2 KORINTOEK 13 - BUKUIT NE TILIIL Sireet ne Dutero Kanon

Kateunoik ak ng'aleek che po let

¹ Ni ko ne po somok anyonjinok. Ki kimiiti ng'olyoot age tugul eng' kutusweegap paorinik aeng' anan ko somok.

² Ki asip amwa, ak asip amwae kogeny, ko uu ye ki ami eng' panda ne po aeng', ko uu nooto nguno ye ma mi kobootok, eng' icheeget che ki yai tengekto, kobooch yooto, ak eng' chuun alak tugul, ale, si ma ye anyoo kogeny, koma rireegei;

³ amu ocheeng'e kaboorunetap Kristo ne ng'alaali eng' anee; ne ma nyalulat eng' okweek, ago tinyei kimnateet eng' okweek:

⁴ amu ki kigartaat eng' nyalulet, ago sabei eng' kamuktaetap Kamuktaindet. Amu kinyalulyotin ak acheek eng' ineendet, ago kisoptosi kobooto ineendet eng' kamuktaetap Kamuktaindet agobo okweek.

⁵ Osiaige okweegei, ngo mi eng' kayaneet; otyemge okweegei. Anan mongen okweegei ole miitei Jeso Kristo eng' okweek? Iyois ko oo eesyootin iman.

⁶ Ago amang'u ale ongen ole ma ki eesyootin.

⁷ Kisaae Kamuktaindet anyun si moyai yaityo age tugul; ma si ketaagu keele ki kiyanech, ago si kobiit oyai nooto myee, agot nganda ko uu che kiesyoi.

⁸ Amu ma kimuuchi keyai kiy ne kirindoi imanit, ago ne toreti imanit.

⁹ Amu kiboiboen ye kinyalulyotin, ago oo kiimeen: kisaae agobo niito agine, keele oegu che ititaatiin.

¹⁰ Amu nooto anyun, asire tuguuchu koma ami, si ma ye tuun ami koma poisyee koroomnateet, ko uu ole tee pounateet ne ki koono Kiptaiyat agobo teekseet, ma agobo putet.

¹¹ Ne po let anyun, che kitupche, ko saisere. Oegu che chobootiin; oegu che po kagaigaet; oegu che po kabwaatet agenge; otebi eng' kaalyeet: ak mi Kamuktaindet ne po chamyet ak kaalyeet kobootok.

¹² Ogatkei eng' ng'ututet ne tiliil.

¹³ Igatok piik tugul che tiliileen.

¹⁴ Ingotebi ak okweek tugul myeeindap Kiptaiyat Jeso Kristo, ak chamyetap Kamuktaindet, ak yamdaetap Kabuuset ne Tiliil.