2 ATEPTAP PEETUUSYEK 3 - BUKUIT NE TILIIL Sireet ne Dutero Kanon

¹ Ki toi anyun Solomon koteech kootap Kamuktaindet ne Toroor eng' Jerusalem eng' tulweetap Moriah, ole ki mong'jine Kamuktaindet ne Toroor kwandanyi Daudi, ki chop ineendet eng' ole ki ng'at Daudi, eng' rwanyut ne kiboorsee ne po Ornan Jebusindet.

² Ki toi koteekso eng' kenyiitap ang'wan ne po laitornatennyi, arawet ne po aeng' eng' peetuutap aeng'.

³ Chu anyun lumeiywek che ki lumda Solomon agobo teekseetap kootap Kamuktaindet. Ki ek koindo mitainik tiptem ak tisap ak ki ek tebeesindo mitainik sogool.

⁴ Ki aechin tebeesindap koot ak kooindap keterut ne ki mi taitap koot, ki mitainik sogool, ak ki ek kooindap tononennyi mitainik konom ak ang'wan. Ki iliige thahabu che tiliileen komostap oriit.

⁵ Kitetee koot ne oo keetiigap piribirinik che ki iliige thahabu che korooron ak kiwachinot itoonwegap tiironigap sosik ak nyororosyek.

⁶ Ak kilelesonji koot eng' koik che po kamanuutyet ne oo si kogararanit. Ak thahabu che kiboisyee ko ki punu Parbaim.

⁷ Ki iliige kogeny thahabu koot, kimurtoinik, tugatugik, inatusyek, kereiywegap kurgotikyik, ak kiwachi inatusyek itoonwegap karubisyek.

⁸ Ki teech koot ne tiliil miising'. Ki aechin tebeesindap koot ak koindonyi, ki ek mitainik sogool. Ki iliigote thahabu che korooron, che ki itei tanisyek tiptem.

⁹ Ki ek nyigiisindap kipchumarisyek shekelisyek konom che po thahabu. Ak ki iliige thahabu kooriik che po parak.

¹⁰ Ki inde itoonwek aeng' che po kerubisyek koot ne tiliil miising' ak koliige thahabu.

¹¹ Ki ek mitainik sogool kooindap kebebaigap kerubisyek tuwai. Koindap kebepchet agenge ko ki mitainik aeng' ak robo, ak ki itei inaatutap koot, ak ki mitainik aeng' ak robo kebepchet age, ak kitiinyegei kebepchetap kerubit age ak ne po age.

¹² Ak ki mitainik aeng' ak robo kebepchetap kerubit age, ak ki itei inaatutap koot, ak ki mitainik aeng' ak robo kebepchet age agine, kotiinyegei ak kebepchetap kerubit age.

¹³ Kiga uitogei kebebaigap kerubisyechuuto tuwai koit mitainik sogool. Ki tonondos eng' keelyekwak ak kiga tokyigei togoochikwak koot.

¹⁴ Kinap angeet ne kioiye koot, che buluu ak che arusen ne piriir, ak che piriireen ak katanit ne karaaran, ak kinapchi chooto kerubisyek.

Tolochik aeng' che po sugunonik

¹⁵ Ak ki yai kogeny tolochik aeng' eng' taitap koot, che po mitainik taman ak lo kooindap tononennyi, ak ki mitainik aeng' ak robo, metit age tugul ne ki mi tuguuchooto parak.

¹⁶ Ki yai nyororosyek eng' koot ne po oriit, ak konde paragusyegap tolochik. Ki yai kora itoonwegap logoek pogol agenge ak koiywachi paragutap sirimwechooto.

¹⁷ Ki lumda tolochichooto eng' taitap Hekaluut, ki lumda age eng' komostap tai ak kolumda age eng' komostap kaataam. Kiguure ne ki mi komostap tai Jakin ak koguure ne ki mi komostap kaataam Boaz.