolaitoran Uzziah eng' Judah. Ak ki laitoran arawet agenge eng' Samaria.

¹⁴ Ki togosta Menaem weeriitap Gadi eng' Tirzah, ak ki it Samaria, ak kikwer kobar Shallum weeriitap Jabes eng' Samaria ak kolaitoran kogeer ineendet.

¹⁵ Poisyonik che ng'etunotiin che po Shallum, ak chaamsennyi ne ki yai, ko siraatiin eng' kitabuutap ateptap peetuusyek ne po laitorinigap Israel.

¹⁶ Ki par anyun Menaem Tiphsah, ak piik tugul che ki menyei yooto, ak kiwotosyekyik kobooch Tirzah, amu ma yaatyi ineendet. Kigereer kwonyiik tugul che tamonosyek che ki mi yooto.

Menaem laitoryatap Israel

¹⁷ Ki toi Menaem weeriitap Gadi kolaitoran eng' Israel eng' kenyiitap sosom ak sogool ne po Azariah laitoryatap Judah, ak ki laitoran kenyiisyek taman eng' Samaria.

¹⁸ Ki yai yaityet eng' taitap Kamuktaindet ne Toroor, ma istoegei tengekwogigap Jeroboam weeriitap Nebat eng' peetuusyekyik tugul, che ki ibeete Israel si koyai tengekto.

¹⁹ Kiseet Pul laitoryatap Assyria koleen kobar emet; ak ki igoochi Menaem Pul keruutik eliphuusyek sosom ak tisap che po fedha, si kobiit kotoret Pul ineendet kogimit laitornatet eng' eunnyi.

²⁰ Kirep Menaem fedhaisyek eng' Israel, che po piik tugul che eecheen che mogoreek, ki ibe chii tugul shekelisyek konom, fedha nusu kilo, si kobiit kogoochi laitoryatap Assyria. Ki week anyun laitoryatap Assyria, ma tebi eng' emonooto.

²¹ Poisyonik che ng'etunotiin che po Menaem, tuguuk tugul che ki yai, tos ma siraatiin eng' kitabuutap ateptap peetuusyek ne po laitorinigap Israel?

²² Ki ru Menaem kobooto kwanisyekyik. Ak ki laitoran Pekaia weeriinnyi kogeer ineendet.

Pekaia laitoryatap Israel

²³ Ki toi kolaitoran Pekaia weeriitap Menaem eng' Israel eng' Samaria, eng' kenyiitap konom ko po kolaitoran Azariah eng' Judah, ak ki laitoran kenyiisyek aeng'.

²⁴ Ki yai yaityet eng' taitap Kamuktaindet ne Toroor. Ma istoegei tengekwogigap Jeroboam weeriitap Nebat, che ki ibeete Israel si koyai tengekto.

²⁵ Kichaam ineendet Pekah weeriitap Remaliah, kiptaiyandennyi ne po lugeet, ak kobar eng' Samaria, eng' irimeetap kootap laitoryat kobooto Argob ak Arie, ak ki mi kobooto ineendet `piik konomu che po Gileadik. Ki par ak kolaitoran kogeer ineendet.

²⁶ Poisyonik che ng'etunotiin che po Pekaia, tuguuk tugul che ki yai, ko siraatiin eng' kitabuutap ateptap peetuusyek ne po laitorinigap Israel.

Pekah laitoryatap Israel

²⁷ Ki toi kolaitoran Pekah weeriitap Remaliah eng' Israel eng' Samaria, eng' kenyiitap konom ak aeng' kobooch kolaitoran Azariah eng' Judah, ak ki laitoran kenyiisyek tiptem.

²⁸ Ki yai yaityet eng' taitap Kamuktaindet ne Toroor. Ma istoegei ineendet tengekwogigap Jeroboam weeriitap Nebat, che ki ibeete Israel si koyai tengekto.

²⁹ Ki nyo Tiglat-peleser laitoryatap Assyria eng' peetuusyegap Pekah laitoryatap Israel ak ki nam Ijon, Abel ne po Beth-maaka, Janoah, Kedesh, Hasor, kobooto Gilead, Galilaya, ak emet tugul ne po Naphtali ak kiluul icheek komut koba Assyria.

³⁰ Kichaam Hoshea weeriitap Elah Pekah weeriitap Remaliah, ak kibar kobar ineendet ak kolaitoran kogeer ineendet, eng' kenyiitap tiptem kobooch kolaitoran Jotham weeriitap Uzziah.

³¹ Poisyonik che ng'etunotiin che po Pekah, tuguuk tugul che ki yai, ko siraatiin eng' kitabuutap ateptap peetuusyek ne po laitorinigap Israel.

Jotham laitoryatap Judah

³² Ki toi kolaitoran Jotham weeriitap Uzziah laitoryatap Judah eng' kenyiitap aeng' kobooch kolaitoran Pekah weeriitap Remaliah eng' Israel.

³³ Ki po kenyiisyek tiptem ak muut ye ki tau kolaitorani. Ki laitoran kenyiisyek taman ak lo eng' Jerusalem. Ki kiguure kamennyi Jerusha cheptap Zadok.

³⁴ Ki yai ne myee eng' taitap Kamuktaindet ne Toroor, ki yai ko uu tugul che kiga yai kwandanyi Uzziah.

³⁵ Agos ma ki isto komoswek che torooreen; kita koenyei piik tiseiywek ak kobeelei nyamdutik eng' komoswek che torooreen. Ki teech ineendet ormariichetap meto ne po kootap Kamuktaindet ne Toroor.

³⁶ Poisyonik che ng'etunotiin che po Jotham, tuguuk tugul che ki yai, ko tos ma siraatiin eng' kitabuutap ateptap peetuusyek che po laitorinigap Judah?

³⁷ Ki toi Kamuktaindet ne Toroor eng' peetuusyechooto koyookyi Rezin laitoryatap Syria ak Pekah weeriitap Remaliah, kobargei ak Judah.

³⁸ Ki ru Jotham ak kwanisyekyik ak ki kitup eng' nganaseetap Daudi kwandanyi. Ak ki laitoran Ahaz weeriinnyi kogeer ineendet.