2 ATEPTAP PEETUUSYEK 9 - BUKUIT NE TILIIL Sireet ne Dutero Kanon

Rutoito ne po laitoryatap Sheba

¹ Kingo kas laitoryatap Sheba ne ki kwony kalasunetap Solomon, ko ki nyo Jerusalem konyo kotyem Solomon eng' teebutik che uueen. Ki nyo kobooto piik che chaang' ak tambeesik che ibei tuguuk che ng'uu ne anyiny, thahabu che chaang' ak koik che po kamanuutyet ne oo. Kingo it ole mi Solomon kong'alaal ak ineendet agobo tuguuk tugul che ki mi muguleldanyi.

² Ki wolji `Solomon ineendet teebutikyik tugul; ak ki ma komi kiy age tugul ne ki ma nai Solomon anan ne kitemenee kowolji ineendet.

³ Kingo kagogeer laitoryandanooto po Sheba utaatyetap Solomon, kobooto koot ne kiga teech,

⁴ amitwogik che mi mesennyi, ole teptoi otwogikyik, tononet ne tononjin poisyet kiboitiinikyik komi eng' ngoroikwak, piikyik ak icheek che ipchin tuguuk che eei eng' ngoroikwak ak kagoochinoikyik che kibeelei che ki igoitoi eng' kootap Kamuktaindet ne Toroor, kogeskei anyun kimnateennyi.

⁵ Ara ki leenji `kwonyooto laitoryat, “Po iman ng'aleechu ki agase eng' emennyu agobo poisyoniguk ak agobo utaatyeng'ung'.

⁶ Ago ki ma ayan ng'aleekwak kot kotee anyo ageerchigei eng' konyekyuk. Abeere ki ma kimwaiwo agot kebebertap ooindap utaatyeng'ung'; isiire kalasunoni ki agase.

⁷ Poiboi piiguk! Poiboi otwogichuguk, chu tonondos eng' taing'ung' kotugul ak kogasei utaatyeng'ung'!

⁸ Iberuurot Kamuktaindet ne Toroor Kamuktaindeng'ung', ne ki paibait eng' inyee ak kondein ng'echerennyi ne po laitornatet iegu laitoryatap Kamuktaindet ne Toroor Kamuktaindeng'ung'. Amu ki cham `Kamuktaindeng'ung' Israel ak kogimit icheek koigeny, kondein anyun iegu laitoryat ibou icheek iyai kirwooget ak imanda.”

⁹ Ki igoochi `kwonyooto laitoryat talendaisyek pogol ak tiptem che po thahabu, kobooto tuguuk ng'iisyat che ng'uu ne anyiny ak koik che po kamanuutyet ne oo. Ki ma piit nyamdutik che uu chooto ki igoochi `laitoryandanooto po Sheba Laitoryat Solomon.

¹⁰ Ki ip ak icheek otwogigap Huram ak otwogigap Solomon thahabu eng' Opir, ak keetiigap almug ak koik che po kamanuutyet ne oo.

¹¹ Kiboisyee laitoryat keetichooto po almug koyae ole kitogostoe eng' kootap Kamuktaindet ne Toroor ak eng' kootap laitoryat; kiyae kora ketubosyek ak kibugandinik che po tyeniik. Kitomo kogeerei chii tuguuk che uu chooto eng' emetap Judah.

¹² Kosupkei ak nooto, ko ki igoochi agine `Laitoryat Solomon laitoryandanooto po Sheba kiy age tugul ne kimach, ak kiy age tugul ne ki soom koma pooto tuguuk che kiga ipchi kwonyoto Solomon. Kiweektagei anyun kwo emennyi kobooto otwogikyik.

Mogornateetap Solomon

¹³ Ki ek nyigiisindap thahabu che ki kiipchi Solomon eng' kenyiit agenge tanisyek eliphuusyek tiptem ak muut,

¹⁴ ama pooto che ki ibu piik che aldooti ak che ki ibu chemung'arainik, ak ki ip laitorinik tugul che po Arabia ak pounigap emet, thahabu ak fedha, koipchi Solomon.

