2 ATEPTAP PEETUUSYEK 30 - BUKUIT NE TILIIL Sireet ne Dutero Kanon

Paska

¹ Ki iyookto anyun Hezekiah keguur Israel tugul ak Judah, ak ki sirchi paronok Ephraim ak Manasseh, kole kobwa kootap Kamuktaindet ne Toroor eng' Jerusalem, koboiboiyenji paska ne po Kamuktaindet ne Toroor, Kamuktaindetap Israel.

² Amu kiga komwa laitoryat kobooto pounik ak tuiyet tugul eng' Jerusalem, kole koriip paska eng' arawet ne po aeng'.

³ Ki ma imuuch koyai eng' peetuusyechooto, amu kitom koyam tisiik che kiga koanyinygei, anan koyumjigei piik Jerusalem.

⁴ Ak ki myeiit kioto eng' taitap laitoryat ak tuiyet tugul.

⁵ Kogimit anyun ng'atuutyet kole kemwaita eng' Israel tugul, kobooch Beer-sheba agoi Dan, kole kobwa koboiboiyenji paska ne po Kamuktaindet ne Toroor, Kamuktaindetap Israel eng' Jerusalem; amu ki tomo koriibei piik che chaang' ko uu nooto ko uu ye ki kisir.

⁶ Ki ip anyun piik che kiga kiyookto, paronok che ki punu laitoryat ak pounikyik, koba Israel tugul ak Judah, ko uu ng'atuutyetap laitoryat, koleenji, “Okweek piigap Israel, oweekyigei Kamuktaindet ne Toroor, Kamuktaindetap Abraham, Isak ak Israel, si komuuch ineendet koweekyigei piik che ki ng'et, che kichililso eng' okweek eng' eunegap laitorinigap Assyria.

⁷ Amoigei kwanisyekwok ak tupchosyekwok, che ki ingelelji Kamuktaindet ne Toroor, Kamuktaindetap kwanisyekwak, kot kobagaakta icheek koek che kikwong'ee, ko uu ye ogeere.

⁸ Amoegu anyun che uui kaat, ko uu ye ki uu kwanisyekwok; ago ogoochigei Kamuktaindet ne Toroor, ak obe oldanyi ole-tiliil, ne ki kotabaan kobunji koigeny. Oboisyechi Kamuktaindet ne Toroor Kamuktaindeng'wong', si koistoenogei nereegekyik che koroomen.

⁹ Amu ngo weekyigei Kamuktaindet ne Toroor, kosichei tupchosyekwok ak lagokwok rireenet eng' taitap icheeget che kiluul icheek, ak koweek kogeny kobwa emoni. Amu tinyei Kamuktaindet ne Toroor Kamuktaindeng'wong' myeeindo ak rireenet, ama ituktochinok patai ngot oweekyigei ineendet.”

¹⁰ Ki pun anyun piik che kiga kiyookto nganaseet age tugul eng' emetap Ephraim ak Manasseh, agoi Zebulun; ago kirorechi, kochot icheek, ak kochurachur.

¹¹ Agos ki iming'ingei alak che po Asher, Manasseh ak Zebulun ak kobwa Jerusalem.

¹² Ki mi kogeny eutap Kamuktaindet Judah si kogoochi icheek muguleldo agenge koyai ng'atuutyetap laitoryat ak pounik eng' ng'olyootap Kamuktaindet ne Toroor.

Igoortap Paska

¹³ Ki iyumjigei Jerusalem tuiyet ne ki oo kot si koriip igoortap magatiinik che ma kinde mermereek eng' arawetap aeng'.

¹⁴ Kong'eetyo anyun ak koisto kaptisisyosyek che ki mi Jerusalem, ak kapkorosusyek tugul che po nyamdutik ak kowiirchi kererutap Kidron.

¹⁵ Ki eeny anyun aarwetap paska eng' peetuutap taman ak ang'wan eng' arawetap aeng'. Ki ililanso Tisiik ak Lawiik, ak koanyinygei ak ki ip kagoochinoik che kibeelei kobwa kootap Kamuktaindet ne Toroor.

¹⁶ Ak ki tononso eng' komostanywa ko uu ye kiga king'at, ko uu Ng'atuutyetap Musa chiitap Kamuktaindet; ki isisye tisiik korotiik che kitaachei eng' eunegap Lawiik.

¹⁷ Amu kimi che chaang' eng' tuiyet che kitom koanyinygei; ko uu nooto anyun ko ki poisyetap Lawiik koeng'ji paska chiito age tugul ne ki ma ko tiliil, koanyinyji Kamuktaindet ne Toroor.

¹⁸ Amu kitom koanyinygei che chaang' eng' pichooto, che chaang' che ki po Ephraim, che po Manasseh, che po Issakar, ak che po Zebulun, ago ki am paska ama ko uu ye ki kisir. Amu kiga sa Hezekiah agobo icheek kole, “Ingonyochi kaat Kamuktaindet ne Toroor ne myee chii age tugul,

¹⁹ ne chobei muguleldanyi kocheeng' Kamuktaindet, Kamuktaindet ne Toroor, Kamuktaindetap kwanisyekyik, agot ngo tomo ki anyiny ko uu kaanyinyetap ole-tiliil.”

²⁰ Ki kasyi `Kamuktaindet ne Toroor Hezekiah ak kosoop piik.

²¹ Ak ki riip piigap Israel che ki mi Jerusalem igoorto ne po magatiinik che ma kinde mermereek peetuusyek tisap eng' kagasetapkei ne oo; ak ki ilas Kamuktaindet ne Toroor Lawiik ak tisiik peetuut age tugul, kotyenjin Kamuktaindet ne Toroor eng' kibugandinik che cheitos miising'.

²² Kicheer anyun `Hezekiah Lawiik tugul che ki ineetatin eng' otisyetap Kamuktaindet ne Toroor. Koamis anyun eng' igoorto tugul eng' peetuusyek tisap, kogoitoi tiseiywek che po kaalyeet, ak komwachin kongoi Kamuktaindet ne Toroor, Kamuktaindetap kwanisyekwak.

²³ Ki chamyechi anyun tuiyet komugul kole kota koriip igoorto peetuusyek alak tisap; ak ki riip peetuusyek alak tisap eng' kagasetapkei.

²⁴ Amu ki igoochi `Hezekiah laitoryatap Judah tuiyet kiruugik eliphuut ak keechiirek eliphuusyek tisap koek kagoochinoik; ak ki igoochi pounik tuiyet kiruugik eliphuut ak keechiirek eliphuusyek taman. Ki ianyinygei anyun tisiik eng' chaang'indo.

²⁵ Kiboiboitu tuiyet komugul ne po Judah, kobooto Tisiik ak Lawiik ak tuiyet tugul ne ki punu Israel, ak toek che ki punu emetap Israel ak che ki menyei Judah.

²⁶ Ki piit poiboiyet ne oo anyun eng' Jerusalem, amu kobooch eng' peetuusyegap Solomon weeriitap Daudi laitoryatap Israel ko ki tomo kobiit kiit ne uu nooto eng' Jerusalem.

²⁷ Ki ng'eetyo anyun Tisiik ak Lawiik ak koberuur piik; ak ki kigas kutinnywa, ak kitogosta saaennywa kwo oldanyi ne tiliil eng' kipsengwet.