2 ATEPTAP PEETUUSYEK 34 - BUKUIT NE TILIIL Sireet ne Dutero Kanon

Laitornatetap Josiah

¹ Ki po Josiah kenyiisyek sisiit ye ki tau kolaitorani; ak ki laitoran kenyiisyek sosom ak agenge eng' Jerusalem.

² Ak ki yai ne myee eng' taitap Kamuktaindet ne Toroor, ak kiwendote ortinwegap Daudi kwandanyi, ama masta kwo eutap tai anan ne po kaataam.

Koesyoi Josiah otetap kamuktaik alak

³ Amu eng' kenyiitap sisiit ne po laitornatennyi, ye kita ko ming'in, kotoi kocheeng' Kiptaiyat Kamuktaindetap Daudi kwandanyi: ak eng' kenyiitap taman ak aeng' kotoi kotiliil Judah ak Jerusalem koisto komoswek che torooreen, ak Aserik, ak kanamonik che ki kiwai ak kanamonik che ki kitany.

⁴ Ak kibut kapkorosusyegap Baalik eng' tainnyi; ak koluul kanamonik che po asiista che ki miitei paragunnywa; ak kituatui Aserik, ak kanamonik che ki kiwai ak kanamonik che ki kitany, ak kong'a koek temburyek ak koseerchi kereeriisyegap icheeget che kieng'ji.

⁵ Ak ki peel kawegap tisiik eng' kapkorosusyekwak, ak kotiliil Judah ak Jerusalem.

⁶ Ak ki yachi ko uu nooto nganasoogap Manasseh ak Ephraim, ak Simion, agoi Naphtali, ak komoswek tugul che po karatwekwak.

⁷ Ak kibut kapkorosusyek, ak kong'a Aserik ak kanamonik che ki kiwai ak kanamonik che ki kitany, koek temburyek, ak koluul kanamonik tugul che po asiista eng' emet komugul ne po Israel, yeityo koweek Jerusalem.

Bukuitap Ng'atuutik

⁸ Ak eng' kenyiitap taman ak sisiit ne po laitornatennyi, ye kiga kotiliil emet ak koot, koyookto anyun Sapan weeriitap Asalia, ak Maaseia pounindetap nganaseet, ak Joah weeriitap Joahas siriindetap tuguuk che piitu, koteech ole ki kobutok eng' kootap Kamuktaindet ne Toroor Kamuktaindennyi.

⁹ Ak ki pwa ole mi Hilkiah, tisiindet ne oo, ak kogoochi fedhaisyek che ki kiibu kobwa kootap Kamuktaindet, che kiga koyum Lawiik, riibiigap kurgeet, che ki kiyumune Manasseh ak Ephraim, ak Israel tugul che ki kong'et, ak che po Judah tugul ak Benjamin ak che po piik che ki menyei Jerusalem.

¹⁰ Ak ki igoochi kiboitiinik che kitononjin kootap Kamuktaindet ne Toroor; ak ki igoito kiboitiinik che kiboisyei eng' kootap Kamuktaindet ne Toroor si kobiit kechobe ak keteege ole kiga kobutok eng' koot;

¹¹ ki igoochi musogik ak teegik, koale koik che kigewai, ak pagoinik che ki kituiyote, ak che kiyae pambanigap kooriik che kiga kobut laitorinigap Judah.

¹² Ak ki yai pichooto poisyet koek piik che kiyani: ak kandoigap pichooto ko ki Jahat ak Obadiah, Lawiik eng' weeriigap Merari; ak Zekariah ak Mesulam eng' weeriigap Kohat, che ki ichirchiri poisyet: ak Lawiik alak, che ki utaatiin eng' putetap kibugandinik.

¹³ Ak ki pou kogeny piik che kilaei milosyek, ak ki ichirchiri tugul che kiyaei poisyet age tugul: ak kimi Lawiik che ki Siriik ak kiptainik ak riibiigap kurgotik.

¹⁴ Ak ye kingo nem fedhaisyek che kiga kiip kobwa kootap Kamuktaindet ne Toroor, konyoor Hilkiah tisiindet bukuitap Ng'atuutigap Kamuktaindet ne Toroor che ki koonu Musa.

¹⁵ Ak ki wolji Hilkiah Sapan siriindet, koleenji, “Kaanyooru bukuitap Ng'atuutik eng' kootap Kamuktaindet ne Toroor. Ak ki igoochi Hilkiah Sapan bukuinooto.

¹⁶ Ak ki ipchi Sapan laitoryat bukuinooto, ak ki leenji laitoryat kogeny, Yaei otwogiguk kiit age tugul ne kemwachi.

¹⁷ Ak ki koip fedhaisyek tugul che ki kinyoorchi kootap Kamuktaindet ne Toroor, ak kogochi riibiik, ak kiboitiinik.”

