2 ATEPTAP PEETUUSYEK 29 - BUKUIT NE TILIIL Sireet ne Dutero Kanon

Laitornatetap Hezekiah

¹ Ki tau Hezekiah kolaitorani ko po kenyiisyek tiptem ak muut; ak ki laitoran kenyiisyek tiptem ak sogool eng' Jerusalem. Ki kiguure kamennyi Abijah cheptap Zekariah.

² Ak ki yai ne myee eng' taitap Kamuktaindet ne Toroor, ko uu tugul che ki yai Daudi kwandanyi.

³ Ki yaat kurgotigap kootap Kamuktaindet ne Toroor, eng' kenyiit ne po tai ne po laitornatennyi, eng' arawet ne po tai, ak koteech kogeny ole kiga kobutok.

⁴ Ki imut Tisiik ak Lawiik kobwa ko, ak koyumji icheek komosta ne paraa eng' kong'asiis,

⁵ ak koleenji, “Ogas, okweek Lawiik; oanyinyge, ak oanyiny kootap Kamuktaindet ne Toroor, Kamuktaindetap kwanisyekyok, ak omaande tuguugap simdo eng' ole-tiliil.

⁶ Amu ki kochiliil kwanisyekyok ak koyai ne ya eng' taitap Kamuktaindet ne Toroor Kamuktaindennyo, ak ki kometo ineendet ak kowelelgei kometo ole menyei Kamuktaindet ne Toroor, ak kotuktoochi patai.

⁷ Kigoger kurgotigap keterut, ak komis taisyek, mata kobeel nyamdutik anan kogoito tiseiywek che kibeelei eng' ole-tiliil, kogoochi Kamuktaindetap Israel.

⁸ Ki nyoonji anyun nereegegap `Kamuktaindet ne Toroor Judah ak Jerusalem, ak ki igoito icheek ketoortaat koba komosi ak komosi, koek kwang'utyet, ak koek che kireenyei ko uu ye ogeere eng' konyekwok.

⁹ Kigebar kwanisyekyok eng' rotoogap chok, ak kigeluul weeriikyok ak tiibiikyok ak osotikyok amu niito.

¹⁰ Ara anyun, mi muguleldanyu kiyomiske ak Kamuktaindet ne Toroor, Kamuktaindetap Israel, si keistoenech nereegekyik che koroomen.

¹¹ Weeriikyuk, amata oegu che ma igiilegei, amu ki lewenok Kamuktaindet ne Toroor otonone tainnyi, oboisyechi ineendet ak oegu kiboitiinikyik, ak obeel nyamdutik.”

¹² Ki ng'eetyo anyun Lawiik, Mahath weeriitap Amashai, ak Joel weeriitap Azariah, eng' weeriigap Kohatik; ak eng' weeriigap Merari, Kish weeriitap Abdi, ak Azariah weeriitap Jehallelel; ak eng' Gershonik, Joah weeriitap Zimmah, ak Eden weeriitap Joah;

¹³ ak eng' weeriigap Elizaphan, Shimri ak Jeuel; ak eng' weeriigap Asaph, Zekariah ak Mattaniah;

¹⁴ ak eng' weeriigap Herman, Jehuel ak Shimei; ak eng' weeriigap Jeduthun, Semaiah ak Uzziel.

¹⁵ Ki iyum tupchosyekwak ak koanyinygei, ak koba ko kotiliil kootap Kamuktaindet ne Toroor ko uu ng'atuutyetap laitoryat, kosuubi ng'aleegap Kamuktaindet ne Toroor.

¹⁶ Ki pa tisiik komosta ne po oriit miising' eng' kootap Kamuktaindet ne Toroor, koba kotiliil, ak komaanda tugul che po simdo che kiganyoorchi Hekaluutap Kamuktaindet ne Toroor, ak koip koba seremutap kootap Kamuktaindet ne Toroor. Ki nam Lawiik ak koip koba timiin ak kowiirchi kererutap Kidron.

¹⁷ Ki toi anyun koanyinyis eng' peetuut ne po tai ne po arawet ne po tai, ak ki pwa eng' peetuut ne po sisiit ne po arawet, keterutap Kamuktaindet ne Toroor. Ki ianyiny kootap Kamuktaindet ne Toroor peetuusyek sisiit, ak ki iges eng' peetuutap taman ak lo eng' arawanooto po tai.

Kitabaani hekaluut

¹⁸ Ki pa anyun ole mi Hezekiah laitoryat eng' ko ak koleenji, “Kagitiliil koot tugul ne po Kamuktaindet ne Toroor, kaptisisyet ne po kagoochinoik che kibeelei kobooto tereenikyik tugul, ak meesetap magatinigap kabartaet kobooto tuguukyik tugul.

