2 ATEPTAP PEETUUSYEK 8 - BUKUIT NE TILIIL Sireet ne Dutero Kanon

Poisyonik alak che ki yai Solomon

¹ Kingo kagogeskei kenyiisyek tiptemu, ne eng' chuuto ko kiteege Solomon kootap Kamuktaindet ne Toroor ak koonnyi,

² ki teech Solomon nganasook che kiga kogoochi `Huram ineendet ak kogoochi piigap Israel komeny olooto.

³ Ki wo Solomon kobookyi Hamat-seba ak koterteer olooto.

⁴ Ki teech Tadmor eng' surkwen ak nganasook tugul che kigonoree tuguuk eng' Hamath.

⁵ Ki teech kogeny Beth-horon ne po meto ak Beth-horon ne rektoot, nganasook che ng'ootaatiin, che ki tinyei irimoik, ormariichok, ak temeleiywek,

⁶ ak Baalat, ak nganasook tugul che kigonorisye, ak nganasook tugul che po kariisyekyik ak nganasoogap piik che laanyei paraisisyekyik, ak tuguuk tugul che po magennyi che ki cham Solomon koteech eng' Jerusalem, eng' Lebanon ak eng' emet tugul ne po pounatennyi.

⁷ Piik tugul che ki ng'et eng' Hitik, Amorik, Perisik, Hibik ak Jebusik che ki ma ko po Israel,

⁸ che kiga ng'et eng' emet, che ki ma par piigap Israel kogees, koging'at Solomon kelewen piik eng' lagogap pichooto koek otwogik agoi rani.

⁹ Ago eng' piigap Israel, ko ki ma yai Solomon icheek koek otwogik che yaei poisyennyi. Ki igoochi icheek koek murenigap lugeet, koek che eecheen eng' kiptainikyik, pounigap kariisyekyik ak murenikyik che ki laanyei paraisisyekyik.

¹⁰ Chu ko ki kiptainik che eecheen che po Laitoryat Solomon, piik pogol aeng' ak konom, che ki pou piik.

¹¹ Ki imut `Solomon cheptap Pharaoh kotogos eng' nganaseetap Daudi konyo koot ne kiga koteekyi ineendet: amu ki le, “Ma menyei osotyondennyu kootap Daudi laitoryatap Israel, amu tiliileen komoswek che ki nyo moingetap Kamuktaindet ne Toroor kotebee.”

¹² Ki igoochi anyun `Solomon Kamuktaindet ne Toroor kagoochinoik che kibeelei eng' kaptisisyetap Kamuktaindet ne Toroor, ne kiga koteech eng' taitap keterut,

¹³ ko uu ye yamei poisyetap peetuut age tugul, kogoitoi ko uu ng'atuutyetap Musa, eng' sabatoisyek, eng' ye kaleel arawet, ak eng' igoorwek che ki king'at, konyil somok eng' kenyiit, igoorto ne po magatiinik che ma kinde mermereek, igoortap wigisyek ak igoortap keryosyek.

¹⁴ Ko uu ng'atuutyetap Daudi kwandanyi koging'at riipsosyegap tisiik eng' otisyennywa, ak Lawiik koyai poisyonikwak si kolasu ak koboisyei kobooto tisiik ko uu ye yamei poisyetap peetuut age tugul. Ki ng'at riibiigap kurgeet ak icheek koyai riipsosyekwak eng' kurgeet age tugul; amu kiga ng'at Daudi chiitap Kamuktaindet ko uu nooto.

¹⁵ Ki ma meto ng'atuutyetap laitoryat ne ki ng'at Tisiik ak Lawiik agobo ng'olyoot age tugul, anan agobo konoraik.

¹⁶ Ara kichobok anyun poisyetap Solomon kobooch peetuut ne ki kilume lumeiywotap kootap Kamuktaindet ne Toroor agoi kogeskei. Ki igeskei anyun poisyetap kootap Kamuktaindet ne Toroor.

¹⁷ Yeityo kwo Solomon Esion-geber ak Elot, che mi ngeguutap emetap Edom.

¹⁸ Ki iyookyi Huram melisyek ineendet koyooktoe otwogikyik, ak otwogik che ingen agobo nyanjet. Ki pwa icheek Opir kobooto otwogigap Solomon, ki ip eng' olooto talendaisyek che po thahabu pogol ang'wan ak konom, koipchi Laitoryat Solomon.