2 ATEPTAP PEETUUSYEK 27 - BUKUIT NE TILIIL Sireet ne Dutero Kanon

Laitornatetap Jotham

¹ Ki po Jotham kenyiisyek tiptem ak muut ye ki tau kolaitorani; ak ki laitoran kenyiisyek taman ak lo eng' Jerusalem. Ki kiguure kamennyi Jerusha cheptap Zadok.

² Ki yai ne myee eng' taitap Kamuktaindet ne Toroor, ko uu tugul che kiga yai kwandanyi Uzziah: ago ki ma wo Hekaluutap Kamuktaindet ne Toroor. Nganda uu nooto, ko ki testai koyai piik yaitwogik.

³ Ki teech kurgeet ne po meto eng' kootap Kamuktaindet ne Toroor, ak ki yai poisyetap teekseet ne oo eng' inaatutap Ophel.

⁴ Ki teech kogeny nganasook eng' emetap tuloonook che po Judah, ak ki teech irimoik ak teeksosyek che kooen eng' osnosyek.

⁵ Kibargei Jotham ak laitoryatap `lagogap Ammon, ak koterteer icheek. Ak ki igoochi lagogap Ammon ineendet eng' kenyinooto talendaisyek pogol che po fedha, ak keruutik eliphuusyek taman che po nganuuk, ak keruutik eliphuusyek taman che po baale. Ki igoochi ko uu nooto lagogap Ammon ineendet eng' kenyiit ne po aeng' ak ne po somok.

⁶ Ki kimiit anyun Jotham amu ki chop ortinwekyik eng' taitap Kamuktaindet ne Toroor Kamuktaindennyi.

⁷ Ak poisyonik che ng'etunotiin che po Jotham, ak lugosyekyik tugul, ak ortinwekyik tugul, ko siraatiin eng' kitabuutap laitorinigap Israel ak che po Judah.

⁸ Ki po kenyiisyek tiptem ak muut ye ki tau kolaitorani, ak ki laitoran kenyiisyek taman ak lo eng' Jerusalem.

⁹ Ki ru Jotham ak kwanisyekyik ak ki kitupchi nganaseetap Daudi. Ak ki laitoran Ahaz weeriinnyi kogeer ineendet.