2 KORINTOEK 10 - BUKUIT NE TILIIL Sireet ne Dutero Kanon

Kong'alaali Paulo agobo poisyennyi

¹ Asoomok anyun anee Paulo eng' talasyet ak mutyonetap Kristo, anee ne ming'in ye ami kobootok eng' kwenung'wong', ago ye ma mi kobootok atinye nyiganateet:

² ee, asoomok, ale si ma nyiganitu ye ami kobootok eng' kamang'unet ne koono aiit ale aa nyigan eng' alak, che iitech kole kibendoti eng' atebeetap poorto.

³ Amu agot ngebendoti eng' poorto, koma kiyae lugeet eng' atebeetap poorto;

⁴ (amu kariigap lugeennyo koma po poorto, ago tinyei kamuget eng' taitap Kamuktaindet koluul irimosyek);

⁵ kiluuli kabwaatutik, ak kiy age tugul ne toroor ne ieetegei kole kogirinda naetap Kamuktaindet, ak koluulei kabwaatet age tugul si kobiit kogas iit Kristo;

⁶ ko ki chobootiin keyaakyi mugetuut pistoet tugul, ye tuun isulda kaseng'wong' po iit.

⁷ Ogeere tuguuk che miitei taitap konyekwok. Ngot komang'ugei chii age tugul kole po Kristo, ko ingoruchi niito kogeny ineegei, kole, ko uu ye po Kristo ineendet, ke uu nooto agacheek.

⁸ Amu agot ngo nyolu kota aloskei kitigin agobo kimnateennyo (ne kigon Kiptaiyat si kobiit koteechak, ama si koluulok), koma lilani;

⁹ si ma egu ne amutenok paronokyuk.

¹⁰ Amu mwaei icheek kole, “Paronokyik ko nyigiisen ak ko kiimeen; ago nyalulat ineendet ye miitei tainnywa, ama tilei kiy ng'aleekyik.”

¹¹ Ingobwaat ne uu nooto, ni, kole, kiit ne ki uu eng' ng'olyoot eng' paronok ye ma kimi, ke uu nooto agine eng' poisyet ye ki miitei.

¹² Magoi kityem kiitkei anan kirogenegei icheek che ilasugei: ngo rogegeigei ak koyaniege kei icheegei, ko kaiboor naet ne ma ititaat.

¹³ Ma kitoroorigei acheek kot kosiirto, ago kirogendoegei kaaroret ne kiitwech Kamuktaindet kot keitu ola omi.

¹⁴ Amu ma kiyogoitoige kosiir, ko uu ne ma kiitu olong'wong': amu kigebwa agoi olong'wong' eng' logoiywek che myach che po Kristo:

¹⁵ ama kilasuge kosiir ne tee ne yamei, eng' poisyonigap piik alak; ago kimang'u keele, ko uu ye tesoksei kayaneng'wong', kitoroorech eng' okweek ko uu ole tee kakwaennyo, kot kosiir,

¹⁶ si kobiit keamde logoiywek che myach agot eng' komoswek che mi komosin eng' olong'wong', ama kilasuge eng' kakwaetap chii age eng' tuguuk che kigechop.

¹⁷ Ago ineendet ne ilasugei, ingoloskei eng' Kiptaiyat.

¹⁸ Amu ma ineendet ne ilasugei ne kiyani, ago ineendet ne ilasu Kiptaiyat.