¹⁹ Kogechop ak ki anyiny tuguuk tugul che kiga wiirta Laitoryat Ahaz eng' laitornatennyi ye kiga kobistoe; keero, mi taitap kaptisisyetap Kamuktaindet ne Toroor.”

²⁰ Ki ng'eet anyun Hezekiah laitoryat karon inne ak koyum pounigap nganaseet ak kotogosta kootap Kamuktaindet ne Toroor.

²¹ Kiget kiruugik tisap, mengichik tisap, aaregap keechiir tisap ak kwesik tisap koek kagoochinetap tengekto ne po laitornatet ak ne po ole-tiliil ak ne po Judah. Ki ng'at `ineendet tisiichooto ko weeriigap Aron kogoito chooto eng' kaptisisyetap Kamuktaindet ne Toroor.

²² Ki eeny anyun kiruugik, ak kotaach tisiik korotiik, ak koisee kaptisisyet; kieny mengichik ak koisee korotiik kaptisisyet; ak kieny aaregap keechiir ak koisee korotiik kaptisisyet.

²³ Kiget kwesigap kagoochinetap tengekto koriik taitap laitoryat ak tuiyet; ak ki igonoor eunekwak paragunnywa.

²⁴ Ki eeny anyun tisiik ak ki igoito korotiikwak eng' kaptisisyet koek kagoochinetap tengekto, si koyai kagaigaet agobo Israel tugul; ko uu ye ki ng'at laitoryat kole kigoito kagoochinet ne kibeelei ak kagoochinetap tengekto agobo Israel tugul.

²⁵ Ki inde Lawiik kootap Kamuktaindet ne Toroor, kotinyei sanisyegap sugunonik che kibirei, kibugandinik ak ketubosyek, ko uu ng'atuutyetap Daudi, ak ne po Gad keerindetap laitoryat, ak maotyot Nathan; amu ki punu ng'atuutyonooto Kamuktaindet ne Toroor eng' maotikyik.

²⁶ Ara kitononso Lawiik kotinyei kibugandinigap Daudi, kotinyei tisiik iryagook.

²⁷ Ki ng'at Hezekiah kigoito kagoochinet ne kibeelei eng' kaptisisyet. Ak ki ngetoi kigoito kagoochinet ne kibeelei, ketoi tyendap Kamuktaindet ne Toroor agine, ak iryagook kobooto kibugandinigap Daudi laitoryatap Israel.

²⁸ Ki ing'uruukso tuiyet tugul, ak kotyenso tyeniik, ak koguut iryagook piik che kuutei; ki yai ko uu nooto agoi kogeskei kagoochinet ne ki kibeelei.

²⁹ Kingo kagogees kagoitoet tugul, kong'uruuk laitoryat kobooto tugul che ki mi ak ineendet ak kolas.

³⁰ Ki ng'at kogeny `Laitoryat Hezekiah ak `pounik, Lawiik kotyenji Kamuktaindet ne Toroor kalasunoik eng' ng'aleegap Daudi ak che po Asaph keerindet. Ara kityen kalasunoik eng' kagasetapkei, ak ki ing'uruukso ak kolas.

³¹ Yeityo kowol Hezekiah kole, “Amu kaotabaanjigei Kamuktaindet ne Toroor, oriigu oibu tiseiywek ak kagoochinoigap kongoi kobwa kootap Kamuktaindet ne Toroor.” Ki ip tuiyet tiseiywek ak kagoochinoigap kongoi; ak tugul che ki chamei eng' mugulelwekwak ko ki ip kagoochinoik che kibeelei.

³² Ak ki ek koitetap kagoochinoik che kibeelei che kiget tuiyet, kiruugik tamanwogik tisap, mengichik pogol ak aaregap keechiir pogol aeng'; ki po chooto tugul kagoochinoik che kibeeljin Kamuktaindet ne Toroor.

³³ Ki ek tuguuk che ki kitabaan eiik pogol lo ak keechiirek eliphuusyek somok.

³⁴ Ago king'ering' tisiik kot koma imuuch koeny kagoochinoik tugul che kibeelei; kotoret anyun Lawiik tupchosyekwak, kot kogeskei poisyonooto, ak agoi koanyinygei tisiik; amu ki lititen mugulelwegap Lawiik che ki chamei koanyinygei kosiir tisiik.

³⁵ Ak ki chaang' kogeny kagoochinoik che kibeelei, kobooto mwanigap kagoochinoigap kaalyeet, kobooto kagoochinoigap tuguuk che kieei che po kagoochinet age tugul ne kibeelei. Ki kitet anyun otisyet eng' kootap Kamuktaindet ne Toroor.

³⁶ Ak ki paibait Hezekiah, kobooto piik tugul, amu otisyonooto kiga chopchi `Kamuktaindet piik; amu kiyaak ng'olyoondonooto eng' yooto.