2 LAITORINIK 13 - BUKUIT NE TILIIL Sireet ne Dutero Kanon

Jehoahas laitoryatap Israel

¹ Ki toi kolaitoran Jehoahas weeriitap Jehu eng' Israel eng' Samaria, eng' kenyiitap tiptem ak somok, ne po Joash weeriitap Ahasia laitoryatap Judah, ak ki laitoran kenyiisyek taman ak tisap.

² Ki yai yaityet eng' taitap Kamuktaindet ne Toroor, ak koosup tengekwogigap Jeroboam weeriitap Nebat, che ki ibeete Israel si koyai tengekto. Ma istoegei ineendet tengekwogichooto.

³ Ak kinereech kot Kamuktaindet ne Toroor agobo Israel, ki inde icheek eutap Hazael laitoryatap Syria ak ne po eutap Ben-Hadad weeriitap Hazael, peetuusyek tugul.

⁴ Ki riirchi Jehoahas Kamuktaindet ne Toroor ak ki kasyi `Kamuktaindet ne Toroor ineendet, amu ki keer nyalildap Israel, ole ki inyalildoi laitoryatap Syria.

⁵ (Ki igoochi Kamuktaindet ne Toroor Israel yetindet, kot komanda eng' eutap piigap Syria. Ara ki meny piigap Israel emaisyekwak, ko uu eng' tai.

⁶ Ago ma istoegei tengekwogigap kootap Jeroboam, che ki ibeete Israel si koyai tengekto, kibendotee tengekwogichooto. Ki tebee Samaria Asera agine.)

⁷ Amu ma ituukyi kiy piigap Jehoahas, kobatee piik konom che ketei paraisisyek, kariisyek taman ak piik eliphuusyek taman che punei keelyek. Kiga kobar laitoryatap Syria icheek, ak koyai koigei meteteek che mi ole kiboorsee.

⁸ Ak poisyonik che ng'etunotiin che po Jehoahas, ak tuguuk tugul che ki yai, ak kimnateennyi, ko tos ma siraatiin eng' kitabuutap ateptap peetuusyek ne po laitorinigap Israel?

⁹ Ki ru Jehoahas kobooto kwanisyekyik ak ki kitup ineendet eng' Samaria. Ki laitoran Joash weeriinnyi kogeer ineendet.

Joash, laitoryatap Israel

¹⁰ Ki toi kolaitoran Jehoas weeriitap Jehoahas eng' Israel eng' Samaria, eng' kenyiitap sosom ak tisap ne po Joash laitoryatap Judah, ak ki laitoran kenyiisyek taman ak lo.

¹¹ Ki yai yaityet eng' taitap Kamuktaindet ne Toroor, ma istoegei tengekwogik tugul che po Jeroboam weeriitap Nebat, che ki ibeete Israel si koyai tengekto; ago kiwendate tengekwogichooto.

¹² Poisyonik che ng'etunotiin che po Joash, tuguuk tugul che ki yai, ak kimnateennyi ne kibaregei ak Amasia laitoryatap Judah, ko tos ma siraatiin eng' kitabuutap ateptap peetuusyek ne po laitorinigap Israel?

¹³ Ki ru Joash kobooto kwanisyekyik, ak ki tebee Jeroboam ng'echerennyi ne po laitornatet. Ki kitupchi Joash Samaria kobooto laitorinigap Israel.

Meetap Elisha

¹⁴ Ki nam Elisha myando ne kibar ineendet. Ki choorgei Joash laitoryatap Israel konyo ole mi ineendet ak koriir agobo ineendet ak kole, “Abba! Abba! Kariitap Israel ak piik che laanyei paraisisyekyik!”

¹⁵ Ki leenji Elisha ineendet, “Nam kwanget ak kipchabonik!” Konam anyun ineendet kwanget ak kipchabonik.

¹⁶ Ki leenji laitoryatap Israel, “Kersach” ak kigersach. Ak ki igonoor Elisha eunekyik eunegap laitoryat.

¹⁷ Ki leenji, “Yaat tirisyet ne tokyingei kong'asiis”, ak ki yaat. Ak ki le Elisha, “Mwokte” ak kimwokto. Ak ki mwa Elisha kole, “Kipchabetap Kamuktaindet ne Toroor ne po katerteeret, kipchabetap katerteeret ne iterteere piigap Syria. Ibare piigap Syria eng' Apek, kot igeesu icheek.”

¹⁸ Ki leenji, “Nam kipchabonik”, ak ki nam. Ak ki leenji laitoryatap Israel, “Kwer ng'wony.” Ki kwer konyil somok ak kobagaach.

¹⁹ Ki nereekyi `chiitap Kamuktaindet ineendet, koleenji, “Kaganyooljin ikwer konyil muut anan ko lo, ko kata ibare piigap Syria kot igeesu. Ago nguno ibare piigap Syria konyil somok kityo.”

²⁰ Kime Elisha ak ki kitup ineendet. Ak ki ibok lugosyegap Moabik kobwa emet eng' taunetap kenyiit.

²¹ Ak ki keer lugeet ye ki tubei icheek chiito, ak ki wiirchi chiichooto kereritap Elisha. Kingo tiiny chiichooto kawegap Elisha, kosap ak kong'eet.

Meetap Hasael ne po Syria

²² Ki inyaliil Hazael laitoryatap Syria Israel eng' peetuusyek tugul che po Jehoahas.

²³ Ago ki iboorchi Kamuktaindet ne Toroor myeeindonyi icheek, koriiree ak kogonyit icheek, amu kayomisennyi ne ki iyomiskei ak Abraham, Isak ak Jakobo. Ma cham kobar anan koon icheek eng' tainnyi agoi rani.

²⁴ Kome anyun Hazael laitoryatap Syria, ak ki laitoran Ben-Hadad weeriinnyi kogeer ineendet.

²⁵ Ki iweek anyun Jehoas weeriitap Jehoahas nganasook eng' eutap Ben-Hadad weeriitap Hazael che kiga ip eng' eutap Jehoahas kwandanyi eng' lugeet. Ki iterteer Joash ineendet konyil somok, ak ki iweech nganasoogap Israel.