2 ATEPTAP PEETUUSYEK 21 - BUKUIT NE TILIIL Sireet ne Dutero Kanon

¹ Ki ru Jehoshaphat ak kwanisyekyik ak ki kitupchi ole ki kitupchi kwanisyekyik eng' nganaseetap Daudi. Ki laitoran anyun Jehoram weeriinnyi kogeer ineendet.

Laitornatetap Jehoram

² Ki tinyei ineendet weeriik alak che tupcho, weeriigap Jehoshaphat chooto ko: Azariah, Jehiel, Zekariah, Azariah, Mikael ak Shepatiah. Chuuto tugul ko ki weeriigap Jehoshaphat laitoryatap Israel.

³ Ki igoochi `kwandanywa icheek kagoochinoik che eecheen, che po fedha, che po thahabu ak che po tuguuk che po kamanuutyet ne oo, kobooto nganasook che ng'ootaatiin che po Judah; ago ki igoochi `ineendet laitornatet Jehoram amu ki taita.

⁴ Kingo kagonam Jehoram pounatetap kwandanyi ak kogimitkei, kobar tupchosyekyik tugul eng' rotwetap chok ak alak che po pounigap Israel.

⁵ Ki po Jehoram kenyiisyek sosom ak aeng' ye ki tau kolaitorani ak ki laitoran kenyiisyek sisiit eng' Jerusalem.

⁶ Kiwendote ortinwegap laitorinigap Israel, ko uu ye ki yai kootap Ahab, amu ki itun cheptap Ahab. Ki yai ne ya eng' taitap Kamuktaindet ne Toroor.

⁷ Agot nganda ki uu nooto koma cham Kamuktaindet ne Toroor kong'em kootap Daudi amu kayomiset ne kiga koyomisyi Daudi, ak ko uu ye ki iarorchi ineendet ak lagokyik kole igoochin ineendet tait koigeny.

⁸ Ki ingelelji `Edomik pounatetap Judah eng' peetuusyekyik ak ki ieetyigei laitoryat ne pou icheek.

⁹ Ki wo anyun Jehoram kolanda kobooto kiptainikyik kotinyei kariisyekyik tugul. Ki ng'eet kemoi ak kobookyi Edomik che kigayiem ineendet kobooto kiptainigap kariisyek.

¹⁰ Ki ingelel anyun Edomik kobagaakta pounatetap Judah agoi rani. Ki ingelel agine Libna eng' peetuusyechooto, amu kiga kometo Kamuktaindet ne Toroor, Kamuktaindetap kwanisyekyik.

¹¹ Ma nooto kityo, ago ki teech kogeny komoswek che torooreen eng' tuloonoogap Judah, ak koyai che ki menyei Jerusalem koibotkei, ak kobeet Judah.

¹² Ki nyoonji ineendet parweet ne ki punu maotyot Elijah, koleenji, “Kamwa ko uu ni Kamuktaindet ne Toroor, Kamuktaindetap Daudi kwandang'ung', kole: Amu ma iwendote ortinwegap Jehoshaphat kwandang'ung' anan ortinwegap Asa laitoryatap Judah,

¹³ ago ki iwendote ortinwegap laitorinigap Israel, ak ki igoochi Judah ak che menyei Jerusalem koyai ibeetapkei, ko uu ye ki yai kootap Ahab. Ki ibar kogeny tupchosyeguk che po kootap kwandang'ung', che kigoigoi kosiirin,

¹⁴ ara anyun, parei Kamuktaindet ne Toroor piiguk, lagoguk, osotiguk ak tuguuguk tugul, eng' koroito ne oo.

¹⁵ Inyooru myando ne oo eng' moet, agoi komong' agutaniguk eng' myanooto, peetuut age tugul.”

¹⁶ Ki ing'eet Kamuktaindet ne Toroor nereeknatetap Philistik ak ne po Arabuuk che menyei ole neegitee Ethiopik kobargei ak Jehoram.

¹⁷ Ki togos icheek kobookyi Judah, ak kobut koba oriit ak koip tuguuk tugul che kinyoor eng' kootap laitoryat, kiluul weeriikyik ak icheek, ak osotikyik kot koma ng'etyi weeriit agot agenge, kobatee Jehoahas, weeriit ne ming'in eng' tugul.

¹⁸ Kingo pata chuuto tugul, kobir `Kamuktaindet ne Toroor ineendet eng' myando eng' agutanikyik ne ma inyaaksei.

¹⁹ Kingo pata kenyiisyek aeng'u komong' agutanikyik amu myandanyi, ak kime eng' myanwogik che ng'woneen. Ma peelji piikyik kiy ineendet, ko uu ye ki kibeelji kwanisyekyik.

²⁰ Ki po kenyiisyek sosom ak aeng' ye ki tau kolaitorani, ak ki laitoran eng' Jerusalem kenyiisyek sisiit. Kime anyun, koma komachei chii ineendet ak ki kitupchi nganaseetap Daudi, ago ma eng' kereeriisyegap laitorinik.