2 ATEPTAP PEETUUSYEK 33 - BUKUIT NE TILIIL Sireet ne Dutero Kanon

Laitornatetap Manasseh

¹ Ki po Manasseh kenyiisyek taman ak aeng' ye ki tau kolaitorani; ak ki laitoran kenyiisyek konom ak muut eng' Jerusalem.

² Ki yai ne ya eng' taitap Kamuktaindet ne Toroor, kosuubi tuguuk che kiwechei che po pororyosyek che kigaon Kamuktaindet ne Toroor eng' taitap piigap Israel.

³ Ki teech komoswek che torooreen che kiga kobut kwandanyi Hezekiah, kiteekyi Baalik kapkorosusyek ak koyai Aserot. Kigutung'ji tuguuk tugul che po kipsengwet ak koot chooto.

⁴ Ki teech kapkorosusyek eng' kootap Kamuktaindet ne Toroor, ne ki mwa Kamuktaindet ne Toroor agobo nooto kole, “Tebee kainennyu Jerusalem koigeny.”

⁵ Ak kiteekyi kapkorosusyek tuguuk tugul che po kipsengwet, eng' seremusyechooto aeng' che po kootap Kamuktaindet ne Toroor.

⁶ Ak ki igoito kogeny lagokyik kobun maat eng' atebweetap weeriitap Hinom: ak king'orso ak ki isogis, ak ki yai ponisyet, ak ki ng'alaal ak che poisyee oik ak pooniik: ki yai yaityet ne oo eng' taitap Kamuktaindet ne Toroor, kotach ineendet konereech.

⁷ Ak ki inde kiit ne ki kiwai ne po kanamwet ne ki yai ineendet, kootap Kamuktaindet, ne ki mwachi `Kamuktaindet Daudi ak Solomon weeriinnyi, agobo koyooto, koleenji, “Andoi kainennyu koigeny kooi, ak Jerusalem, ne ki alewen eng' ortinwek tugul che po Israel:

⁸ amaistoi kogeny keldap Israel eng' emet ne ki aaroorchi kwanisyekwak: ngot koriip koyai tugul che ki ang'at icheek eng' Musa, ng'atuutik tugul ak etanutik ak kayomisutik.”

⁹ Ak ki igoochi anyun Manasseh Judah ak piik che ki menyei Jerusalem, koyai tengekto kot koyai yaityet kosiir pororyosyek che king'em Kamuktaindet ne Toroor eng' taitap piigap Israel.

Kowalaksei Manasseh

¹⁰ Ak ki ng'alaalji `Kamuktaindet ne Toroor Manasseh ak piikyik; ago ki ma mage kiy.

¹¹ Komutyi anyun `Kamuktaindet ne Toroor icheek kiptainigap lugeet ne po laitoryatap Assyria che ki imut Manasseh ko rataat eng' nyororosyek ak mugurek, ak komut ineendet kwo Babilon.

¹² Ak kingo mi eng' nyalilda kosa Kamuktaindet ne Toroor Kamuktaindennyi, ak koming'ingei miising' eng' taitap Kiptaiyat Kamuktaindetap kwanisyekyik.

¹³ Ak ki sa, ak ki kigasyi; ki kas Kamuktaindet ne Toroor soomennyi, ak ki imut ineendet kogeny konyo Jerusalem ole mi laitornatennyi. Konai anyun Manasseh kole Kamuktaindet ne Toroor ko Kamuktaindet.

¹⁴ Kingo pata niito koteech irimeet ne po saang' ne po nganaseetap Daudi eng' komostap cherongo ne po Gihon, eng' atebweet, eng' ole kichutei eng' ormariichetap njireenik; ak kiyiem Ophel, ak koteech kogoit miising'; ak ki inde kiptainik che nyigoonen nganasook tugul che ng'ootaatiin che po Judah.

¹⁵ Ak ki isto kanamonik che too ak kanamwet ne ki mi kootap Kamuktaindet ne Toroor ak kapkorosusyek tugul che kiga koteech eng' tulweetap kootap Kamuktaindet ne Toroor, ak eng' Jerusalem, ak kowiirchi saang'utap nganaseet.

¹⁶ Ak ki teech kaptisisyetap Kamuktaindet ne Toroor ak kogoitoe yooto tiseiywegap kagoochinoigap kaalyeet ak che po kongoi, ak kong'at Judah koot Kamuktaindet ne Toroor Kamuktaindetap Israel.

¹⁷ Agos kita koeny piik tiseiywek eng' komoswek che torooreen, ago kieng'jine yooto Kamuktaindet ne Toroor Kamuktaindennywa kityo.

Meetap Manasseh

¹⁸ Ak poisyonik che ng'etunotiin che po Manasseh, ak saaet ne ki sa Kamuktaindennyi, ak ng'aleegap keerik che ki ng'alaalji ineendet eng' kainetap Kamuktaindet ne Toroor, Kamuktaindetap Israel, ogeero, siraatiin kobooto poisyonigap laitorinigap Israel.

¹⁹ Ki kisirchi agine saaennyi, ak ole kigasyindo Kamuktaindet, ak tengektanyi tugul ak kachiliilutyennyi, ak komoswek ole ki teech komoswek che torooreen, ak kolumda Aserik ak kanamonik che ki kiwai, ye ki tomo koming'ingei; ogeero, siraatiin chooto eng' kitabuutap ateptap peetuusyegap Hosai.

²⁰ Ki ru anyun Manasseh kobooto kwanisyekyik, ak ki kitup eng' koonnyi: ak ki laitoran weeriinnyi Ammon kogeer ineendet.

Laitornatet ak meetap Ammon

²¹ Ki po Ammon kenyiisyek tiptem ak aeng' ye ki tau kolaitorani; ak ki laitoran kenyiisyek aeng' eng' Jerusalem.

²² Ak ki yai ne ya eng' taitap Kamuktaindet ne Toroor ko uu ye ki yai kwandanyi Manasseh: ak kieng'ji Ammon tiseiywek kanamonik tugul che ki kiwai che kiga koyai kwandanyi Manasseh, ak koot.

²³ Ak ki ma iming'ingei eng' taitap Kamuktaindet ne Toroor ko uu ye ki iming'ingei kwandanyi Manasseh; ago kites Ammon koyai chalwokto miising' kosiir.

²⁴ Ak kichaam ineendet otwogikyik, ak kobar ineendet eng' koonnyi.

²⁵ Ak ki par piigap emonooto pichooto tugul kichaam laitoryat Ammon; ak ki ieet piigap emet Josiah weeriinnyi koek laitoryat kogeer ineendet.