2 ATEPTAP PEETUUSYEK 31 - BUKUIT NE TILIIL Sireet ne Dutero Kanon

Keng'emei kapkorosusyegap kanamonik

¹ Kingo kagogeskei chuuto tugul, koba nganasoogap Judah Israel tugul che ki mi koba kobut tolochik, koep Aserik ak kobut komoswek che torooreen ak kapkorosusyek eng' Judah tugul ak Benjamin, eng' Ephraim ak Manasseh, kot kong'em kogees tugul. Ki week anyun lagok tugul che po Israel koba nganasookwak, kwo chii tugul ole mi tuguukyik.

² Kipchei Hezekiah riipsosyegap Tisiik ak Lawiik kobee riipsosyekwak, chii tugul ko uu poisyennyi, Tisiik ak Lawiik agobo kagoochinoik che kibeelei ak kagoochinoik che po kaalyeet, kootis eng' ormariichogap nganaseetap Kamuktaindet ne Toroor ak koweekta kongoi ak kolas.

³ Ki ng'at laitoryat agine kebeberta ne po tuguukyik koek kagoochinoik che kibeelei, kagoochinoik che kibeelei karon ak koskoleny, kagoochinoik che kibeelei che po sabatoisyek, che po ye kaleel arawet, ak che po igoorwek che ki king'at, ko uu ye ki kisir eng' ng'atuutigap Kamuktaindet ne Toroor.

⁴ Ki ng'at kogeny piik che ki menyei Jerusalem kogoito kebeberta ne punjin Tisiik ak Lawiik, si kobiit kogoochigei ng'atuutyetap Kamuktaindet ne Toroor.

⁵ Ak kingo kasak ng'atuutyet eng' emet, kogoito piigap Israel eng' chaang'indo tongoanigap peek, che po divaik, mwanik, kumyat, ak che po rurateet tugul ne po emet; ak ki ip kebebertap taman ne po tuguuk tugul eng' chaang'indo.

⁶ Ak ki ip ak icheek piigap Israel ak Judah che ki menyei nganasoogap Judah, kebebertap taman ne po eiik ak keechiirek, ak kebebertap taman ne po tuguuk tugul che itabaanatiin che kiga kigoochi Kamuktaindet ne Toroor Kamuktaindennywa, ak ki iyumat.

⁷ Ki toi koyumat eng' arawetap somok, ak kogees eng' arawetap tisap.

⁸ Kingo nyo Hezekiah ak pounik ak kogeer kayumanik, kolas Kamuktaindet ne Toroor ak piikyik Israel.

⁹ Ki teebee anyun `Hezekiah Tisiik ak Lawiik agobo kayumanichooto.

¹⁰ Ki wolji Azariah tisiindet ne oo ne po kootap Zadok koleenji, “Kobooch ngap kotoi piik koip kagoochinoik kobwa kootap Kamuktaindet ne Toroor, ko ki kiamisye koyamech ak ki kituch che chaang': amu ki koberuur `Kamuktaindet ne Toroor piikyik; ak che kong'et ko chu chaang'.”

¹¹ Ki ng'at anyun Hezekiah kechop kooriik che mengeechen eng' kootap Kamuktaindet ne Toroor; ak ki chop.

¹² Koip anyun kobwa ko eng' kayaneet, kagoochinoik, kebeberwegap taman ak tuguuk che itabaanatiin. Ki pounindet Konaniah Lawindet ne ki pou icheek, ak ki ne po aeng' Semei ng'eetap kamet.

¹³ Ak Jehiel, Azaziah, Nahath, Asahel, Jerimoth, Josabad, Eliel, Ismachiah, Mahath, ak Benaiah, ko ki riibiik che ki indochin Konaniah ak Shimei ng'eetap kamet, ko uu ye ki ng'at Laitoryat Hezekiah, ak Azariah pounindetap kootap Kamuktaindet.

¹⁴ Ki pou Kore weeriitap Imnah Lawindet, ne ki riibindetap kurgeet ne mi kong'asiis, kagoochinoigap chamyet che po Kamuktaindet, si kopcheita, kagoochinoigap Kamuktaindet ne Toroor che kinamjin parak, kobooto tuguuk che tiliileen miising'.

¹⁵ Kirubei ineendet Eden, Miniamin, Jeshua, Semaiah, Amariah, ak Shekaneiah eng' nganasoogap tisiik, eng' poisyennywa ne ki kigoochi si kogoochi tupchosyekwak kobee riipsosyekwak, kogoochi che eecheen ak che mengech kogergeit,

¹⁶ koma pooto icheek che ki kiit kobee tetuutigap ibinwek che ki kosiirto che po murenik, kobooch che po kenyiisyek somok ak che siirei, age tugul ne kiwendi kootap Kamuktaindet ne Toroor, ko uu ye yamegei ak poisyetap peetuut age tugul, eng' otisyennywa eng' poisyennywa, kobee riipsosyekwak.

¹⁷ Ki kiyai koitet ne po tisiik ko uu kooriigap kwanisyekwak; chooto po Lawiik che po kenyiisyek tiptem ak che siirei ko uu poisyennywa, kobee riipsosyekwak.

¹⁸ Ki kiit tisiik kobooto lagokwak che mengeechen, osotikwak, weeriikwak, ak tiibiikwak eng' tuiyet komugul kobee ibinwek che ki kosiirto; amu ki yai ne myee ye ki itabaanigei eng' poisyennywa.

¹⁹ Ak uu nooto agine eng' weeriigap Aron, tisiik, che ki menyei mbareenigap emotinwek che kiyagisye che po nganasookwak, eng' nganaseet age tugul, piik ko uu kainaikwak koginyol kopchechi murenik tugul che po tisiik ak chii age tugul eng' che po Lawiik che ki kiit kobee tetuutigap ibinwek che ki kosiirto.

²⁰ Ki yai anyun ko uu nooto Hezekiah eng' Judah komugul; ki yai ne myee ak ne litit ak ne po iman eng' taitap Kamuktaindet ne Toroor Kamuktaindennyi.

²¹ Ak eng' poisyet age tugul ne ki toi koyai eng' otisyetap kootap Kamuktaindet, ak eng' ko uu ng'atuutik ak eng' kayomisutik, kocheeng' Kamuktaindennyi, kogiyai eng' muguleldanyi komugul, ak kibor.