2 ATEPTAP PEETUUSYEK 7 - BUKUIT NE TILIIL Sireet ne Dutero Kanon

Kotabaani Solomon Hekaluut

¹ Ye kingo kes Solomon saaet, kochoorgei maat eng' kipsengwet ak kobeel kagoochinet ne kibeelei ak koroseek, ak ki nyi koot liilindap Kamuktaindet ne Toroor.

² Ko uu ye kiganyi liilindap Kamuktaindet ne Toroor kootap Kamuktaindet ne Toroor, ko ki ma imuuch tisiik koba koot oriit.

³ Ye kigeerei lagok tugul che po Israel kochoorugei maat ak kotebee liilindap Kamuktaindet ne Toroor paragutap koot, ak ki ing'uruugis icheek kot koit ng'wony togoochikwak eng' ye ki kitetyi koik, ak kolas ak komwachi kongoi Kamuktaindet ne Toroor kole, “Amu myee ineendet, amu po koigeny rireenennyi.”

⁴ Kogoito anyun laitoryat kobooto piik tugul tiseiywek eng' taitap Kamuktaindet ne Toroor.

⁵ Ki igoito Laitoryat Solomon tiseiywek che po eiik eliphuusyek tiptem ak aeng' ak keechiirek eliphuusyek pogol ak tiptem. Ara ki itabaan anyun laitoryat ak piik tugul kootap Kamuktaindet.

⁶ Kitononso anyun tisiik kobee poisyonikwak; ki yai ko uu nooto Lawiik ak icheek che ki tinyei kibungandinigap tyenwogik che po Kamuktaindet ne Toroor, che kiga koyai Daudi laitoryat che kimwachine kongoi Kamuktaindet ne Toroor. Kityenso kole “Amu po koigeny rireenennyi,” ko uu ye ki ng'at `Daudi icheek eng' otisyennywa. Kiguutei iryagook tisiik eng' tainnywa, ak kitononso Israel tugul.

⁷ Kogeny ki itiliil Solomon kwenutap seremut ne ki mi taitap kootap Kamuktaindet ne Toroor, amu ki igoito eng' yooto kagoochinoik che kibeelei ak mwanik che po kagoochinoigap kaalyeet, amu ki ma koyamei kaptisisyetap sugunwet ne kiga koyai Solomon kagoochinet ne kibeelei ak kagoochinet ne po peek ak mwanik.

⁸ Eng' peetuusyechooto kogiyai anyun Solomon igoorto peetuusyek tisap, kobooto Israel tugul, tuiyet ne oo miising' che ki pwa kong'etee ye kibunei kebendi Lebo-hamath agoi aineetap Misiri.

⁹ Eng' peetuutap sisiit, kogiyai tuiyetap kaming'inetapkei; amu kiga koyai katabaanetap kaptisisyet eng' peetuusyek tisap ak igoorto peetuusyek tisap.

¹⁰ Eng' peetuutap tiptem ak somok ne po arawetap tisap ko ki mwachi piik koba emaisyekwak, eng' poiboiyet ak kagasetapkei ne po muguleldo amu myeeindo ne ki yachi Kamuktaindet ne Toroor Daudi ak Solomon ak Israel piikyik.

Kimong'ji `Kamuktaindet ne Toroor Solomon kogeny

¹¹ Kogees anyun Solomon kootap Kamuktaindet ne Toroor ak kootap laitoryat. Ak ki yai Solomon eng' aiyebindo tuguuk tugul che ki ibwaat ineendet eng' muguleldanyi, koyai eng' kootap Kamuktaindet ne Toroor ak eng' koonnyi.

¹² Kimong'ji `Kamuktaindet ne Toroor Solomon kemoi ak koleenji ineendet, “Kaagas saaeng'ung', ak kaalewenjigei yuto koek kootap tiseiywek.

¹³ Ngot ager kipsengwet si ma robon, anan ngot ang'at chereng'endet koam emet, anan ayookyi koroito piikyuk,

¹⁴ ngot koming'ingei piikyuk che kemwaitoe kainennyu, kosa, kocheeng'a ak kolakta ortinwekwak che po yaityet, agas anyun eng' kipsengwet; ak anyochi kaat eng' tengektonywa ak asoop emennywa.

¹⁵ Kogeer anyun konyekyuk ak kogas itiikyuk saaet ne ki saaei eng' yuto.

¹⁶ Amu kaalewen kooi ak atabaan si kobiit kotebee kainennyu olooto koigeny. Ak tebee yuto konyekyuk ak muguleldanyu kotugul.

¹⁷ Ak ngot iwendote inyee tainnyu ko uu ye kiwendote Daudi kwandang'ung', iyai ko uu tuguuk tugul che kaang'atiin ak iriip ng'atuutikyuk ak kirwoogutikyuk,

¹⁸ agimiit anyun ng'echereetap laitornatet ne po pounateng'ung', ko uu ye ki ayai arorutyet ak Daudi kwandang'ung' aleenji, ‘Ma petenen chiito ne egu pounindet eng' Israel.’

¹⁹ Ago ngot omaaste, ak olakte kaneetisyosyekyuk ak ng'atuutikyuk che ki ande taing'wong', obe oot kanamonik ak ogutung'ji,

²⁰ atutu anyun icheek eng' emennyu ne ki agoochi; ak awirte kooi eng' tainnyu ne ki atabaanji kainennyu, ak ayai koek kalewenet ak atindyot eng' pororyosyek tugul.

²¹ Ak kwong'ei age tugul ne siirei yuto, agobo kooi oo tee ni, ak kole, ‘Amu nee si koyachi Kamuktaindet ne Toroor ko uu ni emoni ak kooi?’

²² Yeityo kowol kole, ‘Amu kimeto `icheek Kamuktaindet ne Toroor, Kamuktaindetap kwanisyekwak, ne ki imut icheek komong' eng' emetap Misiri ak konamgei ak kanamonik, kogutung'ji ak koot icheek: nooto anyun ki ipchi `ineendet icheek yaityoni tugul.’ ”