2 KORINTOEK 5 - BUKUIT NE TILIIL Sireet ne Dutero Kanon

¹ Amu kingen keele ngo putok koot ne po ng'wonyuni ne poorwekyok, ketinye teekseet ne punu Kamuktaindet, koot ne ki ma kiteech eng' eunek, po koigeny, eng' kipsengwet.

² Amu iman kitigendosi eng' ni, kimache miising' kilaakwech meng'ootennyo ne punu kipsengwet:

³ ye tuun kagilaakwech koma kemi aach ngor.

⁴ Iman, acheek che ki mi eng' porito, ketigendosi, ketinye laiset; ma keele kimache keregunenech, ago kimache kilaakwech, si kobiit kolugui saboondo nooto meei.

⁵ Ara anyun, ne kiyaech agobo niito, ko Kamuktaindet, ne ki koonech Kabuuset ne Tiliil, koek tongoaniatap tuguuk che pwoonei.

⁶ Eng' nooto anyun kinyigoonen kotugul, ak kingen keele, ye ta kemi eng' poorto, ko kagimi kobooto Kiptaiyat

⁷ (amu kibendoti eng' kayaneet, ma eng' keeret);

⁸ amwae ale, kinyigoonen, ak kemache keele, kaigai kemande eng' poorto, ak ketebi kobooto Kiptaiyat.

⁹ Nooto anyun ko ki it ne kitokyinige, ngemi eng' poori, anan ngo ma kimi, keegu che iboiboi ineendet.

¹⁰ Amu kanyool kibartech acheek tugul eng' taitap ng'echereetap kirwooget ne po Kristo; si kobiit kotaach chii age tugul tuguuk che tee che ki yai eng' poorto, ngo myach anan ngo yaach.

Poisyet ne po katuiyet

¹¹ Amu kingen anyun kayweetap Kiptaiyat, kichuutu piik, ago kibortaech eng' taitap Kamuktaindet; ak amang'u ale kibortoech eng' taitap kabwaateng'wong'.

¹² Ma kimwauge kogeny eng' taing'wong', ago ki koonok poroindo si kobiit olasuge amu acheek, si kobiit onyooru kiit ne kowoljini icheeget che ilasugei eng' tuguuk che taagu, ama eng' muguleldo.

¹³ Agot ngo kogobetech met, ko eng' Kamuktaindet; anan ngo litit ng'omnatennyo, ko amu okweek.

¹⁴ Amu ichiichech chamyetap Kristo; amu kingen ko uu ni, keele kime chiito agenge agobo tugul, nooto anyun ki pek tugul;

¹⁵ ak ki mechi ineendet tugul, si ma kosaptos agobo kei icheeget che saptos, ago agobo ineendet ne ki mechi ak kong'eet kogeny.

¹⁶ Nooto anyun kobooch nguno koma kingen chii age tugul eng' poorto: ago ngot ki kingen Kristo eng' poorto, koma kingen ineendet nguno ko uu nooto kogeny.

¹⁷ Nooto anyun, ngo mi chii age tugul eng' Kristo, kogigeyai ineendet koek chiito ne leel: kagosiirto tuguuk che po keny; ogeero, kagoek che leelach.

¹⁸ Ago po tuguuk tugul Kamuktaindet ne kiituiyenechkei eng' Kristo, ak ki koonech acheek poisyet ne po katuiyet;

¹⁹ keele ki mi Kamuktaindet eng' Kristo kotuitos ng'wony ak ineendet, koma iityin icheek yaitwogikwak, ko kagogoonech ng'olyootap katuiyet.

²⁰ Nooto anyun kitononjinik agobo Kristo, ko uu ye igoigook Kamuktaindet eng' acheek; kigoigook agobo Kristo, keele otuiyegei ak Kamuktaindet.

²¹ Ineendet ne ki ma kongen tengek, kogiyai ineendet koek tengek amu acheek; si kobiit keegu imanda ne po Kamuktaindet eng' ineendet.