2 ATEPTAP PEETUUSYEK 26 - BUKUIT NE TILIIL Sireet ne Dutero Kanon

Laitornatetap Uzziah

¹ Yeityo konam piik tugul che po Judah Uzziah ne ki po kenyiisyek taman ak lo, ak koeet ineendet koek laitoryat kogeer kwandanyi Amasia.

² Ki teech Elot ak koweekyi Judah, ko kagoru laitoryat kobooto kwanisyekyik.

³ Ki po Uzziah kenyiisyek taman ak lo ye ki tau kolaitorani; ak ki laitoran kenyiisyek konom ak aeng' eng' Jerusalem. Ki kiguure kamet Jekilia ne po Jerusalem.

⁴ Ki yai ne myee eng' taitap Kamuktaindet ne Toroor, ko uu tugul che ki yai kwandanyi Amasia.

⁵ Ki igiil muguleldanyi kocheeng' Kamuktaindet eng' peetuusyegap Zekariah, ne ki tinyei kaguiyet agobo ng'ang'utyetap Kamuktaindet; ak eng' peetuusyek tugul che ki cheeng' Kamuktaindet ne Toroor, ko ki iberuur `Kamuktaindet ineendet.

⁶ Ki wo anyun kobargei ak Philistiik, ak kobut irimeetap Gath, ak irimeetap Jabne ak irimeetap Ashdod; ak ki teech nganasook eng' Ashdod ak eng' kwenutap Philistiik.

⁷ Kitoret `Kamuktaindet ineendet kobargei ak Philistiik, ak kobargei ak Arabuuk che ki menyei Gur-baal, kobooto Meunik.

⁸ Ki igoochi Amonik Uzziah kagoochinoik, ak ki yom kainennyi agoi kiwotosyegap Misiri; amu kitesak kimnateennyi kot.

⁹ Kogeny, ko ki teech Uzziah teeksosyek che kooen eng' Jerusalem eng' ormariichetap luuita, ak eng' ormariichetap atebweet, ak eng' ole weegegei irimeet, ak kogimit.

¹⁰ Ak ki teech teeksosyek che kooen eng' surkwen, ak ki pal keriingonik che chaang' che po peek, amu ki tinyei tuuga che chaang'; eng' emet ne soi agine, ak eng' warenget. Ki tinyei kabotik ak che riibei logoegap sabibuk eng' tuloonook ak eng' mbareenik che rurtos miising'; amu ki chamei kabatisyet.

¹¹ Ki tinyei kogeny Uzziah lugeet ne po piigap pooryeet, che kigaba paretapkei eng' kweanaik ko uu koiitennywa ne kiiti Jeiel siriindet ak Maaseia pounindet, kondochin Hananiah, ne ki agenge eng' kiptainigap laitoryat.

¹² Koitet komugul ne po kandoigap kooriigap kwanisyek, piik che kiimeen ak ko nyigoonen, ko ki eliphuusyek aeng' ak pogol lo.

¹³ Ki mi eunekwak kiplugotinik che ineetatin eliphuusyek pogol somok ak tisap ak pogol muut, che ki yai lugeet eng' kimnateet ne oo, si kotoret laitoryat kobargei ak puunik.

¹⁴ Kichopchi Uzziah lugeet tugul, long'onik, ng'otwek, kutonook, kariigap tegeet, kwangok ak koik che ki wiirtoe porowet.

¹⁵ Ak ki yai injinisyek eng' Jerusalem, che ki toi koyai piik che ng'oomen, kotebee teeksosyek che kooen ak irimoik, che kimwoktoe kipchabonik ak ki wiirtoe koik che eecheen. Ak ki yom ole loo kainennyi, amu ki kitoret miising' kot kogimit.

Menateet ak kabutet

¹⁶ Ago ye kingo kagogimiit, koloskei eng' muguleldanyi kot koyai ne ya, ak ki ingelelji Kamuktaindet ne Toroor Kamuktaindennyi; amu ki wo Hekaluutap Kamuktaindet ne Toroor kobeel nyamdutik eng' kapkorosutap nyamdutik.

¹⁷ Ki wo Azariah tisiindet koosup ineendet, kobooto tisiik che nyigoonen tamanwogik sisiit che po Kamuktaindet ne Toroor kwo ko.

¹⁸ Ki kirinda Uzziah laitoryat ak koleenji, “Manyoljin, Uzziah, ibeelji Kamuktaindet ne Toroor nyamdutik, ago nyoljin tisiik weeriigap Aron, che ki kitabaan kobeel nyamdutik. Mande eng' ole-tiliil; amu kengelel; ma egu teegisto niito eng' inyee ne punu Kamuktaindet ne po Toroornatet.”

¹⁹ Ki nereech anyun Uzziah. Ki tinyei ineendet tereet eng' eunnyi ne kibeelee nyamdutik; ak ye kinereekyin tisiik, komang'une mogondosaik togeennyi eng' taitap tisiik eng' kootap Kamuktaindet ne Toroor, eng' ye neegitee kapkorosutap nyamdutik.

²⁰ Ye ki keer Azariah tisiindet ne oo, ak tisiik tugul, kogeer ko kagomang'une mogondosaik togeennyi. Ki oon ineendet eng' yooto kochokyi, ak kichaakta agine komanda, amu kiga kobir `Kamuktaindet ne Toroor ineendet.

²¹ Ki am mogondosaik Uzziah laitoryat agoi peetuutap meennyi, ak ki meny koot ne itabaanat, amu ki tinyei mogondosaik; amu ki kiistoe ineendet kootap Kamuktaindet ne Toroor. Ki pou Jotham weeriinnyi piigap kootap laitoryat, korwookyin piigap emet.

²² Ak poisyonik che ng'etunotiin che po Uzziah, che po tai ak che po let, ko kisir maotyot Isaiah, weeriitap Amos.

²³ Koru anyun Uzziah ak kwanisyekyik; ak ki kitup ineendet ak kwanisyekyik, eng' kooretap kereeriisyegap laitorinik; amu ki le, “Tinyei mogondosaik.” Ki laitoran Jotham kogeer ineendet.