2 ATEPTAP PEETUUSYEK 28 - BUKUIT NE TILIIL Sireet ne Dutero Kanon

Laitornatetap Ahaz eng' Judah

¹ Ki po Ahaz kenyiisyek tiptem ye ki tau kolaitorani; ak ki laitoran kenyiisyek taman ak lo eng' Jerusalem. Ki ma yai ne myee eng' taitap Kamuktaindet ne Toroor, ko uu Daudi kwandanyi.

² Ago kiwendote ortinwegap laitorinigap Israel, ak ki itang'ji kogeny Baalik kanamonik.

³ Ki peel kogeny nyamdutik eng' atebweetap weeriitap Hinom ak kobeel lagokyik eng' maat, ko uu tuguuk che kiwechei che po pororyosyek, che kigaon Kamuktaindet ne Toroor eng' taitap piigap Israel.

⁴ Ak kieny tiseiywek ak kobeel nyamdutik eng' komoswek che torooreen, eng' tuloonook ak eng' kelutap keetit age tugul ne tuon.

Koterteeri Syria ak Israel piigap Judah

⁵ Ki inde Ahaz anyun `Kamuktaindet ne Toroor Kamuktaindennyi eutap laitoryatap Syria, ak ki iterteer ineendet ak komut tuiyet ne oo ne po piikyik koek luulenik ak komut koba Damasko. Ki kinde ineendet kogeny eunegap laitoryatap Israel, ne ki iterteer ineendet eng' pareet ne oo.

⁶ Ki par Pekah weeriitap Remaliah piik eng' Judah eliphuusyek pogol agenge ak tiptem eng' peetuut agenge, che ki piik che nyigoonen chooto tugul, amu kimeto Kamuktaindet ne Toroor, Kamuktaindetap kwanisyekwak.

⁷ Ak ki par Zikri, chiito ne kiim, ne po Ephraim, Maaseia weeriitap laitoryat, Asrikam pounindetap koot, ak Elkanah ne kirubei laitoryat.

⁸ Kiluul piigap Israel tupchosyekwak eliphuusyek pogol aeng', kwonyiik, weeriik ak tiibiik; ak ki ip parunenik che chaang' eng' icheek koba Samaria.

⁹ Ago kimi maotyotap Kamuktaindet ne Toroor olooto, ne ki kiguure Oded; ak ki wo kotorookta lugeet ne kinyonei Samaria, ak koleenji icheek, “Amu ki nereekyi Kamuktaindet ne Toroor, Kamuktaindetap kwanisyekwok Judah, ko no koinde icheek eunekwok, ak kaobar icheek eng' nereegek che ng'woneen che kagoit kipsengwet.

¹⁰ Ak nguno omache oyai lagogap Judah ak Jerusalem che murenik ak che kwonyiik koek otwogikwok. Ago motinye okweek kachiliilutik che ki ochiliilji Kamuktaindet ne Toroor Kamuktaindeng'wong'?

¹¹ Ogasa anyun, oweech luulenik che kaoluul eng' tupchosyekwok, amu mi paragung'wong' nereegek che ng'woneen che po Kamuktaindet ne Toroor.”

¹² Yeityo kotononso alak eng' kandoigap lagogap Ephraim, Azariah weeriitap Johanan, Berekiah weeriitap Meshillemoth, Jehizkiah weeriitap Shallum ak Amasa weeriitap Hadlai, kogirinda pichooto ki punu lugeet,

¹³ ak koleenji icheek, “Momuuchi omutu luulenik kobwa olito: amu omache oyai kiit ne ibwech kachiliilutyet eng' Kamuktaindet ne Toroor, si kobiit otes tengekwogikyok ak kachiliilutik: amu eecheen kachiliilutikyok, ak miitei nereegek che ng'woneen agobo Israel.”

¹⁴ Ara ki pagaakta anyun murenigap luuget luulenik ak parunenik eng' taitap pounik ak tuiyet tugul.

¹⁵ Ki ng'eetyo anyun piik che ki kimwa kainaikwak ak komut luulenik, ak ki nam tuguuk che kibooru ak kolaaksechine piik tugul che ki mi aach ngor. Ki ilaaksechi icheek ak kolaakyi kweonik, kibai ak konaga koe, ak koiil icheek; ak komute tugul che nyalulyotin sigiroik, komut kobwa Jeriko, nganaseetap tiironigap sosik, agoi ole mi tupchosyekwak, ak koweek anyun koba Samaria.

Koesyoi Assyria kotoret Judah

¹⁶ Ki iyookto eng' peetuusyechooto `Laitoryat Ahaz piik koba kaplaitorinigap Assyria kotoret ineendet.

¹⁷ Amu kigabwa kogeny Edomik kobookyi ak koterteer Judah, ak komut luulenik.

¹⁸ Kiga kobookyi ak icheek Philistiik nganasook che po atebweet, ak che po Judah murot tai. Kiga nam ak komeny Beth-shemesh, Aijalon, Gederoth, Soko kobooto nganasookyik, Timnah kobooto nganasookyik, ak Gimso agine kobooto nganasookyik.

¹⁹ Amu ki iming'in `Kamuktaindet ne Toroor Judah agobo Ahaz laitoryatap Israel, amu ki yai atebosyegap teweernateet eng' Judah, ak kongelelji Kamuktaindet ne Toroor miising'.

²⁰ Ak ki nyoonji ineendet `Tilgath-pilneser laitoryatap Assyria, ak konyaliil ineendet, ma igimit.

²¹ Ki inem Ahaz kebeberta ne ki mi kootap Kamuktaindet ne Toroor, ak ne ki mi kootap laitoryat ak ne po pounik, ak kogoochi laitoryatap Assyria; ago ma toret nooto ineendet.

Tengektap Ahaz

²² Ak kites kosiir kongelelji Kamuktaindet ne Toroor eng' peetuusyegap nyalildanyi, laitoryandaniito Ahaz.

²³ Amu kieng'ji tiseiywek kamuktaigap Damasko, che kibar ineendet; ak ki le, “Amu toreti kamuktaigap laitorinigap Syria icheek, aeng'jini anyun agane icheek, si kobiit kotoreta.” Ago ki ek chooto che king'em ineendet ak Israel tugul.

²⁴ Ki iyum Ahaz tereenigap kootap Kamuktaindet, ak kotui tereenichooto po kootap Kamuktaindet. Kiger kurgotigap kootap Kamuktaindet ne Toroor ak koteekyigei kapkorosusyek eng' luuita age tugul ne po Jerusalem.

²⁵ Ak ki yai komoswek che torooreen eng' nganaseet age tugul ne po Judah, si kobeeljine nyamdutik kamuktaik, ak kotach Kamuktaindet ne Toroor, Kamuktaindetap kwanisyekyik, konereech.

²⁶ Ak poisyonikyik che ng'etunotiin, ak ortinwekyik tugul, che po tai ak che po let, ko siraatiin eng' kitabuutap laitorinigap Judah ak Israel.

²⁷ Ak ki ru Ahaz kobooto kwanisyekyik, ak ki kitupchi nganaseetap Jerusalem, ago ma kisut kwo kereeriisyegap laitorinigap Israel. Ki laitoran Hezekiah weeriinnyi kogeer ineendet.