2 ATEPTAP PEETUUSYEK 18 - BUKUIT NE TILIIL Sireet ne Dutero Kanon

Kateunetap maotyot Mikaia

¹ Ki tinyei Jehoshaphat mogornatosyek eng' chaang'indo ak teegisto ak kigaangei ak Ahab.

² Kingo siirto kenyiisyek alage kochoortagei kap Ahab eng' Samaria. Ki eng'ji Ahab ineendet keechiirek ak tuuga che chaang' miising', kobooto piik che ki mi ak ineendet ak kogaigai ineendet kwo kotogosta kobookyi Ramoth-gilead.

³ Ki leenji `Ahab laitoryatap Israel Jehoshaphat laitoryatap Judah, “Ichame keebe tuwai Ramoth-gilead?” Ak ki wolji Jehoshaphat koleenji, “Auu kiit ne iuu, ak uu piikyuk piiguk. Ki mi kobooten eng' lugoni.”

⁴ Ago ki leenji `Jehoshaphat laitoryatap Israel, “Asoomin ale, teep eng' ng'olyootap Kamuktaindet ne Toroor rani.”

⁵ Ara ki iyum anyun laitoryatap Israel maotik pogol ang'wan, ak koleenji icheek, “Kibe kebargei ak Ramoth-gilead, anan atebi?” Ak ki leenji, “Togoste, amu indoi Kamuktaindet eutap laitoryat.”

⁶ Ago ki le Jehoshaphat, “Tos ma mi maotyotap Kamuktaindet ne Toroor age yu, si keteepse ineendet?”

⁷ Ki leenji `laitoryatap Israel Jehoshaphat, “Ta komi chiito age ne kimuuchi keteepse eng' Kamuktaindet ne Toroor, ineendet ko Mikaia weeriitap Imla, ago aweche amu ma maoteni tuguuk che myachen agobo anee, kobatee yaityet kotugul.” Ki le Jehoshaphat, “Amat komwa laitoryat ko uu no.”

⁸ Ki kuur anyun laitoryatap Israel kiptaiyat age, ak koleenji, “Ui imutu ichogune Mikaia weeriitap Imla.”

⁹ Kiga tebee laitoryatap Israel ak Jehoshaphat laitoryatap Judah chii tugul ng'echerennyi ne po laitornatet, kolaachi ngoroikwak che po laitornatet, ak ki tebi eng' ole paraa eng' ole kibunei eng' ormariichetap Samaria; ak ki maoteni maotik tugul eng' tainnywa.

¹⁰ Kiyachigei Zedekiah weeriitap Kenaana kuinoigap kariik, ak kole, “Kamwa Kamuktaindet ne Toroor kole: Itoortae chuuto piigap Syria, kot kowong'kei.”

¹¹ Kimaotenso maotik tugul ko uu nooto ak icheek, kole, “Togoste Ramoth-gilead ak iboor, amu indoi Kamuktaindet ne Toroor nganasanooto eutap laitoryat.”

¹² Ki ng'alaalji ineendet `chiito ne kiga kiyookto koguur Mikaia, koleenji, “Keero, kachamak eng' laitoryat ng'aleegap maotik che kamwachi eng' kasyinet agenge. Asoomin ale, ingoigei anyun ng'olyoondeng'ung' ng'olyootap age eng' icheek, ng'alaal ng'aleek che myach.”

¹³ Ago ki le Mikaia, “Ko uu ye sabei Kamuktaindet ne Toroor, ko ki it ne mwaei Kamuktaindennyu, amwae nooto.”

¹⁴ Kingo it ineendet ole mi laitoryat, koleenji laitoryat ineendet, “Mikaia, kibe Ramot-gilead, anan atebi?” Ki le ineendet, “Otogoste ak oboor; ak kindo eunekwok pichooto.”

¹⁵ Ki leenji `laitoryat ineendet, “Ayosyeun konyil ata ale, amat imwaiwo kiy age kobatee imanda eng' kainetap Kamuktaindet ne Toroor?”

¹⁶ Ki le Mikaia, “Ki ageer Israel tugul ko kaiyesta eng' tuloonook, ko uu keechiirek che ma tinyei mestowot, ak ki mwa Kamuktaindet ne Toroor kole, ‘Ma tinyei chuuto kiptaiyat; ingoweek chii tugul kwo koonnyi eng' kaalyeet.’ ”

¹⁷ Ki leenji `laitoryatap Israel Jehoshaphat, “Kama amwaun ale, ma maoteni ineendet tuguuk che myachen agobo anee, kobatee yaityet?”

