2 ATEPTAP PEETUUSYEK 6 - BUKUIT NE TILIIL Sireet ne Dutero Kanon

Ng'alaaletap Solomon

¹ Ki ng'alaal anyun Solomon kole, “Ki le Kamuktaindet ne Toroor, menyei ineendet poolik che nyigiisen.

² Kaateegun koot ne imenye, komostang'ung' ne imenye koigeny.”

³ Kiwelelgei laitoryat ak koberuur tuiyet tugul ne po Israel: ak ki tonon tuiyet tugul ne po Israel.

⁴ Ki le ineendet, “Iberuurot Kamuktaindet ne Toroor, Kamuktaindetap Israel, ko uu ye kagoyai eng' eunnyi kosulda ne ki ng'alaalji eng' kutinnyi abba Daudi kole,

⁵ ‘Kobooch peetuut ne ki amutu piikyuk eng' emetap Misiri, ko malewen nganas eng' ortinwek tugul che po Israel ateech koot si kobiit kotebee yooto kainennyu; amalewen chii age tugul koek pounindet koboi piikyuk Israel.

⁶ Ago ki alewen Jerusalem si kobiit kotebee yooto kainennyu, ak ki alewen Daudi koboi piikyuk Israel.’

⁷ “Kimach eng' muguleldannyi abba Daudi kole koteekyi koot kainetap Kamuktaindet ne Toroor, Kamuktaindetap Israel.

⁸ Ago ki leenji Kamuktaindet ne Toroor kwandanyu Daudi, ‘Amu kimi muguleldang'ung' iteekyi koot kainennyu, ko ki iyai kiit ne myee ibwaat ko uu nooto eng' muguleldang'ung'.

⁹ Nganda uu nooto, koma inyee ne teechei koyooto, ago weeriing'ung' ne mang'une poortang'ung', ineendet ne teekyin kainennyu koot.’ ”

¹⁰ “Kagoyai Kamuktaindet ne Toroor ng'olyoondennyi ne ki mwa. Ki abiitu ageer kwandanyu Daudi ak nguno atebee ng'echereetap laitornatet ne po Israel, ko uu ye ki iaror Kamuktaindet ne Toroor; ak koateekyi koot kainetap Kamuktaindet ne Toroor, Kamuktaindetap Israel.

¹¹ Ki ande yooto moinget, ne mi oriit arorutyetap Kamuktaindet ne Toroor ne ki yai ak piigap Israel.”

Saaetap Solomon

¹² Ki tonon ineendet eng' taitap kaptisisyetap Kamuktaindet ne Toroor, eng' taitap tuiyet tugul ne po Israel ak kochuul eunekyik.

¹³ Kiga yai Solomon eng' sugunwet ole kitororit, koindonyi ak tebeesindanyi ko ki aechin ak ki mitainik aeng' ak robo, ak kooindap tononennyi kogimitait agenge ak robo, yeityo konde kwenutap seremut. Kitonone yooto yeityo kogutuny eng' taitap tuiyet tugul ne po Israel ak kochuul eunekyik kotokyigei kipsengwet.

¹⁴ Ki sa ineendet kole, “Ee Kamuktaindet ne Toroor, Kamuktaindetap Israel, ma mi Kamuktaindet ne Toroor age ne uu inyee, eng' kipsengwet anan eng' ng'wony, ne riibei kayomiset ak rireenet ak otwogiguk, che pendote taing'ung' eng' mugulelwekwak tugul.

¹⁵ Ki isuldochi otwogindeng'ung' abba Daudi kiit ne ki iyomisyi ineendet; ee ki imwa eng' kuting'ung' ak kaiyai kosulda eng' kamugeng'ung', ko uu kiit ne uu rani.

¹⁶ Ara anyun, ee Kamuktaindet ne Toroor, Kamuktaindetap Israel, isuldochi otwogindeng'ung' abba Daudi kiit ne ki iyomisyi, ileenji, ‘Ma petenen chiito ne tebee ng'echereetap laitornatet ne po Israel eng' tainnyu, ngot koriip lagoguk ortinwekwak, kobendatee ng'atuutyennyu, ko uu ye ki iwendote tainnyu.’

¹⁷ Ara anyun, ee Kamuktaindet ne Toroor, Kamuktaindetap Israel, ingogimiit ng'olyoondeng'ung' ne ki imwachi otwogindeng'ung' Daudi.”

¹⁸ Ago tos menyei Kamuktaindet ak piik iman eng' ng'wony? Keero, ma yamin kipsengwet itebee, anan kipsengwet ne po parak miising', ko ming'in ne tya anyun kooi koateech!

¹⁹ Ago konyit saaetap otwogindeng'ung' ak soomennyi, ee Kamuktaindet ne Toroor Kamuktaindennyu, kas riirek ak saaet ne saaei otwogindeng'ung' eng' taing'ung'.

²⁰ Ingogeer konyeguk kooi peet ak kemoi, kogeer komosta ne ki imwa ile indoi kaineng'ung'. Kas saaet ne saaei otwogindeng'ung' kotokyingei komosi.

²¹ Ak igas soomutigap otwogindeng'ung' ak piiguk Israel, ye saaei kotokyingei yuto. Ee kas anyun eng' ole imenye eng' kipsengwet; ak ye igas, inyochi kaat.

