2 KORINTOEK 7 - BUKUIT NE TILIIL Sireet ne Dutero Kanon

¹ Amu ki tinyei arorutichu anyun, chamanichu, ongitiliilgei, keiste simdo tugul ne po poorto ak ne po saboondo si keityi tiliilindo eng' kaiyweisyetap Kamuktaindet.

Poiboiyetap Paulo

² Oyatwech mugulelwekwok: ma ki yachi chii age tugul kiy ne ya, ma king'em chii age tugul, ma ki ibe chii age tugul kiy.

³ Ma mwaei niito ale arwookwok: amu kisip amwa, ale omi eng' mugulelwekyok kebegu tugul ak kesapche tugul.

⁴ Oo nyiganateet ne ang'alaalunenok, oo katoroorennyu pogei agobo okweek: kanyiia kagaigaet, kanyiia poiboiyet kot kong'irtagei eng' pichiinwekyok tugul.

⁵ Amu agot ye ki ngeitu Makedonia, koma nyoor poorwekyok kamuung'et, ago ki kinyalilech eng' komosta age tugul; kimi saang' pooryosyek, ak ki mi oriit kaiyweisyosyek.

⁶ Ago Kamuktaindet ne igoigoi che nyerootiin, ko ki igaigaech eng' nyonunetap Tito;

⁷ ak, ma eng' nyonunennyi kityo, ago eng' kagaigaet ne ki ogaigai ineendet, ye kingo mwaiwech emostong'wong', ak riirekwok, ak kagiileng'wong' pogei agobo anee; kot abaibaitu miising' kosiir.

⁸ Amu agot ngo ki agoonok oaragense eng' parweennyu, koma ageer ko ya, nganda kita ageer ko ya; amu ageere ale ki koonok parwaanooto oaragense, nganda ki po peetuusyek che matya.

⁹ Abaibai nguno, ma amu ki kigoonok oaragense, ago abaibai amu ki kigoonok oaragense agoi siguunet: amu ki kigoonok oaragense eng' arageneet ne tokyingei Kamuktaindet, si ma petwok kiy age tugul amu acheek.

¹⁰ Amu arageneet ne tokyingei Kamuktaindet koyaei siguunet agoi yetunet, ne ma tinyei ndara, ago arageneet ne po ng'wonyuni koibu meet.

¹¹ Amu ogeero, ng'olyoondoniito ne ki koonok arageneet ne tokyingei Kamuktaindet, kogiyai kagiilet ne uu nee eng' okweek; ee, saruunetapkei, ee, nereeknateet; ee, kaiyweisyet; ee, emosto; ee, kagiiletapkei; ee, yaaktaetap mugetuut! Eng' kiy age tugul ko ki obartegei ole oo tiliileen eng' ng'olyoondoniito.

¹² Ko anyun, nganda ki asirwak, ko ki ma asirwak agobo ng'olyoondetap ineendet ne ki yai ne ya, anan amu ng'olyoondetap ineendet ne ki kiyachi ne ya, ago si kong'ang'ak eng' okweek kagiileng'wong' pogei agobo acheek eng' taitap Kamuktaindet.

¹³ Nooto anyun ki kigaigaech: ak eng' kagaigaennyo ko ki kiboiboitu miising' ne siirei amu poiboiyetap Tito, amu ki ogoochi okweek tugul muguleldannyi komuuny.

¹⁴ Ak ngo ki amwachi ineendet kiy age tugul eng' lasetapkei agobo okweek, ko ki ma kikoono alilan; ago ko uu ye kigemwaiwok tuguuk tugul eng' iman, ko uu nooto kalasunennyo agine, ne ki amwa eng' taitap Tito, ko ki ek iman.

¹⁵ Ak oo miising' ne siirtoot chamyennyi ne po oriit agobo okweek, kobwaati kasetap iit neng'wong' tugul, ko uu ye ki otaach ineendet eng' kaiyweisyet ak potanet.

¹⁶ Abaibai anyun amu ating'enok kamang'unet eng' kiy age tugul.