¹⁸ Ki leenji Mikaia, “Ogas anyun ng'olyootap Kamuktaindet ne Toroor: ki ageer Kamuktaindet ne Toroor kotebyei eng' ng'echerennyi ne po laitornatet, ak kitononi lugeet tugul ne po kipsengwet eng' eunnyi ne po tai ak ne po kaataam.

¹⁹ Ak ki le Kamuktaindet ne Toroor, ‘Ng'oo ne iberberi Ahab laitoryatap Israel, si kwo kotogosta ak kome eng' Ramoth-gilead?’ Ki mwa age ko uu ni, komwa age ko uu ni.

²⁰ Ki mong' tamirmiryo ak kotonon eng' taitap Kamuktaindet ne Toroor, ak kole, ‘Awendi aberberi.’ Ki leenji `Kamuktaindet ne Toroor ineendet, ‘Iberbertoi ano?’

²¹ Ak ki le, ‘Awendi ak aegu tamirmir ne kenisyei eng' kutusweegap maotikyik tugul.’ Ak ki mwa ineendet kole, ‘Iberberi ineendet ak iterteer; ui anyun ak iyai ko uu nooto.’

²² Ara anyun, keero, kagonde Kamuktaindet ne Toroor tamirmir ne kenisyei kutusweegap maotichuguk tugul; ak kagomwa Kamuktaindet ne Toroor yaityet agobo inyee.”

²³ Ki riik anyun Zedekiah weeriitap Kenaana, ak korabach Mikaia matanda, ak koleenji, “Kabun ano Kabuusetap Kamuktaindet ne Toroor ak konyo kong'alaalun?”

²⁴ Ak ki le Mikaia, “Igeere eng' peetuunooto ye tuun iwendi koot ne po oriit iunyegei.”

²⁵ Ki le laitoryatap Israel, “Onam Mikaia ak oweekte omutyi Ammon pounindetap nganaseet ak Joash weeriitap laitoryat.

²⁶ Oleenji kamwa laitoryat kole, ‘Onde chiichi korgoreet, ak obae amitwogigap nyalilda ak peegap nyalilda, agoi aweege eng' kaalyeet.’ ”

²⁷ Ak ki le Mikaia, “Ngot iweege iman eng' kaalyeet, ko kaagaa ma ng'alaalena Kamuktaindet ne Toroor.” Ak ki testai kole, “Ogas okweek piik tugul!”

Meetap Ahab

²⁸ Ara kitogosta anyun laitoryatap Israel ak Jehoshaphat laitoryatap Judah koba Ramot-gilead.

²⁹ Ki leenji `laitoryatap Israel Jehoshaphat, “Awalegei aegu age ak awe lugeet, ago ilaach inyee ngoroik che po laitornatet.” Kowalgei anyun laitoryatap Israel koek age ak koba lugeet.

³⁰ Kiga ng'at `laitoryatap Syria kiptainigap kariisyekyik, koleenji, “Amat obargei ak ne ming'in anan ko ne oo, kobatee laitoryatap Israel ineegei.”

³¹ Kingo keer kiptainichooto po kariisyek Jehoshaphat, komwa kole, “Niito ko laitoryatap Israel.” Ara kiweekyigei anyun kole kobargei ak ineendet; ago kiwaach Jehoshaphat, ak kitoret `Kamuktaindet ne Toroor ineendet. Ki igoochi `Kamuktaindet icheek kobagaakta ineendet.

³² Kingo keer kiptainigap kariisyek kole ma laitoryatap Israel ni, koweek, mata koosup ineendet.

³³ King'i chiito age kwangennyi komwok kosapsapchi ak kityech laitoryatap Israel ole tuiyechin kariikyik che ki ilaachi. Ki leenji anyun chiito ne kweriei chepkichutinnyi, “Imuta amanda eng' oli mi lugeet, amu kagiguotena miising'.”

³⁴ Kitesak lugeet peetuunooto, ak kitiigei laitoryatap Israel eng' chepkichutinnyi kotokyigei piigap Syria agoi koskoleny. Ye kingo neegit kororokto asiista, kome ineendet.