2 KORINTOEK 1 - BUKUIT NE TILIIL Sireet ne Dutero Kanon

Kagateet

¹ Paulo, kayooktoindet ne po Kristo Jeso eng' mageetap Kamuktaindet, ak Timoteo tupchennyo, kisirchini kanisetap Kamuktaindet ne miitei Korinto, kobooto che tiliileen tugul che miitei Akaia komugul:

² Ingotep kobootok myeeindo ak kaalyeet ne punu Kamuktaindet Kwandanyo ak Kiptaiyat Jeso Kristo.

Mwaetap kongoi

³ Iberuurot Kamuktaindet ne Kwandap Kiptaiyandennyo Jeso Kristo, Kwanda ne po rireenosyek ak Kamuktaindet ne po kagaigaet tugul;

⁴ ne igoigoech eng' pichiindanyo tugul, si kimuuch kigaigai icheeget che mi pichiin age tugul, eng' kagaigaet ne igoigoenech Kamuktaindet.

⁵ Ko uu ye katesak eng' acheek nyalilwogik che po Kristo, ko uu nooto katesak kagaigaennyo eng' Kristo.

⁶ Ago nginyalilech, ko agobo kagaigaeng'wong' ak yetuneng'wong'; anan ngigoigoech, ko agobo kagaigaeng'wong', ne poisyei eng' muitaet ye omuitoi eng' nyalilwogichooto kinyaliili agacheek:

⁷ ak lumdaat kamang'unennyo agobo okweek; kingen keele, ko uu ye oo yamdoik che po nyalilwogik, ko uu nooto oo yamdoik che po kagaigaet.

⁸ Amu ma kimache oegu che mongen, che kitupche, agobo pichiindo ne kinyoorwech eng' Asia, ale kisyebech miising', kosiir kamugennyo, kot koma ketinyei kamang'unetap sabeet.

⁹ Ee, ki kitinyei acheeget kirwoogetap meet eng' oriitinnyo, si mata kimang'uge, ago Kamuktaindet ne ing'eeti che pegu:

¹⁰ ne kisarwech eng' meet ne oo ne tee ni, ak ta kosarwech: ne kimang'u keele ta ko sarwech kogeny;

¹¹ otoretech ak okweek kibagenge eng' soomeng'wong'; si kobiit kogoito kongoi piik che chaang' agobo acheek, amu konunet ne ki kigoonech eng' toretetap che chaang'.

Kosuptoi Paulo rutoitonyi

¹² Amu kalasunennyo ko ni, paornateetap kabwaatennyo, keele ki kiteptoi tiliilindo ak atepto ne ma tinyei keniisyet, ne po Kamuktaindet, eng' ng'wony, ma eng' utaatyetap poorto ago eng' myeeindap Kamuktaindet, ak ne siirei miising' ko eng' komostang'wong'.

¹³ Amu ma kisirwok tuguuk alak tugul, kobatee chooto che osomani anan onai, ak amang'u ale onai agoi let:

¹⁴ Agot ko uu ye ki onaech kitigin, ole acheek ko ki kalasuneng'wong', agot ko uu ye oo kalasunennyo ak okweek, eng' peetuutap Kiptaiyandennyo Jeso.

¹⁵ Ak eng' kayanoniito ko ki abwaati isip Anyoonjok si kobiit onyooru myeeindo ne po aeng';

¹⁶ ak abune olong'wong' awendi Makedonia, ak kogeny abunu Makedonia anyoone olong'wong', si omonorseiwo eng' pandanyu awendi Judea.

¹⁷ Ye kinga pwaat ko uu nooto, ko tos ki aurereni? Anan tuguuk che aa pegechini ale ayae, ko tos abegechini ko uu atebeetap poorto, si kobiit koek eng' anee ee, ee, ak achicha, achicha?

¹⁸ Ago ko uu ye po iman Kamuktaindet, ng'olyoondennyo eng' okweek koma ee ak achicha.

¹⁹ Amu Weeriitap Kamuktaindet, Jeso Kristo, ne ki kiamde eng' kwenung'wong', anee ak Silvano ak Timoteo, ne ki ma ko “ee” ak “achicha”, ago eng' ineendet ko “wei” kipchulyo.

²⁰ Amu agot ngo tya arorutigap Kamuktaindet, eng' ineendet ko wei: ak kogeny eng' ineendet ko Amen, agoi toroornatetap Kamuktaindet eng' acheek.

²¹ Nguno anyun, ineendet ne igimitech kobootok eng' Kristo, ak ne ki ilech, ko Kamuktaindet;

²² ak king'oochech, ak kogoonech Kabuuset ne Tiliil eng' mugulelwekyok koek tongoaniatap tuguuk che pwoonei.

²³ Ago aguure Kamuktaindet koek paoryat eng' saboondanyu, ale, si koma nyo Korinto, ko ki ariirenak.

²⁴ Ma keele ki tinyei pounateet eng' kayaneng'wong', ago kitoretik che po poiboiyeng'wong': amu otonondosi eng' kayaneng'wong'.