2 LAITORINIK 11 - BUKUIT NE TILIIL Sireet ne Dutero Kanon

Korebei Athaliah laitornatet eng' Judah

¹ Kingo keer Athaliah kametap Ahasia kole kagome weeriinnyi, kong'eet ak kobar anyun iyoteet tugul ne po kaplaitoryat.

² Ago kichor Jeoseba cheptap Laitoryat Joram, chepkametap Ahasia, Joash weeriitap Ahasia, ak komut ineendet ak cheplakwet eng' ole mi weeriigap laitoryat che ki kibarei, kwo koung'e icheek koot oriit ne kirue, si ma nyoor Athaliah, ak kobar.

³ Ki tebi ak ineendet, kounyegei eng' kootap Kamuktaindet ne Toroor kenyiisyek lo. Ak ki laitoran Athaliah koboi emet.

⁴ Ki iyookto `Jehoiada chiito eng' kenyiitap tisap kwo koguur kiptainik che pou pogolwogigap Kariitik, ak che po riibiik, koguur icheek kobwa ole mi ineendet eng' kootap Kamuktaindet ne Toroor. Ki iyomiskei kobooto icheek, ak koleenji koyasyo eng' kootap Kamuktaindet ne Toroor, yeityo koboorchi icheek weeriitap laitoryat.

⁵ Ki ng'at icheek koleenji, “Ni kiit ne oyae: Egu kebeberta agenge eng' somok eng' okweek, che obwane sabato, riibiigap riipseet eng' kootap laitoryat.

⁶ Ingotebee kebeberta agenge eng' somok, ormariichetap Sur. Kotebee kebeberta agenge eng' somok patetap riibiik. Oriibe anyun riipseetap koot ko uu nooto, ak oegu ng'ootweet.

⁷ Ak riipsei kweanaik aeng'u eng' okweek, tugul che omandoi eng' sabato, eng' riipseetap kootap Kamuktaindet ne Toroor, koyiemei laitoryat.

⁸ Oyieme laitoryat, kotinyei chii tugul kariikyik eng' eunnyi. Ineendet ne nyoonei ole mi pichooto, kebarei. Otebi ak laitoryat ye wendi komandoi saang', ak ye nyoonei ko.”

⁹ Ki yai anyun kiptainik che pou pogolwogik ko uu tuguuk tugul che ki ng'at Jehoiada tisiindet. Ki imut chii age tugul piikyik, che kibwanei eng' sabato, kobooto che kimandoi eng' sabato. Ki pwa ole mi Jehoiada tisiindet.

¹⁰ Ki igoochi tisiindet kiptainik che pou pogolwogik, ng'otwek ak long'onik che ki po Laitoryat Daudi, che ki mi kootap Kamuktaindet ne Toroor.

¹¹ Ki tonondos riibiik, kotinyei chii tugul kariik eng' eunnyi, kong'etee komostap tai ne po koot agoi komostap kaataam, kobun ole neegitee kaptisisyet ak ole neegitee koot, koyiem laitoryat.

¹² Komut anyun weeriitap laitoryat komong', ak kolaakyi naaryeetap laitornatet, ak kogoochi paornateet. Ki yai ineendet koek laitoryat, ak koiil ineendet, yeityo koraprap eunekwak ak kole, “Ingosap keny laitoryat!”

¹³ Kingo kas Athaliah polatetap riibiik ak piik, konyo ole ki mi piik eng' kootap Kamuktaindet ne Toroor.

¹⁴ Ak ki keer, kitononi laitoryat eng' ye neegitee toloita, ko uu ye ki piteet, ak kimi kiptainik ak piik che kuutei iryagook ole neegitee laitoryat. Kiboiboitu piik tugul che po emet ak koguut iryagook. Kogereer anyun Athaliah ngoroikyik ak kowaach kole, “Chaamset! Chaamset!”

¹⁵ Ki ng'at `Jehoiada tisiindet kiptainigap pogolwogik che pou lugeet, koleenji, “Omaande ineendet kobun kwenutap piik; ak kibarei eng' rotwetap chok, chiito ne isubi ineendet. Amat kebar ineendet eng' kootap Kamuktaindet ne Toroor.”

¹⁶ Koistochigei anyun ineendet; ak ki pun Athaliah ooreet ne punei paraisisyek kobendi kootap laitoryat, ak ki kibarchi ineendet yooto.

Tuguuk che ki wal Jehoiada

¹⁷ Ki yai Jehoiada arorutyet eng' kwenutap Kamuktaindet ne Toroor ak laitoryat ak piik kole egu icheek piigap Kamuktaindet ne Toroor; ak eng' kwenutap laitoryat agine ak piik.

¹⁸ Ki pa piik tugul che po emet kootap Baal ak kobut koluul. Kibut kapkorosusyekyik ak kanamonikyik kotonaton inne, ak kobar Matan tisiindetap Baal eng' taitap kapkorosusyek. Ak ki lewen tisiindet pounik koriip kootap Kamuktaindet ne Toroor.

¹⁹ Ki imut kiptainik che po pogolwogik, ak Kariitik, ak riibiik, piik tugul che po emet, kobooto laitoryat kochoorgei eng' kootap Kamuktaindet ne Toroor, kobun ooreetap ormariichetap riibiik agoi kootap laitoryat. Ak ki tebee ng'echereetap pounateet ne po laitorinik.

²⁰ Kiboiboitu anyun piik tugul che po emet, ak ki siis nganaseet. Ak ki par Athaliah eng' rotwetap chok eng' kootap laitoryat.

²¹ Ki toi kolaitoran Jehoas ko po kenyiisyek tisap.