2 ATEPTAP PEETUUSYEK 20 - BUKUIT NE TILIIL Sireet ne Dutero Kanon

Keyachin lugeet piigap Syria

¹ Kingo pata niito, kobwa kobargei ak Jehoshaphat piigap Moab ak piigap Ammon, ak alak eng' Amonik.

² Ki pwa piik alak komwachi Jehoshaphat, koleenji, “Ipookyinin tuiyet ne oo ne punu nyanjet pitoniin eng' Syria; ak mi Hasason-tamar (nooto ko En-gedi).”

³ Ki iyweis anyun Jehoshaphat, ak ko ki ilgei kocheeng' Kamuktaindet ne Toroor, ak komwaita karugutetapkei eng' Judah tugul.

⁴ Ki iyumgei Judah tugul kocheeng' toreteet eng' Kamuktaindet ne Toroor; ki pwa eng' nganasook tugul che po Judah kocheeng' Kamuktaindet ne Toroor.

⁵ Ki tonon anyun Jehoshaphat eng' tuiyetap Judah ak ne po Israel, eng' kootap Kamuktaindet ne Toroor, eng' taitap seremut ne leel,

⁶ ak ki le, “Ee Kamuktaindet ne Toroor, Kamuktaindetap kwanisyekyok, tos ma ii Kamuktaindet eng' kipsengwet? Tos ma ii pounindet ne pou laitornatosyek tugul che po pororyosyek? Mi eung'ung' kimnateet ak kamuktaet, ne ma mi ne imuuchi kogirinden.

⁷ Tos ma ioon inyee, ee Kamuktaindennyo, piik che ki menyei emoni eng' taitap piiguk Israel, ak igoochi kobunji iyoteetap Abraham chorweng'ung' koigeny?

⁸ Ki meny icheek olito, ak ki koteegun ole-tiliil agobo kaineng'ung', koleen,

⁹ ‘Ngot konyonjech yaityet, rotwetap chok, kirwooget, anan koroito anan rubeet, ketononie eng' taitap kooi, ak eng' taing'ung', amu mi kaineng'ung' kooi, ak keriirchin eng' nyalilwogikyok, ak igaseech ak isarwech.’

¹⁰ Keer nguno anyuno, lagogap Ammon, Moab ak che po tulweetap Seir, che ki ma ichamji Israel kobookyi ye kingo pwanei komong'u eng' emetap Misiri, ago kirop taban, ama par.

¹¹ Keer anyuno, ole kagogeerundawech, kobwa komaandech eng' poroteng'ung', ne ki igoonech kobunjech.

¹² Ee Kamuktaindennyo, merwookyini? Amu ma ki tinyei kamuget kebarge ak tuiyoni oo kagobokyech. Ma kingen kiit ne kiyaei, ago inyalin konyekyok.”

¹³ Kitononso Judah tugul eng' taitap Kamuktaindet ne Toroor, kobooto manyurunikwak, osotikwak ak lagokwak.

¹⁴ Ki nyoonji anyun Kabuusetap Kamuktaindet ne Toroor Jaasyel weeriitap Zekariah, weeriitap Benaiah, weeriitap Jeiel, weeriitap Mattaniah, Lawindet, ne po weeriigap Asaph, eng' kwenutap tuiyet.

¹⁵ Ki le ineendet, “Oeb iit okweek tugul kap Judah ak che omenye Jerusalem, kobooten inyee Laitoryat Jehoshaphat: kamwaiwok Kamuktaindet ne Toroor ko uu ni, kole: ‘Amoiywei anan oaragense amu lugoni oo; amu ma neng'wong' lugeet, ago po Kamuktaindet.

¹⁶ Orektee mutai obargei ak icheek. Togosu icheek eng' tegeiyetap Sis; ak onyoorchini ye igeesunegei atebweet, taitap surkwen ne po Jeruel.

¹⁷ Ma okweek che oyae lugoni. Otetkei, otononse, si ogeer yetunetap Kamuktaindet ne Toroor ne mi kobootok, ee Judah ak Jerusalem. Amoiyweisye, anan oaragense. Oba opookyi icheek mutai; amu mi Kamuktaindet ne Toroor kobootok.’ ”

¹⁸ Ki ing'uruuk anyun Jehoshaphat kot kotiiny togeet ng'wony, ak kap Judah tugul ak piigap Jerusalem ak ki ibutyi taitap Kamuktaindet ne Toroor ak kolas Kamuktaindet ne Toroor.

¹⁹ Kitononso Lawiik, ak che po lagogap Kohatik, ak che po lagogap Koraik, kolas Kamuktaindet ne Toroor, Kamuktaindetap Israel, eng' kutit ne oo miising'.