²² Ngot koleelji chii chiitap kokwennyi ak kebirchi ineendet koyasyo ak konyo koyasyo eng' taitap kaptisisyeng'ung' eng' kooi,

²³ igas anyun eng' kipsengwet ak iyai. Ye irwooksechi otwogiguk, iyaakyi mugetuut ineendet ne kalel ak inde kotebee metinnyi ortinwekyik. Iityi imanda ineendet ne po iman, igoochi ko uu imandanyi.

²⁴ “Ngot kebar piiguk Israel eng' taitap puunik, amu ki koyaun tengekto ak koweek kogeny ak kong'aany kaineng'ung', kosa ak koriiryo eng' taing'ung' eng' kooi,

²⁵ igas anyun eng' kipsengwet, ak inyochi kaat piiguk Israel eng' tengektonywa, ak imutu icheek kogeny kobwa emet ne ki igoochi icheek ak kwanisyekwak.

²⁶ Ye kerak kipsengwet ak kobet ropta amu ki koyaun icheek tengekto, ko ngot kosa kotokyigei komosi, kong'aany kaineng'ung', ak koweek eng' tengektonywa, ye inyaliil icheek,

²⁷ kaigai kas anyun eng' kipsengwet, ak inyochi kaat otwogiguk eng' tengektonywa, ak ne po piiguk Israel. Ineet icheek ooreet ne myee ne nyolu kobendatee, ak iyookyi ropta emeng'ung' ne ki igoochi piiguk koek porotennywa.”

²⁸ “Ngot kobiit rubeet anan ko koroito eng' emet. Ngot kobiit chelalityet, ngo kameiyo peek, anan ko uchatet, ngo maiywa peek, anan chereng'endet anan ko kutyet, ngot koyiem icheek puunikwak eng' emetap nganasookwak, anan kobiit koroito age tugul anan ko myando age tugul,

²⁹ ko saaet anan ko soomet age tugul ne kasoom chii age tugul, anan ko ne kasoom piiguk tugul che po Israel, ne naei chii age tugul myandanyi ak aragenennyi, ak kochuul eunekyik kotokyi kooi,

³⁰ igas anyun eng' kipsengwet oldang'ung' ole imenye, ak inyochi kaat ak iyaakyi chii age tugul ko uu ortinwekyik tugul, ko uu ye ingen muguleldanyi, amu inyee inyegei ne ingen mugulelwegap weeriigap piik

³¹ si kobiit koiywein ak kobendatee ortinweguk kotee kosaptos eng' emet ne ki igoochi kwanisyekyok.”

³² “Ak eng' chiito ne po pororyosyek, ne ma po piiguk Israel, ngo nyo eng' emet ne loo agobo kaineng'ung' ne oo, ak agobo eung'ung' ne kiim, ak eung'ung' ne chuulaat, ye pwa ak kosa kotokyigei kooi,

³³ igas anyun eng' kipsengwet eng' oldang'ung' ole imenye, ak iyai ko uu tuguuk tugul che kaguurchin chiichooto po pororyosyek, si kobiit konai kaineng'ung' piik tugul che po ng'wony ak koiywein, ko uu ye iywein piiguk Israel, ak si kobiit konai kole kooi ki ateech kemwaitoe kaineng'ung'.”

³⁴ “Ngot koba piiguk kobargei ak puunikwak, eng' ooreet age tugul ne keyooktoe, ak kosaain kotokyigei nganasani ki ilewen ak kooi koateekyi kaineng'ung',

³⁵ igas anyun eng' kipsengwet saaennywa ak soomennywa, ak iyachi icheek kiit ne machei.”

³⁶ “Ngot koyaun tengek, amu ma mi chii ne ma yaei tengek, ak inereekyi ak igoochi icheek puunikwak koluul icheek komut koba emet ne loo anan ko ne neegit;

³⁷ ago ngot kobwaatkei eng' emet ne ki kimut koek luulenik ak kosik, ak koriirchin eng' emet ne ki kiluulji icheek, kole, ‘Kigeyai tengekto, ki keyai kiit ne imaasat, ki keyai kiit ne ya kot’;

³⁸ ngot koweekyingei eng' mugulelwekwak tugul ak eng' saboonwekwak tugul eng' emet ne ki kiluulji icheek, ole ki kimut icheek koek luulenik ak kosa kotokyigei emennywa ne ki igoochi kwanisyekwak, ak nganaseet ne ki ilewen, ak koot ne koateekyi kaineng'ung';

³⁹ igas anyun eng' kipsengwet eng' oldang'ung' ole imenye, saaennywa ak soomutikwak, iyachi anyun icheek kiit ne machei ak inyochi kaat piiguk che ki koyaun tengekto.”

⁴⁰ Ara anyun, ee Kamuktaindennyu, asaain ale, ingogeer konyeguk ak ingogas itiiguk saaet ne ki saaei eng' yuto.

⁴¹ “Ara anyun, ng'eet, ee Kamuktaindet ne po Toroornatet, nyoo oli imuung'ee, inyee ak moingetap kimnateng'ung'. Ingolaach tisiiguk yetunet, ee Kamuktaindet ne po Toroornatet, ak ingoboiboitu piiguk che tiliileen eng' myeeindo.

⁴² Ee Kamuktaindet ne po Toroornatet, ameiste togeetap neng'ung' ne iilaat. Ibwaat rireenosyegap Daudi otwogindeng'ung'.”