2 KORINTOEK 2 - BUKUIT NE TILIIL Sireet ne Dutero Kanon

¹ Ago ki atil ni ale ma anyonjinok kogeny eng' arageneet.

² Amu ngot agoonok oaragense, ko ng'oo anyun ne iboiboa, kobatee ineendet ne kaagoochi koaragen?

³ Ak ki asirwak ng'olyoondoniito, si ma ye anyoo, koma tinye arageneet eng' icheek che kanyoolja agasegei; atinye kamang'unet eng' okweek tugul, ale poiboiyennyu ko neng'wong' okweek tugul.

⁴ Amu ki asirwak eng' pichiindo ne oo ak ng'wanindap muguleldo kobooto peegap kong' che chaang'; ma si oaragense, ago si kobiit onai chamyet ne ating'enok miising' kosiir.

Nyoetap kaat

⁵ Ago ngot ko koing'eet chii arageneet, ko koing'eet arageneet, ma eng' anee, ago eng' kebeber, (si ma koonok anee nyigiisindo ne siirei) eng' acheek tugul.

⁶ Yamei chiito ne uu niito kagikyinoni kitilji piik che chaang';

⁷ ago kaigai onyochi kaat ineendet ak ogaigai, si ma lugui, eng' ooreet age tugul, chiito ne uu nooto aragenennyi ne siirtoot.

⁸ Nooto anyun asoomok ale ogimiit chamyeng'wong' eng' ineendet.

⁹ Amu ki asir agobo ng'olyoondoniito, ale anaak komyee ngo kase iit eng' tuguuk tugul.

¹⁰ Ago ineendet ne onyochini kaat kiy age tugul, anyochini kaat agane. Ne ki anyochi kaat agane, ngo ki anyochi kaat eng' kiy age tugul, ko ki anyochi kaat agobo okweek eng' taitap Kristo,

¹¹ si ma nyoor Setani kiit ne iterteerenech; amu ma kiberberen, ago kingen chobutikyik.

Logoiywek che myach

¹² Ak ye kinga nyo Traos amu logoiywek che myach che po Kristo, ak ye ki ngeyatwa kurgeet eng' Kiptaiyat,

¹³ ki ma nyooru kamuung'et eng' saboondanyu, amu ki ma anyooru Tito ne kitupche. Ara ki amwachi icheek saisere ak atestai awe Makedonia.

Kayanik ak nyamdutyet

¹⁴ Ago kongoi eng' Kamuktaindet, ne imutatech kotugul kibelisye eng' Kristo, ak koboortoi nyamdutyetap naennyi eng' acheek eng' komosta age tugul.

¹⁵ Amu kinyamdutyet ne anyiny ne po Kristo eng' Kamuktaindet, eng' icheek che kisaru, ak eng' icheek che lustos;

¹⁶ eng' alak ko ki nyamdutyet ne po meet agoi meet; eng' alak ko ki nyamdutyet ne po saboondo agoi saboondo. Ak tos ng'oo ne yamegei ak tuguuchu?

¹⁷ Amu acheek koma ki uu che chaang', che poisyee ng'olyootap Kamuktaindet eng' ng'aalseet: ago ki che poisyei eng' ooreet ne ma tinyei ng'aalseet, ago ki po Kamuktaindet, ak eng' taitap Kamuktaindet, keng'alaali eng' Kristo.