2 LAITORINIK 10 - BUKUIT NE TILIIL Sireet ne Dutero Kanon

Kebarei kootap Ahab kogeskei

¹ Ki tinyei Ahab weeriik tamanwogik tisap eng' Samaria. Ki sir anyun Jehu paronok ak koyookto koba Samaria, koyookyi pounigap Jezreel, poisyek ak che kibaei weeriigap Ahab ko mengeechen, koleenji:

² “Ne po koitu oldang'wong' parwaani, amu mi weeriigap kiptaiyandeng'wong' kobootok, ak otinye kariisyek ak paraisisyek, nganaseet ne ng'ootaat ak kariik che po lugeet:

³ olewen ne myee, ne yamegei eng' weeriigap kiptaiyandeng'wong', onde ineendet kotebee ng'echereetap laitornatet ne po kwandanyi, ak oyai lugeet agobo kootap kiptaiyandeng'wong'.”

⁴ Ago ki aragenso miising', ak kole, “Tos ma tononso laitorinik aeng'u eng' tainnyi! Kitonondoi ano acheek?”

⁵ Ki iyookyi ineendet ne ki pou koot komugul, ne ki pou nganaseet, kobooto poisyek ak icheek, ak che kibaei lagochooto, koyookyi ng'olyoot Jehu, koleenji, “Ki otwogiguk ak kiyae tuguuk tugul che imwaiwech. Ma kiyae chiito age koek laitoryat. Yai kiit ne igeere ile myee.”

⁶ Kosirchi anyun icheek kogeny parweet, ne po aeng', koleenji, “Ngot omi komostanyu, ak ogase iit ng'aleekyuk, otil metowegap pichooto weeriigap kiptaiyandeng'wong', ak obwa ole ami eng' Jezreel, mutai koteni asiis.” Ki mi weeriichooto po laitoryat tamanwogik tisabu kobooto piik che taagunotiin che po nganaseet, che kibaei icheek ko mengeechen.

⁷ Kingo it parweet oldanywa, konam weeriigap laitoryat ak kobar, piik tamanwogik tisap ak konde metowekwak kitongok, ak koyooktoochi ineendet eng' Jezreel.

⁸ Ki nyo chiito ne ki kiyogu ak komwachi ineendet koleenji, “Kageip metowegap weeriigap laitoryat.” Ak ki le, “Onde ng'wony eng' ole kibunei kebendi nganaseet, koek karurugutik aeng', agoi karon.”

⁹ Ki eng' karon, komanda ak kotonon ak koleenji piik tugul, “Oo po iman, ogeero, ki achaam kiptaiyandennyu ak abar ineendet. Ago ng'oo ne kobar chu tugul?

¹⁰ Onai anyun nguno ole ma petei kiy eng' ng'olyootap Kamuktaindet ne Toroor, ne ki mwa Kamuktaindet ne Toroor agobo kootap Ahab. Kagoyai Kamuktaindet ne Toroor kiit ne ki mwa eng' otwogindennyi Elijah.”

¹¹ Ki par anyun Jehu tugul che ki kong'et che po kootap Ahab eng' Jezreel, kobooto piikyik tugul che eecheen, choronokyik ak tisiikyik, ma ituukyi ineendet chii agot agenge.

Kebarei kootap Ahasia

¹² Ki ng'eet anyun Jehu kwo Samaria. Ak ye kimi koot ne kitile koroorigap keechiirek, ne po mestoweek, eng' ooreet,

¹³ kotuiye Jehu che tupcho ak Ahasia laitoryatap Judah. ki teebee icheek koleenji, “Oo ng'oo?” Ak ki wol kole, “Kitupchosyegap Ahasia. Kichoortoigei kigati lagogap laitoryat ak lagogap kwondap laitoryat.”

¹⁴ Ki mwa ineendet kole, “Onam!” Ki nam anyun icheek ak kobar eng' keriinget ne po koot ne kitilisye, piik artam ak aeng'. Ma pagaakta agot agenge eng' icheek.

¹⁵ Ye kingo kakwo eng' yooto, kotuiyo ak Jehonadap weeriitap Regap kotorogu ineendet. Ki igat ineendet ak koleenji, “Myee muguleldang'ung', ko uu ye myee muguleldanyu eng' neng'ung'?” Ak ki wol Jehonadap kole, “Ee myee.” Kole Jehu “Ngot ko uu nooto, igoono euut.” Ak ki igoochi ineendet euut; ak ki nam Jehu kwo chepkichutit oriit.

¹⁶ Ki mwa kole, “Ngebe tuwai, igeer kagiilennyu pogei agobo Kamuktaindet ne Toroor.” Kogoochi anyun kobun chepkichutinnyi.

