2 ATEPTAP PEETUUSYEK 22 - BUKUIT NE TILIIL Sireet ne Dutero Kanon

Koegu Ahasia laitoryatap Judah

¹ Ki inde piik che ki menyei Jerusalem Ahasia weeriinnyi ne ming'in koek laitoryat kogeer ineendet: amu ki par kweanet ne kigabwa nganaseet kobooto Arabuuk, weeriik tugul che eecheen. Ara ki laitoran anyun Ahasia weeriitap Jehoram eng' Judah.

² Ki po kenyiisyek artam ak aeng' Ahasia ye ki tau kolaitorani; ak ki laitoran kenyiit agenge eng' Jerusalem. Kainetap kamennyi ko ki Athaliah cheptap Omri.

³ Kiwendote agine ortinwegap kootap Ahab, amu ki ek kamennyi kaneetindennyi ne ki ineet ineendet koyai ne ya.

⁴ Ki yai ne ya eng' taitap Kamuktaindet ne Toroor, ko uu ye ki yai kootap Ahab; amu ki kaneetikyik che ki ineeti ineendet, kingo kagome kwandanyi, agoi ng'emisyennyi.

⁵ Ki isup kaneetisyennywa, ak koba ak Jehoram weeriitap Ahab laitoryatap Israel kobargei ak Hazael laitoryatap Syria eng' Ramoth-gilead. Ki iguoten `piigap Syria Joram.

⁶ Ki week konyo kinya eng' Jezreel, mook che ki kitoor eng' Ramah, ye ki paregei ak Hazael laitoryatap Syria. Ak kichoortagei Azariah weeriitap Jehoram laitoryatap Judah kwo kogeer Jehoram weeriitap Ahab eng' Jezreel, amu kimyani.

⁷ Ki punu Kamuktaindet ng'emisyetap Ahasia, amu ki wo ole mi Joram. Kingo it ineendet, koba ak Jehoram kobargei ak Jehu weeriitap Nimshi ne kiga koiil Kamuktaindet ne Toroor si kobiit kobar kootap Ahab kogees.

⁸ Ye kita korwookyin Jehu kootap Ahab, konyoor pounigap Judah ak weeriigap tupchosyegap Ahasia, che kiboisyechin Ahasia, ak ki par icheek.

⁹ Ki cheeng' Ahasia, ak ki nam ineendet ye ki ung'egei eng' Samaria. Ki kimutyi Jehu ak ki par ineendet. Kitup `icheek ineendet, amu ki le “Ineendet ko weeriitap Jehoshaphat, ne ki cheeng' Kamuktaindet ne Toroor eng' muguleldanyi tugul.” Ak ma sich kootap Ahasia kimnateet konam laitornatet.

Korebei Athaliah laitornatet

¹⁰ Kingo keer Athaliah kametap Ahasia kole ki kome weeriinnyi, kong'eet ak kobar iyoteet tugul ne po kaplaitoryat ne po kootap Judah.

¹¹ Ago ki imut komweito Jehoshabeat, cheptap laitoryat, Joash weeriitap Ahasia, kochoor ineendet komut eng' ole mi weeriigap laitoryat, chu ki kibarei, ak konde ineendet ak cheplakwet koot ne kiruei eng' koot oriit. Kouny anyun ineendet `Jehoshabeat cheptap Laitoryat Jehoram, osotyotap Jehoiada tisiindet, amu ki chepkametap Ahasia, si ma par Athaliah.

¹² Ki tebi kobooto icheek ko ung'aat eng' kootap Kamuktaindet kenyiisyek lo, ye ki laitorani Athaliah eng' emet.