2 LAITORINIK 12 - BUKUIT NE TILIIL Sireet ne Dutero Kanon

Koteechei Jehoas ole ki kobutok eng' Hekaluut

¹ Ki toi kolaitoran Jehoas eng' kenyiitap tisap ne po Jehu, ak ki laitoran kenyiisyek artam eng' Jerusalem. Kainetap kamennyi ko ki Sibia ne po Beer-sheba.

² Ki yai Jehoas ne myee eng' taitap Kamuktaindet ne Toroor eng' peetuusyekyik tugul koneeti Jehoiada tisiindet ineendet.

³ Ago ki ma kiisto komoswek che torooreen; kita koenyei piik tiseiywek ak kobeelei nyamdutik eng' komoswek che torooreen.

⁴ Ki leenji Jehoas tisiik, “Ingoip tisiik fedhaisyek tugul che po tuguuk che itabaanatiin che ki ibu kobwa kootap Kamuktaindet ne Toroor, ak fedhaisyek che kiboisyee, fedhaisyek che po piik che tee che yamei koitetap chii age tugul, ak fedhaisyek tugul che kaibwaat chii eng' muguleldanyi kole koip kobwa kootap Kamuktaindet ne Toroor,

⁵ koip tisiichooto, tisiindet age tugul eng' chiito ne ingenge; si koteech ole ki kobutok eng' koot, komosta age tugul ole mi ole putot.”

⁶ Ago kingo itei kenyiitap tiptem ak somok ne po Laitoryat Jehoas, ko ki tomo koteech tisiik ole kiga kobutok eng' koot.

⁷ Koguur anyun Laitoryat Jehoas tisiindet Jehoiada, kobooto tisiik alak, ak koleenji icheek, “Amu nee si moteeche ole ki kobutok eng' koot? Nooto anyun, amata oip fedhaisyek eng' che ongenge, ogoite keyae ole ki kobutok eng' koot.”

⁸ Ki iyan tisiik kole ma koibei fedhaisyek eng' piik, ama teechei ole ki kobutok eng' koot.

⁹ Ago ki nam Jehoiada moinget ak korut kereiywondennyi, ak konde taban eng' kaptisisyet, eng' komostap tai kebendi ko eng' kootap Kamuktaindet ne Toroor. Ki inde moingonooto tisiik che ki riibei kurgeet, robiinik tugul che ki kiibu kobwa kootap Kamuktaindet ne Toroor.

¹⁰ Kingo keer kole kagochang'a robiinik eng' moinget, kotogos siriindetap laitoryat ak tisiindet ne oo konde ratuutik ak koiit kogeer kiit ne tee fedhaisyechooto kimi kootap Kamuktaindet ne Toroor.

¹¹ Yeityo kigoochi fedhaisyechooto kiga kigaman, piik che poisyei, che riibei kootap Kamuktaindet ne Toroor, si kopchechi musogik ak teegik, che kiyaei kootap Kamuktaindet ne Toroor,

¹² piik che teekse koik, che waei koik. Ki al icheek pagoinik ak koik che kweaotin che kiteege ole kiga kobutok eng' kootap Kamuktaindet ne Toroor, ak tuguuk tugul che ki kiip keteege koot.

¹³ Ago robiinik che ki kiip kobwa kootap Kamuktaindet ne Toroor koma kiboisyee ki ale kigombogap fedha, magasisyek che kitile ole lalei eng' taisyek, taabook, igondisyek, tereenik alak tugul che po thahabu anan ko tereenigap fedha;

¹⁴ amu ki igoochi chooto icheek che ki yai poisyet, ak koteege kootap Kamuktaindet ne Toroor.

¹⁵ Ago ma iit kobooto pichooto, ki igoochin robiinik konam si kogoochi piik che yaei poisyet, amu kiboisyee imanda.

¹⁶ Ki ma keibu kobwa kootap Kamuktaindet ne Toroor robiinik che po kagoochinoigap chalwogik, ak che po kagoochinoigap tengekto; ki po tisiik.

¹⁷ Ki wo kotogosta anyun Hazael laitoryatap Syria kwo kobargei ak Gath ak ki nam nganasanooto. Kitokyigei Hazael kobookyi Jerusalem.

¹⁸ Ki nam Jehoas laitoryatap Judah tuguuk tugul che itabaanatiin che kiga itabaan Jehoshaphat, ak Jehoram, ak Ahasia, kwanisyekyik, laitorinigap Judah, ak tuguukyik che itabaanatiin, ak thahabusyek tugul che ki mi konoraigap kootap Kamuktaindet ne Toroor, ak che po kootap laitoryat, ak koyookyi Hazael laitoryatap Syria: ak ki wo anyun kometo Jerusalem.

¹⁹ Poisyonik che ng'etunotiin che po Joash, ak tuguuk tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah?

²⁰ Ki ng'eetyo otwogikyik kochaam ineendet, ak ki par Joash eng' kootap Milo, eng' ooreet ne choortoegei Sila.

²¹ Ki par ineendet otwogikyik Josakar weeriitap Simeat, ak Jeosabad weeriitap Somer. Kime ak kitup ineendet kobooto kwanisyekyik eng' nganaseetap Daudi. Ki laitoran Amasia weeriinnyi kogeer ineendet.