¹⁸ Ak ki mwachi Sapan siriindet laitoryat koleenji, “Kagoono Hilkiah tisiindet bukuit.” Ak kisooman Sapan bukuinooto eng' taitap laitoryat.

¹⁹ Ak kingo kas laitoryat ng'aleegap ng'atuutichooto, kobet ngoroikyik.

²⁰ Ak ki ng'at laitoryat Hilkiah, ak Aikam weeriitap Sapan, ak Abdon weeriitap Mikah, ak Sapan siriindet, ak Asaiah otwogindetap laitoryat, koleenji,

²¹ Oba oteebunena Kamuktaindet ne Toroor, ak agobo piik che ki ng'et eng' Israel ak Judah, agobo ng'aleegap bukuit ne kogenyoor: amu oo nereeknatetap Kamuktaindet ne Toroor ne roong'jinech, amu ma riip kwanisyekyok ng'olyootap Kamuktaindet ne Toroor, koyai ko uu tugul che ki kisirchi bukuini.

²² Ki pa anyun Hilkiah ak icheek che ki iyookto laitoryat, kap Hulda chebyoset ne maotyot, osotyotap Shallum weeriitap Tokat, weeriitap Hasra, riibindetap ngoroik; (ki menyei Jerusalem nganaseet ne po aeng';) ak komwachi ko uu nooto.

²³ Ak ki leenji icheek, Kamwa Kamuktaindet ne Toroor, Kamuktaindetap Israel ko uu ni, kole, “Omwachi chiito ne kaiyokwok obwa ole ami, oleenji,

²⁴ kamwa Kamuktaindet ne Toroor ko uu ni, kole, ‘Ogeero, aipchini yaityet yuto, ak icheek che menyei olito, chubisyosyek tugul che ki kisirchi bukuit ne kagesoman eng' taitap laitoryatap Judah:

²⁵ amu ki kometa, ak ki kobeelji nyamdutik kanamonik, si kobiit kotacha anereech eng' poisyonik tugul che po eunekwak; nooto anyun, karoong'jigei nereegekyuk yuto, ama kimisi.

²⁶ Ago oleenji laitoryatap Judah, ne kagoyokwok obwa oteepse Kamuktaindet ne Toroor, Kamwa Kamuktaindet ne Toroor, Kamuktaindetap Israel ko uu ni, kole: Eng' ng'aleechooto kaigas,

²⁷ amu kitangus muguleldang'ung', ak ki iming'ingei eng' taitap Kamuktaindet, ye kegas ng'aleekyik che nereekyin yuto, ak piik che menyei olito, ak iming'inigei eng' tainnyu, ak igereer ngoroiguk, ak iriir eng' tainnyu; ko kaagasun agane, mwaei Kamuktaindet ne Toroor.

²⁸ Keero, ayumin iwe ole mi kwanisyeguk, ak iwe kerering'ung' eng' kaalyeet, ama keerei konyeguk yaityet tugul ne aipchini koroni, kobooto piik che menyei. Ak ki ipchin laitoryat ng'olyoot kogeny.’ ”

Kileeliti Kayanjinet

²⁹ Koyookto anyun laitoryat kiyum poisyek tugul che po Judah ak Jerusalem.

³⁰ Ak kitogosta laitoryat kootap Kamuktaindet ne Toroor, kobooto piik tugul che po Judah ak piik che ki menyei Jerusalem, ak tisiik, ak Lawiik, ak piik tugul, che eecheen ak che mengeechen: ak kosoman ng'aleek tugul che po bukuitap arorutyet ne ki kinyooru eng' kootap Kamuktaindet ne Toroor.

³¹ Ak ki tonon laitoryat eng' komostanyi, ak koyai arorutyet eng' taitap Kamuktaindet ne Toroor, koosup Kamuktaindet ne Toroor, ak koriip ng'atuutikyik, ak paornatosyekyik, ak kayomisutikyik, eng' muguleldanyi tugul, ak eng' saboondanyi tugul, koosup ng'aleegap arorutyet che ki kisirchi bukuini.

³² Ak ki ng'at piik tugul che ki mi Jerusalem ak Benjamin kotononso koyan ng'aleechooto. Ak ki yai che ki menyei Jerusalem ko uu kayomisetap Kamuktaindet, Kamuktaindetap kwanisyekwak.

³³ Ak ki isto Josiah tuguuk tugul che kiwechei eng' emotinwek tugul che po Israel, ak kong'at piik tugul che po Israel kootis, koot Kamuktaindet ne Toroor Kamuktaindennywa. Ma meto pichooto koosup Kamuktaindet ne Toroor, Kamuktaindetap kwanisyekwak, eng' peetuusyekyik tugul.