2 ATEPTAP PEETUUSYEK 4 - BUKUIT NE TILIIL Sireet ne Dutero Kanon

Tuguuk che kindo Hekaluut

¹ Ki yai kogeny kaptisisyetap sugunonik, ki mitainik sogool koindonyi, ko mitainik sogool tebeesindanyi, ak ki mitainik ang'wan ak kebeberyat kooindap tononennyi.

² Ki yai nyanjet ne kitanyi ne po mitainik ang'wan ak kebeberyat, kong'etee taban agoi taban, ne ki kitainganat, ak ki mitainik aeng' ak robo kooindap tononennyi; ak kimi mireiywot ne po mitainik taman ak somok ak nusu.

³ Ak kimi itoonwegap eiik ng'wonyutap mireiywot, che kiyiem kotuiyo, che po mitainik ang'wan ak nusu, che kiyiemei nyanjanooto. Ki aeng' eichooto, che ki kitanyi, ye ki kitanyi nyanjet.

⁴ Kiga tonone nyanjanooto itoonwegap eiik, taman ak aeng', kogeerei somogu murot kaataam, kogeerei somogu cherongo, kogeerei somogu murot tai, kogeerei somogu kong'asiis: ak kitonone paragunnywa nyanjanooto, ak ki keer sugulumwekwak oriit.

⁵ Ak ki aechin tebeesindanyi ak nyigiisindap euut; ak ki kiyai mireiywondennyi kogergeit ak mireiywotap kigombet, ko uu taapteet ne kaiye: ak kiyamegei ak debeisyek eliphuusyek lo.

⁶ Ak ki yai taabook taman che eecheen, ak ki inde muut komostap eutap tai, ak ki inde muut komostap murot kaataam, si kiuunse; ki kiuune chooto tuguuk che po kagoochinoik che kibeelei: ago ki po nyanjet tisiik si kounegei.

⁷ Ak ki yai keelyek taman che po tait eng' thahabu ko uu ng'atuutyet ne ki king'at agobo tuguuchooto; ak ki inde Hekaluut oriit, ki inde muut komostap eutap tai, konde muut komostap murot kaataam.

⁸ Ak ki yai kogeny mesosyek taman, ak konde Hekaluut, ki inde muut komostap eutap tai, konde muut komostap murot kaataam. Ak ki yai taabook pogol che mengeechen che po thahabu.

⁹ Ak ki yai kogeny seremutap tisiik, ak seremut ne oo, ak kereiywek che po seremut, ak koliige sugunonik kereiywegap kurgotikwak.

¹⁰ Ak ki inde nyanjanooto komostap tai, kogeer kong'asiis, kotokyigei murot tai.

¹¹ Ak ki yai Huram tereenik, ak kechigosyek che eecheen, ak taabook che mengeechen. Ki iges anyun Huram poisyet ne ki yachi laitoryat Solomon eng' kootap Kamuktaindet:

¹² tolochik aeng', ak pagulisyek, ak metowek aeng' che ki mi paragutap tolochichooto; ak karichooto aeng' regerotiin, kotuch pagulisyechooto aeng' che ki mi paragutap tolochik;

¹³ ak itoonwegap logoek pogol ang'wan che po karichooto aeng' regerotiin; ortinwek aeng' che po logoek che po karnet age tugul ne ki kireger, kotuch pagulisyechooto aeng' po metowek che ki mi paragutap tolochik.

¹⁴ Ki yai kogeny ng'echerok ak taabookwak che eecheen, che ki mi ng'echerochooto,

¹⁵ nyanjanooto agenge, ak itoonwegap eiik taman ak aeng' che ki mi kurereetap nyanjanooto.

¹⁶ Ak ki yai kwandap Huram tereenik ak icheek, ak kechigosyek che eecheen, ak kariik che kirutunee panyeek, ak tuguukyik tugul, koyachi Laitoryat Solomon kobunji kootap Kamuktaindet ne Toroor, kiyae sugunonik che sitatiin.

¹⁷ Ki yai laitoryat tuguuchooto eng' Atebweetap Jordan, eng' ole mi meneet eng' kwenutap Sukoth ak Sereda.

¹⁸ Ki yai anyun Solomon tuguuchuuto tugul eng' chaang'indo: amu ma imuuch chii konai nyigiisindap sugunonik.

¹⁹ Ak ki yai Solomon tuguuk tugul che ki mi kootap Kamuktaindet, kapkorosutap thahabu, ak mesosyek che ki tebee magatiinik che itabaanatiin;

²⁰ kiyae thahabu che tiliileen keelyegap taisyek kobooto taisyekwak, si kobiit kolaldos eng' taitap koot ne po oriit, ko uu ye ki king'at;

²¹ ak kiyae thahabu, thahabu ne ma purugot ak kiy, taaptook, ak taisyek, ak kanameiywek;

²² ak magasisyek, che tilei ole lalei eng' taisyek, ak taabook che mengeechen, ak kechigosyek, ak tereenik che ki ibe maat, kiyae chooto thahabu che tiliileen: ak ki po thahabu ole ki kibunei kebendi ko, ak kereiywegap kurgotikyik che po oriit che po ole-tiliil miising', ak kereiywegap kurgotigap koot, nooto Hekaluut.