2 LAITORINIK 14 - BUKUIT NE TILIIL Sireet ne Dutero Kanon

Amasia, laitoryatap Judah

¹ Ki toi kolaitoran Amasia weeriitap Joash laitoryatap Judah eng' kenyiitap aeng' ne po Joash weeriitap Jehoahas laitoryatap Israel.

² Ki po kenyiisyek tiptem ak muut ye ki tau kolaitorani, ak ki laitoran kenyiisyek tiptem ak sogool eng' Jerusalem. Ki kiguure kamet Jeoadin ne po Jerusalem.

³ Ki yai ne myee eng' taitap Kamuktaindet ne Toroor, ago ma igei Daudi kwandanyi. Ki yai ko uu tugul che kiga yai kwandanyi Joash.

⁴ Ago ki ma kiisto komoswek che torooreen. Kita koenyei piik tiseiywek ak kobeelei nyamdutik eng' komoswek che torooreen.

⁵ Ak ye ki kata ki kimiit pounateet eng' eunnyi, kobar otwogikyik che kiga par laitoryat, nooto kwandanyi.

⁶ Ago ma par lagogap rumichooto, ko uu ye ki kisir eng' bukuitap Ng'atuutyetap Musa, ko uu ye ki ng'at Kamuktaindet ne Toroor, kole: “Ma kibarei kwanisyek amu lagok, anan kebar lagok amu kwanisyek; ago ki parei chii age tugul agobo tengektanyi.”

⁷ Ki par piigap Edom eliphuusyek taman eng' Atebweetap Munyuk, ak konam Shelah eng' lugeet, ak koguuree kainennyi Joktel agoi ra.

⁸ Kiyookto anyun Amasia piik koba kap Jeoas, weeriitap Jehoahas weeriitap Jehu, laitoryatap Israel, koleenji, “Nyoo ketuiye kegeerge togoch.”

⁹ Ago ki iyookyi piik Jehoas laitoryatap Israel Amasia laitoryatap Judah koleenji, “Ki iyookto ng'olyoot kateet ne rutei piich ne ki mi Lebanon koyookyi tarakwet ne ki mi Lebanon, koleenji, ‘Igoochi cheptong'ung' weeriinnyu kotun.’ Ak kisiirto tyondo ne po timiin ne ki mi Lebanon ak kotyech katanooto rutei piich.

¹⁰ Ki ibar iman Edom, ak ki kotoroorin muguleldang'ung'. Paibaitune nooto anyun, ak itebee koong'ung'! Amu nee si icheeng'jigei nyalilda, si ibut, inyee kobooto Judah?”

¹¹ Ago ma cham Amasia kogas. Kotogosta anyun Jehoas laitoryatap Israel; ak kigeergei ineendet ak Amasia laitoryatap Judah togoch eng' Beth-shemesh ne po Judah.

¹² Ki kiterteer Judah eng' taitap Israel, ak ki mwei chii tugul kwo emainnyi.

¹³ Ki imut Jehoas laitoryatap Israel Amasia laitoryatap Judah, weeriitap Jehoas weeriitap Ahasia, eng' Beth-shemesh, ak koit Jerusalem, ak kobut irimeet ne po Jerusalem kobooch ormariichetap Ephraim agoi ormariichetap luuita, ye neegit mitainik pogol aeng'.

¹⁴ Ki ip thahabu tugul ak fedha, kobooto tuguuk tugul che ki mi kootap Kamuktaindet ne Toroor, ak konoraik che ki mi kootap laitoryat, kobooto luulenik ak icheek, yeityo koweek kwo Samaria.

¹⁵ Poisyonik che ng'etunotiin che po Jehoas che ki yai, kimnateennyi, ak ole kibartagei ak Amasia laitoryatap Judah, ko tos ma siraatiin eng' kitabuutap ateptap peetuusyek ne po laitorinigap Israel?

¹⁶ Ki ru Jehoas kobooto kwanisyekyik ak ki kitup eng' Samaria kobooto laitorinigap Israel. Ak ki laitoran Jeroboam weeriinnyi kogeer ineendet.

Meetap Amasia laitoryatap Judah

¹⁷ Kita kosap Amasia weeriitap Jehoas laitoryatap Judah kenyiisyek taman ak muut kingo pata meetap Jehoas weeriitap Jehoahas laitoryatap Israel.

¹⁸ Poisyonik che ng'etunotiin che po Amasia, ko tos ma siraatiin eng' kitabuutap ateptap peetuusyek ne po laitorinigap Judah?

¹⁹ Kichaam `icheeget ineendet eng' Jerusalem; ak ki mwei kwo Lakish, ago ki iyookto icheek piik koosup ineendet koba Lakish, ak kobar ineendet eng' olooto.

²⁰ Kilaune ineendet paraisisyek ak ki kitupchi Jerusalem kobooto kwanisyekyik eng' nganaseetap Daudi.

²¹ Ki nam piik tugul che po Judah Azariah, ne ki po kenyiisyek taman ak lo, ak koyai ineendet koek laitoryat kogeer kwandanyi Amasia.

²² Ki teech Elath, koweekyi Judah ko kagoru laitoryat kobooto kwanisyekyik.

Jeroboam ne po aeng' laitoryatap Israel

²³ Ki toi kolaitoran Jeroboam weeriitap Joash laitoryatap Israel eng' Samaria, eng' kenyiitap taman ak muut kobooch kolaitoran Amasia weeriitap Joash eng' Judah, ak ki laitoran kenyiisyek artam ak agenge.

²⁴ Ki yai yaityet eng' taitap Kamuktaindet ne Toroor ak ma istoegei tengekwogik tugul che po Jeroboam weeriitap Nebat, che ki ibeete Israel si koyai tengekto.

²⁵ Ki weech ineendet kiwotetap Israel kobooch ye kibunei kebendi Lebo-hamath agoi nyanjetap Arabah, ko uu ng'olyootap Kamuktaindet ne Toroor, Kamuktaindetap Israel, ne ki mwa eng' otwogindennyi Jona maotyot, weeriitap Amitai, ne ki po Gat-heper.

²⁶ Amu ki keer Kamuktaindet ne Toroor nyalildap Israel, kole ng'waan kot, amu ki ma komi chii ne kiga kiger anan ko ne ityagat; ki ma komi toretindet Israel.

²⁷ Ak ma mwa Kamuktaindet ne Toroor kole, ibuktoi kainetap Israel eng' kurereetap kipsengwet, ago ki sar icheek eng' Jeroboam weeriitap Joash.

²⁸ Poisyonik tugul che po Jeroboam, ak tuguuk tugul che ki yai, kimnateennyi, ole kiyaita lugeet, ak ole ki iweegundo Damasko ak Hamath ne ki po Judah, koweekyi Israel, ko tos ma siraatiin eng' kitabuutap ateptap peetuusyek ne po laitorinigap Israel?

²⁹ Ki ru Jeroboam kobooto kwanisyekyik, chooto ko laitorinigap Israel. Ak ki laitoran Zekariah weeriinnyi kogeer ineendet.