2 ATEPTAP PEETUUSYEK 23 - BUKUIT NE TILIIL Sireet ne Dutero Kanon

Laitornatetap Joash

¹ Ki nyoor nyiganateet Jehoiada eng' kenyiitap tisap, ak ki yai koyomiset ak kiptainigap pogolusyek, Azariah weeriitap Jeroham, Ishmael weeriitap Jeohanan, Azariah weeriitap Obed, Maaseia weeriitap Adaiah, ak Elisapat weeriitap Zikri.

² Kibendat icheek koyom Judah komugul, ak koyum Lawiik eng' nganasook tugul che po Judah kobooto kandoigap kwanisyegap Israel, ak ki pwa Jerusalem.

³ Ak ki iyomiskei ak laitoryat tuiyet komugul eng' kootap Kamuktaindet. Ak ki leenji, “Ingolaitoran weeriitap laitoryat, ko uu ye ki mwa Kamuktaindet ne Toroor agobo weeriigap Daudi.

⁴ Ni kiit ne oyae: egu riibiigap kurgotik kebeberta agenge eng' somok eng' okweek, che pwoonei eng' peetuutap sabato, che po Tisiik ak Lawiik;

⁵ kotebee kebeberta agenge eng' somok kootap laitoryat; kotebee kebeberta agenge eng' somok kurgeetap lumeiywot: ak ingotebee piik tugul seremusyegap kootap Kamuktaindet ne Toroor.

⁶ Ago amochamji chii konyo kootap Kamuktaindet ne Toroor, kobatee tisiik, ak Lawiik che otisyei; pwoonei icheeget amu tiliileen: ago riibei piik tugul riipseetap Kamuktaindet ne Toroor.

⁷ Si koyiem Lawiik laitoryat, kotinyei chii tugul kariikyik eng' eunnyi ak chii age tugul ne nyoonei ko, kebarei: ak otebi ak laitoryat ye nyoonei ko ak ye mandoi.”

⁸ Koyai anyun Lawiik ak Judah tugul kiit ne kang'at icheek Jehoiada tisiindet: komut chii tugul piikyik, piik che pwoonei eng' sabato, ak che kimandoi eng' sabato; amu ma pagaakta Jehoiada tisiindet riipsosyechooto.

⁹ Ak ki igoochi Jehoiada tisiindet kiptainigap pogolwogik ng'otwek, ak long'onik che mengeechen, ak long'onik che eecheen, che ki po Laitoryat Daudi, che ki mi kootap Kamuktaindet.

¹⁰ Ak kitet piik tugul, kotinyei chii tugul kariikyik eng' eunekyik, kobooch komostap tai ne po koot agoi komostap kaataam ne po koyooto, ye neegitee kaptisisyet, ak koot, koyiem laitoryat.

¹¹ Komong' anyun weeriitap laitoryat, ak kolaakyi naaryeet, ak kogoochi paornateet, ak konde ineendet koek laitoryat: ak ki iil Jehoiada ak weeriikyik, ineendet; ak kole ingosap laitoryat.

¹² Ak kingo kas Athaliah polatetap piik che rwaoti ak kolasu laitoryat, konyo ole mi piik eng' kootap Kamuktaindet ne Toroor:

¹³ Ak ki keerot, ogeero, ki tononi laitoryat eng' ole neegitee toloitanyi eng' ye kibunei kebendi oriit, komi kiptainik ak iryagook ye mi laitoryat; ak kiboiboitu piik tugul che po emet, ak koguutei iryagook; kibutei ak icheek tyeniik kibugandinik, ak kondochin tyendap kalasunet. Kogereer anyun Athaliah ngoroikyik, ak kole, “Chaamset! Chaamset!”

¹⁴ Komut anyun Jehoiada tisiindet kiptainigap pogolwogik, kobwa saang', che kiga kinde koboi lugeet, koleenji, “Omaande ineendet eng' kwenutap piik; ak kibarei eng' rotwetap chok chiito ne isubi ineendet.” Amu ki le tisiindet, “Amobarchi kootap Kamuktaindet ne Toroor.”

¹⁵ Koistochigei anyun icheek ineendet; ak ki wo ye kichutei ormariichetap paraisiit ne po kootap laitoryat; ak ki parchi yooto.

Wolutik che ki yai Jehoiada

¹⁶ Koyomiskei anyun Jehoiada ak piik tugul, ak laitoryat, kole koek piigap Kamuktaindet ne Toroor.

¹⁷ Ak ki pa piik tugul kootap Baal, kobut, ak kobut kapkorosusyekyik, ak kotuatui kanamonikyik, ak kobar Matan tisiindetap Baal eng' taitap kapkorosusyek.

¹⁸ Ak ki ng'at Jehoiada poisyonigap kootap Kamuktaindet ne Toroor koboi tisiik, Lawiik, che kiga kopchei Daudi eng' kootap Kamuktaindet ne Toroor, si kogoitoi kagoochinoik che kibeelei che po Kamuktaindet ne Toroor, ko uu ye ki kisir eng' ng'atuutigap Musa, si koboiboitu ak kotyendos, ko uu ng'atuutyetap Daudi.

¹⁹ Ak ki inde riibiik kurgotigap kootap Kamuktaindet ne Toroor, si ma wo ko chii age tugul ne ma tiliil eng' kiy age tugul.

²⁰ Ak ki nam kiptainigap pogolwogik, ak piik che taagunotiin, ak pounigap piik, kobooto piik tugul che po emet, si komut laitoryat kochoorgei eng' kootap Kamuktaindet ne Toroor: ak ki pun ormariichet ne toroor kot koit kootap laitoryat, ak konde laitoryat kotebee ng'echereetap laitornatet ne po pounateet.

²¹ Koboiboitu anyun piik tugul che po emet, ak ki siis nganaseet: ak ki par Athaliah eng' rotwetap chok.