2 KORINTOEK 6 - BUKUIT NE TILIIL Sireet ne Dutero Kanon

¹ Kisoome acheek che keboisyei ak Kamuktaindet keele amotaach myeeindap Kamuktaindet puch

² (amu mwaei keele, Ki agasin eng' peetuut ne po chamjinet, Ak ki atoretiin eng' peetuut ne po saruunet: Ogeero, nguno ko peetuut ne po chamjinet; ogeero, nguno ko peetuut ne po yetunet):

³ ama ki yai kiy age tugul ne po kanagut, si ma kimwaitae poisyennyo yaityo;

⁴ ago eng' tuguuk tugul kiboortoige, ko uu kiboitinigap Kamuktaindet, eng' muitaet ne oo, eng' pichiinwek, eng' kagiigosyek, eng' tiritinwek,

⁵ eng' pirutik, eng' ratisyosyek, eng' polatosyek, eng' poisyonik che uueen, eng' riipsosyek, eng' rugutosyek;

⁶ eng' tiliilindo, eng' naet, eng' mutyonet, eng' talasyet, eng' Kabuuset ne Tiliil, eng' chamyet ne ma tinyei keniisyet,

⁷ eng' ng'olyootap imanit, eng' kamuktaetap Kamuktaindet; eng' kariigap imanda eng' eutap tai ak eng' murot kaataam,

⁸ eng' toroornatet ak teweernateet, eng' ng'aleek che yaach che kimwaitaenech, ak eng' ng'aleek che myachen; ko uu kaberberik, ago ki po iman;

⁹ ko uu che ma naotin, ago kingenech komyee; ko uu che machei kobek, ak ogeero, kisoptosi; ko uu che kitigoni, ago ma ki parech;

¹⁰ ko uu che aragendos, ago che poiboi kotugul; ko uu che ponondos, ago imogornoni che chaang'; ko uu che ma tinyei kiy, ago tinyei tuguuk tugul.

¹¹ Kagiyatwok kutusweekyok, ee Korintoechu, kabaraitu mugulelwekyok.

¹² Ma ogiigotin eng' acheek, ago ogiigotin eng' chamyeng'wong'.

¹³ Ak eng' kageeret ne tee ne ki kigoonok (ang'alaali ko uu ye ang'alaaljini lagokyuk), ingobartaitu mugulelwekwok.

Hekaluutap Kamuktaindet ne sabei

¹⁴ Amat oratkei ak che ma iyanotin: tinyei imanda yamdao nee ak tengekto? Anan tinyei yamdao nee lapkeiyet ak mesundeito?

¹⁵ Anan kasyindos eng' nee Kristo ak Belial? Anan ting'egei nee ne iyanaat ak ne ma iyanaat?

¹⁶ Ak ting'egei nee Hekaluut ne po Kamuktaindet ak kanamonik? Amu ki Hekaluut ne po Kamuktaindet ne sabei; ago ko uu ye ki mwa Kamuktaindet kole, Amenye icheek, ak awendotee icheek; Ak aegu Kamuktaindet nenywa, Ak koek icheek piikyuk.

¹⁷ Nooto anyun omong'u eng' kwenunnywa, Ak otabaange, mwaei Kiptaiyat, Amotwaa kiy ne po simdo; Si ataachak,

¹⁸ Ak aegu Kwanda eng' okweek, Ak oegu weeriik ak tiibiik eng' anee, Mwaei Kiptaiyat Ne po Kamuktaet.