¹⁵ Ki yai Laitoryat Solomon, long'onik che eecheen pogol aeng' che po thahabu che ki kitany; ki kiyae long'eet agenge ne oo keruutik tisap che po thahabu che ki kitany.

¹⁶ Ki yai long'onik che mengeechen pogol somok che po thahabu che ki kitany; ki kiyae long'eet agenge keruutik somok che po thahabu. Kigonoree laitoryat long'onichooto Kootap Osnetap Lebanon.

¹⁷ Ki yai kogeny laitoryat ng'echereet ne oo ne po laitornatet eng' kelegap peeleek ak koliige thahabu che tiliileen.

¹⁸ Ki mi lang'eiywot ne tinyei tuguuk lo che kityegoti ketogosyin ng'echereetap laitornatet, kobooto ng'echereet ne tebee keelyek ne ki po thahabu, ne kiga kiratyi ng'echereetap laitornatet, ak kimi keetiik komosi ak komosi che tiegei eunek, ak itoonwek aeng' che po ng'etuunyik eng' komosi ak komosi eng' ye neegitee keetichooto kitiie eunek.

¹⁹ Ki tonondos itoonwek tamanu ak aeng' che po ng'etuunyik eng' komoswek tuwai eng' tuguuchooto lo kityegoti ketogostoi. Ki ma komi age ne kergei ak nooto ne ki kiyai eng' laitornatet age tugul.

²⁰ Ki po thahabu tuguuk tugul che kieise Laitoryat Solomon, ak tuguuk tugul che ki kiboisyee eng' Kootap Osnetap Lebanon ko ki po thahabu che tiliileen; ki ma ko kiy fedha eng' peetuusyegap Solomon.

²¹ Amu ki tinyei laitoryat melisyek che ki pendi Tarsis kobooto otwogigap Huram, ki ibu melisyek che po Tarsis konyil agenge eng' kenyiisyek somok, thahabu, fedha, kelegap peeleek, tisook ak toriitik che kiguure tausi.

²² Ki siir anyun Laitoryat Solomon laitorinik tugul che po ng'wony eng' mogornatosyek ak utaatyet.

²³ Ki cheeng' laitorinik tugul che po ng'wony kogeer Solomon kole kogas utotyennyi, ne ki inde Kamuktaindet muguleldanyi.

²⁴ Ki ip chii tugul kagoochinennyi, tuguugap fedha ak tuguugap thahabu, ngoroik, kariigap lugeet, nyamdutik, ak paraisisyek, ak nyumbusyek, koitet ne ki kigoonu eng' kenyiit age tugul.

²⁵ Ki tinyei Solomon kooriik eliphuusyek ang'wan che po paraisisyek ak kariisyek, ak piik eliphuusyek taman ak aeng' che po paraisisyek, che ki inde nganasoogap kariisyek ak che ki mi ole mi laitoryat eng' Jerusalem.

²⁶ Ki pou laitorinik tugul kobooch Aineetap Yufrets agoi emetap Philistiik, ak agoi kiwotetap Misiri.

²⁷ Ki yai laitoryat fedha eng' Jerusalem koigei koik, ak ki yai eng' chaang'indo taragonik koigei mogoonik che mi emet ne soi.

²⁸ Ki kigetyi Solomon paraisisyek eng' Misiri, ak eng' emotinwek tugul.

Laitornatetap Solomon eng' nwagindo

²⁹ Poisyonigap Solomon che kang'et, che po tai ak che po let, tos ma ki sirchi kitabuutap ng'aleegap maotyot Nathan, ak eng' maonateetap Ahija Silonindet, ak eng' ng'ang'utigap keerindet Ido agobo Jeroboam weeriitap Nebat?

³⁰ Ki laitoran Solomon eng' Jerusalem koboi Israel tugul kenyiisyek artam.

³¹ Ki ru Solomon kobooto kwanisyekyik, ak ki kitupchi nganaseetap Daudi kwandanyi. Ak ki laitoran Rehoboam weeriinnyi kogeer ineendet.