¹⁷ Kingo it Samaria, kobar piik tugul che kiga ng'etyi Ahab eng' Samaria, agoi kogees ineendet ko uu ng'olyootap Kamuktaindet ne Toroor, ne ki mwachi Elijah.

Kobarei Jehu tisiigap Baal

¹⁸ Ki iyum anyun Jehu piik tugul ak koleenji, “Ki oot Ahab Baal kitigin; ago otei Jehu miising'!

¹⁹ Oguurwa anyun maotik tugul che po Baal, piik tugul che saaei ineendet ak tisiikyik tugul, among' kong'et agot agenge, amu atinye tiseiywot ne oo ne aeng'jini Baal. Chii age tugul ne ng'etu, koma sabei.” Ago ki yai Jehu ko uu nooto kong'aalsei, komachei kobar piik che saaei Baal.

²⁰ Ki le Jehu, “Ong'at tuiyetap Baal ne po kaming'inetapkei!”

²¹ Ki iyookto Jehu piik koba komoswek tugul eng' Israel keguur tugul che saaei Baal, ak ma ng'et chii ne ma nyo. Ki pwa tugul ak ki nyi kootap Baal kong'etee komosi agoi komosin.

²² Ki leenji chiito ne riibei ole kigonoree ngoroik, “Inemji ngoroik piik tugul che saaei Baal.” Ak ki inemji icheek ngoroik.

²³ Ki pa kootap Baal, Jehu ak Jehonadap weeriitap Regap; ak koleenji Jehu piik che ki saaei Baal, “Ocheeng' ogeer ngo mi yu kobootok chii age tugul eng' otwogigap Kamuktaindet ne Toroor, kobatee piik che saaei Baal icheegei.”

²⁴ Ara ki pa ko kogoito tiseiywek ak kagoochinoik che kibeelei. Kiga kochop Jehu piik tamanwogik sisiit eng' saang', ak koleenji, “Ngot kochilil chii age tugul ne amutu konyo eunekwok, ko ineendet ne kaunda kochilil, kogeeri saboondanyi ineendet.”

²⁵ Kingo kes eng' yooto kagoitoetap kagoochinet ne kibeelei, koleenji Jehu riibiik ak kiptainigap lugeet, “Oba ko ak obar icheek tugul. Among' kochilil agot agenge!” Ki par icheek eng' rotwetap chok; ak ki wiir riibiik ak kiptainigap lugeet muuswek komong' saang'. Ki pa nganaseetap kootap Baal.

²⁶ Ki ip tolochik che ki mi kootap Baal, komong' ak kobeel.

²⁷ Ki iluul toloitap Baal ak kobut kootap Baal, ak koyai koek koot ne kimasyin, agoi ra.

²⁸ Kobut anyun Jehu Baal eng' Israel.

²⁹ Ago ma istoegei Jehu kasubetap tengekwogigap Jeroboam weeriitap Nebat, ne ki igoochi Israel koyai tengekto, chooto ko ki moegap thahabu che ki mi Bethel ak che ki mi Dan.

³⁰ Ki leenji Kamuktaindet ne Toroor Jehu, “Amu ki iyai ne myee eng' yaetap imanda ne myee eng' tainnyu, ak iyachi kootap Ahab ko uu tuguuk tugul che ki mi muguleldanyu, tebee anyun weeriiguk ng'echereetap laitornatet ne po Israel, agoi ibindap ang'wan.”

³¹ Ago ma mage kiy Jehu kowendote ng'atuutigap Kamuktaindet ne Toroor, Kamuktaindetap Israel, eng' muguleldanyi tugul. Ma istoegei tengekwogigap Jeroboam, che ki ibeete Israel si koyai tengekto.

Meetap Jehu

³² Ki toi Kamuktaindet ne Toroor eng' peetuusyechooto kotil Israel kong'ering'itu. Ki par `Hazael icheek eng' kiwotosyek tugul che po Israel,

³³ kong'etee Jordan komostap kong'asiis, emet tugul ne po Gilead, Gadik, Reubenik ak ne po Manasik. Kong'eete Aroer ne mi ole po atebweetap Arnon, chooto ko Gilead ak Bashan.

³⁴ Poisyonik che ng'etunotiin che po Jehu, tuguuk tugul che ki yai, ak kimnateennyi tugul, tos ma siraatiin eng' kitabuutap ateptap peetuusyek ne po laitorinigap Israel?

³⁵ Kiruiyo Jehu ak kwanisyekyik. Ki kitup ineendet eng' Samaria. Ak ki laitoran Jehoahas weeriinnyi kogeer ineendet.

³⁶ Ki laitoran Jehu koboi Israel eng' Samaria ko ki kenyiisyek tiptem ak sisiit.