2 ATEPTAP PEETUUSYEK 25 - BUKUIT NE TILIIL Sireet ne Dutero Kanon

Laitornatetap Amasia

¹ Ki po Amasia kenyiisyek tiptem ak muut ye ki tau kolaitorani; ak ki laitoran kenyiisyek tiptem ak sogool eng' Jerusalem. Kainetap kamennyi ko ki Jehoadan ne po Jerusalem.

² Ki yai ne myee eng' taitap Kamuktaindet ne Toroor, ago ma eng' muguleldo ne ititaat.

³ Kingo kagogimiit laitornatennyi, kobar otwogikyik che ki par kwandanyi laitoryat.

⁴ Ago ma par lagokwak, ki yai ko uu ye ki kisir eng' Ng'atuutik che mi bukuitap Musa, ko uu ye kiga ng'at Kamuktaindet ne Toroor kole, “Mabegu kwanisyek agobo lagok, anan kobek lagok agobo kwanisyekwak; ago meei chii tugul agobo tengektanyi.”

Kibookyin pororyetap Edom

⁵ Kogeny, ko ki iyum Amasia piigap Judah, ak kotet icheek kobee kooriigap kwanisyekwak, kondochin kiptainigap eliphuusyek ak kiptainigap pogolwogik Judah tugul ak Benjamin: ak kiit icheek kobooch che po kenyiisyek tiptem ak che siirei, ak ki ek piik eliphuusyek pogol somok che ki kilewen, che imuuchi koba lugeet, che ki imuuchi konam ng'otwek ak long'onik.

⁶ Ki sir kogeny piik eliphuusyek pogol che kiimeen ak ko nyigoonen eng' Israel eng' talendaisyek pogol che po fedha.

⁷ Ago ki nyo chiitap Kamuktaindet ole mi, ak koleenji, “Ee laitoryat, amobe kobooto lugeetap Israel; amu ma mi Kamuktaindet ne Toroor kobooto Israel, chooto ko lagok tugul che po Ephraim.

⁸ Ago ngot imache iwe, iwe, inyiganitu, igimitu eng' lugeet: wiirtoin Kamuktaindet eng' taitap puunyoot; amu tinyei Kamuktaindet kimnateet kotoret, ak kotinyei kimnateet kowiirta.”

⁹ Ak ki leenji `Amasia chiitap Kamuktaindet, Ara si kelyonji talendaisyek pogol che ki agoochi lugeetap Israel? Kowol anyun chiitap Kamuktaindet kole imuuchi Kamuktaindet ne Toroor kogoonin che siirei chuuto miising'.

¹⁰ Koweekta anyun Amasia icheek, nooto ko lugeet ne kiga nyo oldanyi, ne ki punu Ephraim, koweek koba kaa: kolalyo anyun nereegekwak kot agobo Judah, ak ki week koba kaa eng' nereegek che ng'woneen.

¹¹ Konyiganit anyun Amasia, ak kondochi piikyik, kwo Atebweetap Munyuk, ak kobar che po lagogap Seir eliphuusyek taman.

¹² Ak kiluul `lagogap Judah piik alak eliphuusyek taman, ak komut kobwa paragutap rwandet, ak kotoorta eng' rwandanooto parak, ak kitonogis tugul.

¹³ Ago ki par piigap lugeet che kiweektoi Amasia kole amaba tugul lugeet, nganasoogap Judah kobooch Samaria kot koit Beth-horon, ki par piik eliphuusyek somok, ak koip parunenik che chaang'.

¹⁴ Ak kingo punu Amasia pareetap Edomik, koip kanamonigap lagogap Seir, ak kolumda koek kanamonikyik, ak kong'uruukyi icheek eng' tainnywa, ak kobeelji nyamdutik.

¹⁵ Kolalyo anyun nereegegap Kamuktaindet ne Toroor agobo Amasia, ak koyookyi maotyot ne ki mwachi ineendet koleenji, “Amu nee si icheeng' kanamonigap piik, che tomo kosar piikwak eng' eung'ung'?”

¹⁶ Ak ye kita kong'alaaldos ak ineendet, koleenji laitoryat, Tos kogindein iegu kirwoogindetap laitoryat? Muite; amu nee si imache kebarin? Kimuita anyun maotyot, ak ki le, Angen ale, kagotil Kamuktaindet kole kong'emin, amu kaiyai ni, ama igas ng'aleekyuk.

Kibookyin Israel

¹⁷ Korwooch anyun Amasia laitoryatap Judah, ak ki iyookto piik koba kap Joash weeriitap Jehoahas weeriitap Jehu laitoryatap Israel, koleenji, Nyoo ketuiye kegeerge togoch.

¹⁸ Ak ki iyookyi Joash laitoryatap Israel piik Amasia laitoryatap Judah, koleenji, “Ki iyookto ng'olyoot kateet ne rutei piich ne ki mi Lebanon koyookyi tarakwet ne ki mi Lebanon, koleenji igoochi cheptong'ung' weeriinnyu kotun: ak kisiirto tyondo ne po timiin ne ki mi Lebanon, ak kotyech katanooto rutei piich.”

¹⁹ Imwae ile, Keero, ki ibar Edom; ak itoroorin muguleldang'ung' si ilasuge: tebee koong'ung'; amu nee si icheeng'jigei nyalilda, si ibut inyee, kobooto Judah?

²⁰ Ago ma cham Amasia kogas; amu ki punu Kamuktaindet kioto, si kobiit konde icheek eunegap puunikwak, amu ki cheeng' kanamonigap Edom.

²¹ Ki togosta anyun Joash laitoryatap Israel; ak kigeergei ineendet ak Amasia laitoryatap Judah togoch eng' Beth-shemesh, ne po Judah.

²² Ak ki kiterteer Judah eng' taitap Israel; ak ki mwei chii tugul kwo emainnyi.

²³ Ak ki imut Joash laitoryatap Israel Amasia laitoryatap Judah weeriitap Joash weeriitap Jehoahas, eng' Beth-shemesh, ak komut ineendet konyo Jerusalem, ak kobut irimeet ne po Jerusalem kobooch ormariichetap Ephraim agoi ormariichetap luuita, mitainik pogol ang'wan che po euut.

²⁴ Ak ki ip thahabu tugul ak fedha, ak tuguuk tugul che ki mi kootap Kamuktaindet kobooto Obed-edom, ak konoraik che po kootap laitoryat, kobooto luulenik ak icheek, ak ki week kwo Samaria.

²⁵ Ak kita kosap Amasia weeriitap Joash laitoryatap Judah kenyiisyek taman ak muut kingo pata meetap Joash weeriitap Jehoahas laitoryatap Israel.

²⁶ Ak poisyonik che ng'etunotiin che po Amasia, che po tai ak che po let, ogeero, tos ma siraatiin eng' kitabuutap laitorinigap Judah ak Israel?

²⁷ Kichaam `piik Amasia eng' Jerusalem, kobooch ngap komasta kobagaakta Kamuktaindet ne Toroor; ak ki mwei kwo Lakish: ago ki iyookto piik koosup ineendet koba Lakish, ak kobar ineendet eng' olooto.

²⁸ Ak kilaune ineendet paraisisyek, ak kotupchi nganaseetap Judah kobooto kwanisyekyik.