2 KORINTOEK 12 - BUKUIT NE TILIIL Sireet ne Dutero Kanon

Keersosyek ak ng'ang'utigap Paulo

¹ Kanyool aloske, agot ngo ma nyolu; ago aityini keersosyek ak ng'ang'utik che po Kiptaiyat.

² Angen chiito eng' Kristo, kobooch nguno ko kenyiisyek taman ak ang'wan (ngo ki mi eng' poorto, ko mangen; anan ngo kiga komanda eng' poorto, ko mangen; ingen Kamuktaindet), ale ki kimut ineendet kotogosta agoi kipsengwet ne po somok.

³ Ak angen chiichooto (ngo ki mi eng' poorto, anan ki ma kota komi eng' poorto, ko mangen; ingen Kamuktaindet),

⁴ ale ki kimut kotogosta agoi Paradiso, ak ki kas ng'aleek che ma mwaoksei, che ma chamdaat kogetyigei komwa chii.

⁵ Alasuge agobo chiichooto: ago malasuge agobo aneege, kobatee eng' nyalulnatosyekyuk.

⁶ Amu ngot amache aloske, koma perberitu; amu amwae ne po iman: ago asise, si mat koiita chii age tugul kosiir ne tee ne keerchino, anan ye kasena.

⁷ Ak eng' ooindo ne siirtoot ne po ng'ang'utik - si ma kitoroora miising', ko ki kigoono kateet eng' poorto, ne otwoget ne po Setani kobira si ma toroorgei miising'.

⁸ Ki asoom Kiptaiyat miising' konyil somok agobo kiito, ale koistoenogei.

⁹ Ak ki leenjo, Yamin myeeindonyu: amu kiyaei kamugennyu koek ne ititaat eng' nyalulet. Alasuge anyun eng' poiboiyet miising' kosiir amu nyalulnatosyekyuk, si kobiit kotebena kamugetap Kristo.

¹⁰ Nooto anyun, abaibai eng' nyalulnatosyek, eng' ng'waninwek, eng' kagiigosyek, eng' usiisyosyek, eng' tiritinwek agobo Kristo; amu ye aa nyalulat, ko yooto anyun ye aa kiim.

Paulo ak ole keertoi kayanigap Korintho

¹¹ Kaaberberitu: ki obircha; amu kota nyolu oloswa okweek: amu ki ma aa po let eng' kiy age tugul eng' che koiyooktoi che eecheen kosiir, agot ngo ma aa kiy.

¹² Iman ki kiyae kwenung'wong' kaboorunoik che po kayooktoindet eng' muitaet tugul, eng' kaboorunoik ak kwang'utik ak poisyonik che po kamuktaet.

¹³ Amu tos mi nee ne kiyaak oegu che nyerootiin eng' kanisosyek alak, kobatee ki ma aegu nyigiisin eng' okweek? Onyoiywa kaat lelutyoniito.

¹⁴ Ogeero, niito ko ne po somok achoboksei ale Anyoonjok; ak manyone aegu nyigiisindo eng' okweek: amu ma cheeng'e tuguukwok, ago okweeget: amu ma nyooljin lagok kogonorchi tuguuk sigiik, ago konorchin sigiik lagok.

¹⁵ Ak abaibai miising' aboisyee chechuuk ak keboisena agobo saboonwekwok. Ngot achamok miising' kosiir, ko tos ki chama kitigin?

¹⁶ Ago ngo uu nooto, ko ki ma agoonok nyigiisindo; ago atinye ng'omnateet, ak ki anamak eng' mesteet.

¹⁷ Tos ki aibenok kiy eng' chii age tugul eng' icheeget che ki ayookwok?

¹⁸ Ki atechi Tito, ak ki ayookte ne kitupche koba tuwai. Tos ki ibenok Tito kiy? Ki ma kebendoti eng' Kabuusonooto agenge? Tos ma eng' tyegutik che kergei?

¹⁹ Obwaati agoi nguno oleen kisaruge eng' taing'wong'. Eng' taitap Kamuktaindet keng'alaali eng' Kristo. Ago tuguuk tugul, ko si keteechak, chamanichu.

²⁰ Amu aiywei, ale si ye anyoo, koma nyoorwok eng' oor age tugul ko uu ye ma mache, ak onyoorwo ko uu ye momache; si ma piit eng' oor age tugul, pooryosyek, ng'etkonda, nereegek, suryosyek, ng'ooksosyek, chaamsosyek, menootosyek, polatosyek;

²¹ si ye tuun anyoo kogeny, koma iming'ina Kamuktaindet nenyu eng' taing'wong', ak ariir agobo che chaang' eng' icheek che ki yai tengekwogik kobooch yooto, ama sik eng' simdo ak sokseet ak mageet ne ya agobo tuguuk che yaach che ki yai icheek.