²⁰ Ki ng'eetyo karon miising', komusta surkwen ne po Tekoa. Ye kingo ta kobendi, kotonon Jehoshaphat ak kole, “Ogasa, ee Judah, ak che omenye Jerusalem! Oyan Kamuktaindet ne Toroor Kamuktaindeng'wong', si kobiit ogimegitu; oyan maotikyik, si oboor.”

²¹ Kingo kagong'alaal ak piik, kolewen che tyenjin Kamuktaindet ne Toroor, ak kolasu ineendet eng' karaaranindap tiliilindo, komandoi kondoe lugeet, koleen, “Oweekyi Kamuktaindet ne Toroor kongoi, amu po koigeny rireenennyi.”

²² Kingo toi kotyenso ak kolasu, konde `Kamuktaindet ne Toroor piik che ribistos si kobargei ak lagogap Ammon, ak Moab, ak tulweetap Seir, che ki kobwonji kobookyi Judah; ak ki kibar.

²³ Amu kitononso lagogap Ammon ak Moab kobargei ak che ki menyei tulweetap Seir, kobar kogees ak kong'em. Ye kingo kagogees che ki menyei Seir, kotoret chii tugul kobar chiito ne kami tuwai.

²⁴ Kingo it piigap Judah teekseet ne kooi ne kiriipse eng' surkwen, kotoben piik che chaang'; ak kiga kobutyo koek muuswek, ak ki ma komi agot agenge ne kichilil.

²⁵ Kingo nyo Jehoshaphat kobooto piikyik konam tuguuk, konyoor eng' kwenunnywa tuguuk ng'iisyat che po mogornateet ak ngoroik, tuguuk che po kamanuutik che eecheen, che kibut eng' pichooto koipchigei, che kitemenee kola. Ki tar peetuutap somok koibei parunenichooto, amu ki chaang' kot.

²⁶ Ki iyumjigei atebweetap Beraka eng' peetuutap ang'wan; amu eng' olooto ko ki ilas Kamuktaindet ne Toroor. Ki kiguure anyun kainetap yooto Atebweetap Beraka, agoi ra.

²⁷ Ki week tugul che po Judah ak Jerusalem, kondoe Jehoshaphat, kobendi Jerusalem eng' poiboiyet, amu ki igoochi `Kamuktaindet ne Toroor icheek koboiboitu amu puunikwak.

²⁸ Ki pwa Jerusalem kobutonu kibugandinik ak ketubosyek, ak koguutonu iryagook kot koit kootap Kamuktaindet ne Toroor.

²⁹ Ki nam kaiyweisyet ne iywei Kamuktaindet laitornatosyek tugul che po emotinwek, ye kingo kas kole ki par Kamuktaindet ne Toroor puunigap Israel.

³⁰ Ki imuuny anyun pounatetap Jehoshaphat, amu ki igoochi Kamuktaindennyi kamuung'et eng' tabanwek tugul.

Kogesugei laitornatetap Jehoshaphat

³¹ Ara ki laitoran Jehoshaphat eng' Judah. Ki po kenyiisyek sosom ak muut ye ki tau kolaitorani, ak ki laitoran kenyiisyek tiptem ak muut eng' Jerusalem. Kainetap kamennyi ko ki Hasubah cheptap Sili.

³² Kiwendote ortinwegap kwandanyi Asa ak ma masta kometo, ki yai ne myee eng' taitap Kamuktaindet ne Toroor.

³³ Ago ma ki isto komoswek che torooreen; ki tomo kogiil piik mugulelwekwak kotokyi Kiptaiyat Kamuktaindetap kwanisyekwak.

³⁴ Ki kisirchi poisyonigap Jehoshaphat che ng'etunotiin, che po tai ak che po let, kitabuutap Jehu weeriitap Hanani, ki kisirchi chooto kitabuutap laitorinigap Israel.

³⁵ Kingo pata niito konamgei Jehoshaphat laitoryatap Judah ak Ahasia laitoryatap Israel, ki yai Ahasia ne ya miising'.

³⁶ Ki namgei ak ineendet si kobiit koteech melisyek koba Tarsis; ak ki teech melisyechooto eng' Esion-geber.

³⁷ Ki maoten Elieser weeriitap Dodabahu ne po Maresha agobo Jehoshaphat, kole, “Amu koonamge ak Ahasia, ko kagong'em Kamuktaindet ne Toroor poisyoniguk.” Kibutok anyun melisyek ak ki mata komuuch koba Tarsis.